قازاقستاندا ەمحانا تاڭداۋ ناۋقانى باستالدى. قىركۇيەكتىڭ 15-ىندە باستالعان ءداستۇرلى ناۋقان ەكى ايعا سوزىلادى. بۇل تۋرالى «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالى حابارلادى.

فيليال مالىمەتىنشە، تىركەۋ وتكەن جىلدان باستاپ eGov ەلەكتروندى ۇكىمەت پورتالى ارقىلى جۇرگىزىلىپ كەلەدى. تىركەلۋ ءۇشىن ەلەكتروندى تسيفرلىق قولتاڭبا قاجەت.

«تىركەۋ پروتسەسىنىڭ اۆتوماتتاندىرىلۋى ازاماتتاردى ەمحاناعا «سىرتتاي» تىركەۋ فاكتىلەرىنىڭ الدىن الۋعا كومەكتەسەدى. سونىمەن قاتار، ەركىن تاڭداۋ ءپرينتسيپى بويىنشا ازامات ءوزى تۇرىپ جاتقان ءبىر اكىمشىلىك بىرلىك اۋماعىنداعى  ەمدەۋ مەكەمەسىنىڭ بىرىنە تىركەلە الادى. وبلىستىق جانە رەسپۋبليكالىق ماڭىزى بار قالالاردا ءبىر اۋدان ىشىندەگى ەمحانانى تاڭداۋعا بولادى»، - دەدى تىلەۋحان ابىلداەۆ.

ايتۋىنشا، بۇگىنگى تاڭدا الماتى قالاسىندا كەپىلدەندىرىلگەن تەگىن مەديتسينالىق كومەك پاكەتى مەن مەديتسينالىق ساقتاندىرۋ پاكەتى شەڭبەرىندە 74 ەمحانا قىزمەت كورسەتەدى. ونىڭ جارتىسىنا جۋىعى – جەكە مەنشىك.

«تىركەۋ ناۋقانى بارىسىندا تەك مەملەكەتتىك قانا ەمەس، جەكە مەنشىك ەمدەۋ ۇيىمدارىنا دا تىركەلۋگە بولادى. تەك تاڭداپ الىنعان كلينيكا  مەديتسينالىق ساقتاندىرۋ قورىمەن كەلىسىمشارت بەكىتكەن بولۋى شارت. جەتكىزۋشى كومپانيالاردىڭ تولىق تىزىمىمەن قوردىڭ fms.kz سايتى ارقىلى تانىسۋعا بولادى»، - دەدى فيليال باسشىسى.

سونىمەن قاتار، بىرقاتار ساناتتار بۇرىنعىشا ەمحانانىڭ تىركەۋ ءبولىمى ارقىلى تىركەلە الادى. ولار:

• زەينەتكەرلەر مەن مۇگەدەكتەر
• ستۋدەنتتەر
• بالالاردىڭ زاڭدى وكىلدەرى مەن بالالىق شاقتان مۇگەدەك تۇرعىنداردىڭ قامقورشىلارى
• شەتەلدە تۋعان بالالار
• تۇرمەدە جازاسىن وتەپ جاتقاندار (سول جەردەگى ەمدەۋ مەكەمەسىنە)
• اسكەري بورىشىن وتەپ جاتقاندار
• بوبەكتەر، بالالار مەن قارتتار ۇيلەرىنىڭ تۇرعىندارى
• رەسمي سەنىمحات ارقىلى تىركەلەتىندەر

ەستەرىڭىزگە سالا كەتسەك، بيىلعى ناۋقان كەزىندە باسقا ەمحاناعا تىركەلگەن تۇرعىندار تاڭداعان ەمحانا قىزمەتىن 2021 جىلدىڭ 1-قاڭتارىنان باستاپ پايدالانا الادى. ياعني، جىلدىڭ سوڭىنا دەيىن بۇرىنعى ەمحاناعا قارالادى.

Abai.kz