بۇل تۋرالى دۇيسەنبى كۇنى ورتالىق كوممۋنيكاتسيالار قىزمەتىندە وتكەن ءباسپاسوز بريفينگىندە ايتىلدى.

"قازىرگى كەزدە بەس وبلىس 26 اۋدانداعى 47 ەلدى مەكەندە قۇستاردىڭ قىرىلۋى تىركەلدى. جەكە ءۇي-جايلاردا 12 926 قۇس ولگەن، سولتۇستىك قازاقستان وبلىسىنداعى قۇس فابريكاسىندا 41 مىڭنان استام قۇس قىرىلعان" دەدى اۋىل شارۋاشىلىعى ۆيتسە-ءمينيسترى گۇلميرا يساەۆا.

ونىڭ سوزىنە قاراعاندا، جوعارىدا اتالعان بەس وبلىسقا سولتۇستىك قازاقستان، اقمولا، قوستاناي، پاۆلودار، قاراعاندى وبلىستارى كىرەدى. سوڭعى اتالعان ەكى ايماقتا زەرتحانا جۇمىستارى ءجۇرىپ جاتىر.

بىرنەشە كۇن بۇرىن قازاقستان اۋىل شارۋاشىلىعى مينيسترلىگى سولتۇستىك قازاقستان وبلىسىندا (سقو) "جوعارى پاتوگەندى قۇس تۇماۋى تاراعانىن", سوعان بايلانىستى تۇماۋمەن كۇرەس شارالارى باستالعانىن حابارلاعان ەدى. مينيسترلىكتىڭ مالىمەتىنشە، تامىز ايىنىڭ باسىنان بەرى رەسەيدىڭ قازاقستانعا جاقىن اۋماقتارىنان قۇس ونىمدەرى مەن ءتىرى قۇستاردى ەلگە اكەلۋگە تىيىم سالىنعان. ءدال وسىعان ۇقساس شەكتەۋ اتالعان بەس وبلىسقا دا قويىلعان.

تۇماۋدان ولگەن ءۇي قۇستارىنىڭ يەلەرىنە بيلىك وتەماقى تولەۋگە ۋادە بەرگەن.

رەسمي اقپارات بويىنشا، 4,7 ملن قۇسقا ۆاكتسينا ەگۋ ءۇشىن 1,4 ملن دوزا بولىنگەن. الداعى ۋاقىتتا تاعى 3,5 ملن قۇستى ەگۋگە مۇمكىندىك بەرەتىن 1 ملن دوزا تۇسپەك. قۇس تۇماۋى باستالماي تۇرىپ 11,8 ملن قۇس ەگىلگەن.

مينيسترلىك ولگەن قۇستار جويىلاتىنىن، زالالسىزداندىرۋ جۇمىسى كۇشەيەتىنىن ايتىپ وتىر.

ۆەدومستۆو وكىلدەرىنىڭ ايتۋىنشا، ادامدار اراسىندا قۇس تۇماۋى تىركەلمەگەن. قۇستارعا جاقىن جۇرگەن 400 ادام مەديتسينالىق باقىلاۋعا الىنعان.

Abai.kz