مينيسترلىكتىڭ مالىمەتىنشە، 9-16 قىركۇيەك ارالىعىندا سولتۇستىك قازاقستان وبلىسىنىڭ جەتى اۋدانى: تيميريازەۆ، تايىنشا، جامبىل، قىزىلجار، شال اقىن، عابيت مۇسىرەپوۆ جانە ماعجان جۇماباەۆ اتىنداعى اۋدانداردا ءۇي قۇستارىنىڭ ءولىمى تىركەلگەن. بۇل اۋداندارداعى 10 ەلدىمەكەن كارانتينگە جابىلعان.

"ۇلتتىق رەفەرەنت ورتالىعى قۇستاردىڭ ولىمىنە جوعارى پاتوگەندى قۇس تۇماۋى سەبەپ بولعانىن انىقتادى. ەرەجەگە سايكەس، قازاقستان دۇنيەجۇزىلىك دەنساۋلىق ساقتاۋ ۇيىمىنا اۋرۋدىڭ ورشىگەنى تۋرالى حابار بەردى" دەلىنگەن مينيسترلىك تاراتقان حابارلامادا.

مينيسترلىكتىڭ ءباسپاسوز قىزمەتىنىڭ ايتۋىنشا، ايماققا ۆاكتسينا اكەلىنىپ، زالالسىزداندىرۋ جۇمىستارى جۇرگىزىلەدى، قۇس ولىكتەرى جويىلادى. 17 قىركۇيەكتەن باستاپ قۇس ونىمدەرىن ايماقتان شىعارۋعا تىيىم سالىندى.

رەسەيمەن شەكارالاس اۋدانداردا مالدارعا ۆاكتسينا سالۋ ءۇشىن "جوعارى پاتوگەندى قۇس تۇماۋىنان قورعايتىن 873 مىڭ وتاندىق ۆاكتسينا دوزاسى بولىنگەن". تۇماۋدان ولگەن ءۇي قۇستارىنىڭ يەلەرىنە بيلىك وتەماقى تولەۋگە ۋادە بەردى.

وتكەن اپتانىڭ سوڭىندا اقپارات قۇرالدارى سولتۇستىك قازاقستان وبلىسىنىڭ كەمىندە ءۇش اۋدانىندا ءۇي قۇستارىنىڭ ءولىمى تىركەلگەنىن حابارلاعان ەدى.

29 تامىزدا قازاقستان قۇس تۇماۋىنا بايلانىستى كورشى رەسەيدىڭ ومبى وبلىسىنان قۇس ونىمدەرىن اكەلۋگە شەكتەۋ قويعان. جەرگىلىكتى اقپارات قۇرالدارىنىڭ حابارلاۋىنشا، ينفەكتسيا اۋىلدىق جەرلەردىڭ جارتىسىندا انىقتالعان، ءالى دە تاراپ جاتىر.

Abai.kz