14 قىركۇيەكتە الەۋمەتتىك جەلىدە قاراباتان كەنىشى جاقتان اۋاعا "ساڭىراۋقۇلاق" ءتارىزدى قارا ءتۇتىننىڭ تاراپ جاتقانى تۋرالى سۋرەت شىقتى. جەرگىلىكتى ەكولوگيا دەپارتامەنتىنىڭ جەتەكشىسى الىبەك بەكمۇحامەتوۆ اتىراۋلىق "اقجايىق" سايتىنا زياندى زاتتار تاراعانىن راستاعان. ونىڭ سوزىنە قاراعاندا وعان NCOC (North Caspian Operating Company N.V.) كومپانياسى جاۋاپتى.
"اۋاعا تاراعان زياندى زاتتار مولشەرىن انىقتاۋ ءۇشىن ماماندارىمىز قاراباتان اۋماعىنداعى سانيتارلىق زونادا لاستاۋشى زاتتاردىڭ كونتسەنتراتسياسىن ولشەپ جاتىر" دەدى بەكمۇحامەتوۆ.
ەكولوگيا، گەولوگيا جانە تابيعي رەسۋرستار مينيسترلىگىنىڭ ءباسپاسوز حاتشىسى سامال يبراەۆانىڭ ايتۋىنشا، وبلىستىق ەكولوگيا دەپارتامەنتىنىڭ قىزمەتكەرلەرى اۋداندىق جىلجىمالى زەرتحانامەن قاراباتان اۋىلىنا بارعان.
"قارا ءتۇتىننىڭ "نورت كاسپيان وپەرەيتينگ كومپاني ن.ۆ" بولىمشەسى “بولاشاق” مۇناي-گازدى كەشەندى ازىرلەۋ قوندىرعىسىنا تيەسىلى قۇرىلعىدان شىققانى انىقتالدى" دەپ جازدى يبراەۆا Facebook-تاعى پاراقشاسىندا.
ونىڭ سوزىنە قاراعاندا دەپارتامەنت ماماندارى زاۋىتتىڭ سانيتارلىق-قورعاۋ زوناسىنا جاقىن ورنالاسقان اۋماقتىڭ اۋا ساپاسىن تەكسەرگەن.
"بۇل ونەركاسىپ نىسانىن جوسپاردان تىس تەكسەرەمىز، ونىڭ قورىتىندىسى قوسىمشا حابارلانادى" دەدى يبراەۆا.
NCOC كونتسورتسيۋمىنا "قازمۇنايگاز" ۇلتتىق كومپانياسى مەن شەتەلدىڭ بىرقاتار ەنەرگەتيكالىق كومپانيالارى اتاپ ايتقاندا، يتاليالىق Eni, امەريكالىق Shell, ExxonMobil, فرانتسۋزدىڭ Total, جاپوننىڭ Inpex, قىتايدىڭ CNPC كومپانيالارى كىرەدى.
Abai.kz
