جەكسەنبى, 25 قازان 2020
COVID-19 قازاقستاندا. جۇقتىرعاندار — 110402. جازىلعاندار — 105618. قايتىس بولعاندار — 1796
1929 1 پىكىر 23 قىركۇيەك, 2020 ساعات 12:58

قازاقستان رەسەيدىڭ شاعىمىنا جاۋاپ بەردى

رەسەي قازاقستاننان جەتكىزىلەتىن ءتۇستى سىنىقتاردىڭ توقتاتىلعانىنا بايلانىستى ەاەو-عا شاعىمداندى. ال، بۇگىن اتالعان جايتقا قاتىستى قر يندۋستريا جانە ينفراقۇرىلىمدى دامىتۋ مينيسترلىگى تۇسىنىك بەردى. 

رەسەيلىك بۇقارالىق اقپارات قۇرالدارىنىڭ حابارلاۋىنشا، قازاقستان جازدىڭ سوڭىندا قولدانىستاعى كەلىسىمشارتتارعا قاراماستان، رەسەيگە ءتۇستى سىنىقتاردى جەتكىزۋدەن باس تارتقان. ال، قازاقستان باسقا ەلدەرگە دايىن ءونىمنىڭ ەكسپورتىن توقتاتپاعان. سوندىقتان دا رەسەي ەاەو-عا شاعىم ءتۇسىردى.

قر يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى ەاەو تاۋارلار نومەنكلاتۋراسى بويىنشا قازاقستان اۋماعىنان قارا جانە ءتۇستى مەتالداردىڭ سىنىقتارى مەن قالدىقتارىن ەكسپورتتاۋعا تىيىم سالۋ سىرتقى ساۋدا كودەكستەرىنە سايكەس ەكى جىل مەرزىمگە بەلگىلەنگەنىن ءتۇسىندىردى. تىيىم يندۋستريا جانە ينفراقۇرىلىمدى دامىتۋ ءمينيسترىنىڭ، ۇلتتىق ەكونوميكا ءمينيسترىنىڭ جانە قارجى ءمينيسترىنىڭ بىرلەسكەن بۇيرىعىمەن رەتتەلەدى.

«بىرلەسكەن بۇيرىق» قازاقستان رەسپۋبليكاسىنىڭ ۇلتتىق قاۋىپسىزدىگى تۋرالى «زاڭعا سايكەس قابىلداندى، ول مەملەكەتتىڭ ەكونوميكالىق قاۋىپسىزدىگىن قامتاماسىز ەتۋ ماقساتىندا مەملەكەتتىك ورگانداردىڭ ءىس-ارەكەتىنە نەگىزدەمە بەرەدى جانە كەلىسىمنىڭ تالاپتارىنا قايشى كەلمەيدى. بۇل جۇمىس وتاندىق مەتاللۋرگيا كاسىپورىندارىن شيكىزاتپەن تولتىرۋ جانە ىشكى نارىقتى قامتاماسىز ەتۋ ماقساتىندا جۇزەگە اسىرىلادى.

بىرلەسكەن بۇيرىق قارا جانە ءتۇستى مەتالدار سىنىقتارى مەن قالدىقتارىنىڭ ەكسپورتىن ەكسپورتقا قولدانىلاتىن كولىك تۇرىنە قاتىستى شەكتەيدى، ياعني ەكسپورتقا تەك اۆتوموبيلمەن تىيىم سالىنادى»، - دەدى يجيدم ءباسپاسوز حاتشىسى ماديار ۋاقپاەۆ.

ونىڭ ايتۋىنشا، ەاەو شارتىنىڭ 29-بابى 1-تارماعىنا سايكەس تاۋارلاردىڭ ءوزارا ساۋداسىنا قاتىسۋشى مەملەكەتتەر مۇنداي شەكتەۋلەردى قاجەت بولعان جاعدايدا قولدانۋعا قۇقىلى.

مينيسترلىك باسقا تىيىمداردى ەنگىزگەن جوق.

Abai.kz

1 پىكىر