سەنات دەپۋتاتى ەرىك سۇلتانوۆ پرەمەر-مينيستر اسقار مامينگە دەپۋتاتتىق ساۋالىندا وسى ماسەلەنى قوزعادى.

سەناتور كەلتىرگەن مالىمەتتەرگە سايكەس قازاقستاندا 1,2 ملن. ادام اۋىز سۋ تاپشىلىعى زاردابىن تارتىپ وتىر. 2,5 مىڭنان استام اۋىلدىق جەردە ءالى كۇنگە دەيىن ساپالى اۋىز سۋ جوق. بۇنىڭ نەگىزگى سەبەبى – بيۋدجەتتىك باعدارلامانىڭ دۇرىس باقىلانباۋى جانە 2019-2020 جىلدارى بيۋدجەتتەن بولىنگەن قاراجاتتىڭ يگەرىلمەۋى.

«سونداي-اق، بيۋدجەتتىڭ تاپسىرىس بەرۋشىسى دە، اكىمشىسى دە سانالاتىن ەكولوگيا، گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتى قىزمەتىنىڭ سىن كوتەرمەۋى دە سەبەپ بولىپ وتىر. ەلىمىزدىڭ سولتۇستىگى مەن قوستانايداعى جاعداي بۇعان دالەل»، – دەيدى دەپۋتات.

سونىمەن قاتار دەپۋتاتتىق ساۋالدا: «سولتۇستىك قازاقستان وبلىسىنىڭ سۋ قۇبىرلارىنىڭ 67%-ى نەمەسە 1955 كم تولىعىمەن توزعان جانە توپتىق سۋ قۇبىرلارى جۇيەسىنىڭ اقاۋلى تەحنيكالىق جاعدايى توتەنشە جاعدايلاردىڭ تۋىنداۋىنا الىپ كەلىپ وتىر. ولار سولتۇستىك قازاقستان جانە قوستاناي وبلىستارىنىڭ 200-دەن استام اۋىلدىق ەلدى مەكەندەرىن سۋمەن قامتاماسىز ەتۋگە قاۋىپ ءتوندىرىپ وتىر. ماگيسترالدىق قۇبىرلاردىڭ قاتتى توزۋىنا بايلانىستى تاسىمالداۋ كەزىندە سۋ شىعىنىنىڭ جالپى كولەمى 65% - دى قۇرايدى»، – دەلىنگەن.

سەناتور ءوز سوزىندە پروبلەمالىق جوبالاردى دا ايتا كەتتى. پرەسنوۆ توپتىق سۋ قۇبىرىن قايتا قالپىنا كەلتىرۋ جوباسىن ىسكە اسىرۋ 2014 جىلدان بەرى ءجۇرىپ جاتىر، الايدا ءالى اياقتالعان جوق. 2019 جىلى جۇمىستاردى ورىنداۋ قارقىنىنىڭ تومەندىگىنە بايلانىستى 2,9 ملرد. تەڭگە يگەرىلمەي، بيۋدجەتكە قايتارىلعان. 2020 جىلى جوبانى جالعاستىرۋعا 1,1 ملرد. تەڭگە ءبولىندى، بىراق بۇل قاراجاتتىڭ دا يگەرىلمەۋ قاۋپى بار.

اتالعان پروبلەمالاردىڭ بارلىعى مەملەكەت باسشىسى بەرگەن تاپسىرمانىڭ دۇرىس ورىندالماۋىنا جانە حالىق دەنساۋلىعىنىڭ ناشارلاۋىنا اكەپ سوقتىرادى.

«وسى ماسەلەنىڭ الەۋمەتتىك-ەكونوميكالىق ماڭىزدىلىعىن ەسكەرە وتىرىپ، سىزدەن سولتۇستىك قازاقستان وبلىسىنىڭ اۋىل حالقىن سۋمەن جابدىقتاۋ پروبلەمالارىن جويۋ بويىنشا ءتيىمدى شارالار قابىلداۋىڭىزدى جانە زاڭنامادا بەلگىلەنگەن تارتىپپەن جازباشا جاۋاپ بەرۋىڭىزدى سۇرايمىز»، – دەدى سەنات دەپۋتاتى ەرىك سۇلتانوۆ.

Abai.kz