الماتى پوليتسياسى كۇشەيتىلگەن جۇمىس رەجيمىنە كوشتى. بۇل تۋرالى قالالىق پوليتسيا دەپارتامەنتىنىڭ ءباسپاسوز قىزمەتى حابارلادى. 

ءباسپاسوز قىزمەتىنىڭ مالىمەتىنشە، 22-24 قىركۇيەك ارالىعىندا الماتىدا "قاۋىپسىز جول" رەسپۋبليكالىق جەدەل-الدىن الۋ شاراسى وتكىزىلەدى. بۇل شارا جول اپاتتارىنىڭ الدىن الۋ جانە ولاردىڭ سانىن ازايتۋعا باعىتتالعان.

"پروفيلاكتيكا جۇمىستارىن جانداندىرۋ جانە جول ءجۇرىسى قاۋىپسىزدىگى سالاسىنداعى تالاپتاردىڭ ساقتالۋىن باقىلاۋ، قوعامدىق ءتارتىپتى، جول قاۋىپسىزدىگىن قامتاماسىز ەتۋ جانە جول اپاتىن ازايتۋ كۇشەيتىلەدى. وسى ۋاقىتتا جەدەل الدىن الۋ ءىس-شارالارىن وتكىزۋ ءۇشىن جەكە قۇرام كۇشەيتىلگەن جۇمىس رەجيمىنە كوشەدى. سونداي-اق، "قاۋىپسىز جول" اكتسياسى اياسىندا جولاۋشىلاردى جانە جۇكتەردى تاسىمالداۋ كەزىندە جول قاۋىپسىزدىگىن قامتاماسىز ەتۋگە ەرەكشە نازار اۋدارىلادى", - دەدى الماتى قالاسى پد اكىمشىلىك پوليتسيا باسقارما باسشىسى، پوليتسيا پولكوۆنيگى جاندوس مۇراتاليەۆ.

سونىمەن قاتار، ول جەكە قۇرامنىڭ باستى مىندەتى جول قوزعالىسى ەرەجەلەرىن بۇزۋدى انىقتاۋ، جولىن كەسۋ، جول قوزعالىسى ەرەجەسىنىڭ تالاپتارىن ەلەمەيتىن جۇرگىزۋشىلەردى انىقتاۋ، ورەسكەل ەرەجەبۇزۋشىلىقتاردى - ماس كۇيىندە اۆتوكولىكتى باسقارۋ، جولدىڭ قارسى بەتىنە شىعۋ، قاۋىپسىزدىك بەلدىگىن پايدالانباۋ، كولىك قۇرالىن باسقارۋ كەزىندە ۇيالى تەلەفون ارقىلى سويلەسۋ، كولىكتى مەملەكەتتىك ءنومىرسىز باسقارۋدى انىقتاۋعا باسا ءمان بەرىلەتىنىن اتاپ ءوتتى.

"جۇرگىزۋشىلەر مەن جاياۋ جۇرگىنشىلەر اراسىندا جول قوزعالىسى ەرەجەلەرىن ساقتاۋ بويىنشا ءتۇسىندىرۋ جۇمىستارى جۇرگىزىلەدى. كوبىنەسە جول اپاتىنا جۇرگىزۋشىلەر عانا ەمەس، جاياۋ جۇرگىنشىلەر دە كىنالى بولىپ جاتادى. سوندىقتان مەن جول قوزعالىسىنىڭ بارلىق قاتىسۋشىسىنا كوشەنى قاتاڭ بەلگىلەنگەن جاياۋ جۇرگىنشىلەر وتكەلىمەن جانە تەك باعدارشامنىڭ جاسىل ءتۇسىن جانعان كەزدە وتۋگە كەڭەس بەرەمىن. جۇرگىزۋشىلەر وتە مۇقيات بولىپ، جول ەرەجەسىن بۇزباي، جىلدامدىقتى ساقتاۋى كەرەك", - دەيدى جاندوس مۇراتاليەۆ.

Abai.kz