سارسەنبى, 21 قازان 2020
COVID-19 قازاقستاندا. جۇقتىرعاندار — 109766. جازىلعاندار — 105301. قايتىس بولعاندار — 1796
46 - ءسوز 2968 20 پىكىر 15 قىركۇيەك, 2020 ساعات 13:14

مەن قوسانوۆ تا، ءابلازوۆ تا ەمەسپىن!

اقيقاتقا تۋرا قاراپ ايتار بولساق، قازاقستانعا تىنىشتىق كەرەك. ويتكەنى ءبىز از حالىقپىز. بىراق جەرىمىز ۇلكەن. حالىقتى اسىرايتىن جەردىڭ استىندا دا، ۇستىندە دە بايلىق جەتكىلىكتى. سوندىقتان «ساياساتتا، بيلىكتە وزگەرىس كەرەك، رەفورما كەرەك»، دەپ «ۇرانداپ» جۇرتتى توڭكەرىسكە شاقىرۋدىڭ قاجەتى جوق. ودان ۇتارىمىز شامالى. بارىمىزدان ايرىلىپ قالامىز. سىرتقى كۇشتەر ارالاسىپ، بۇگىنگى كۇنگە زار بولىپ قالارىمىز حاق.

ويتكەنى سىرتقى كۇشتەر مەملەكەتىمىزدىڭ شاڭىراعىن شايقالتۋ ءۇشىن قارجى توگە وتىرىپ، تالايدى ساتىپ الۋى مۇمكىن. الىسقا بارماي-اق، تمد كەڭىستىگىندە بولىپ جاتقان ساياسي وقيعالارعا كوز سالار بولساق، سونىڭ ءوزى بىزگە ساباق بولۋى ءتيىس. ياعني بىزگە قازىرگى جۇيەنى وزگەرتۋ ءۇشىن رەۆوليۋتسيا ەمەس، ەۆوليۋتسيا قاجەت. ءبارى ورىن-ورنىمەن بولعانى ءجون.

وندا دا حالىق كەز-كەلگەننىڭ ارتىنان ەمەس، ەلدىڭ، مەملەكەتتىڭ، ۇلتتىڭ قامىن ويلايتىن جانى تازا، ادال تۇلعانىڭ ماڭايىنا ۇيىپ، سونىڭ ماڭىنا توپتاسۋى ءتيىس دەپ ويلايمىن. ويتكەنى حالىقتىڭ اۋزى كۇيدى. بىلتىر قوسانوۆقا ەرەمىز دەپ ءبىر الداندى. قازىر فرانتسيادا وتىرىپ الىپ، ەلدى بيلىككە ايتاقتاپ وتىرعان تاعى بىرەۋ بار. وعاندا سەنۋگە بولمايدى. مىقتى بولسا بيلىكتە جۇرگەندە حالىقتىڭ قامىن نەگە ويلامادى؟

دەمەك، قازاقستاننىڭ ساياسي الاڭىنا جاڭا سەركەلەر شىعۋى ءتيىس. ماسەلەن، ءبىز ەكولوگيالىق پارتيا قۇرۋ جولىندامىز. ماقسات بەلگىلى. حالىقتىڭ ءسوزىن سويلەۋ. قامىن جەۋ. مەملەكەتتىڭ يەسى قازاق ەكەنىن وزگەلەرگە مويىنداتۋ. قازاقتىڭ ءتىلىن وسى جەردى مەكەندەيتىن بارلىق ۇلتتىڭ ورتاق ءتىلى ەتۋ.

ءبىزدىڭ پارتيانىڭ العا قويعان ماقساتى وسى. ارينە قازىر ءبىزدى قولداۋشىلار ازداۋ. بىراق وعان بولا جۇمىسىمىزدى جولدان دوعارا المايمىز. قۇرعاق ۋادە، ادەمى ءسوز ەمەس، ناقتى ءىس-ارەكەت ارقىلى ءوزىمىزدى وزگەگە تانىتامىز. مويىنداتامىز. ءبىز جاساعان ناقتى جۇمىستى كورگەن سوڭ-اق، حالىق ءبىزدىڭ ارتىمىزدان ەرۋى ءتيىس.

وسىدان بىرەر اي بۇرىن ءبىر تانىسىم «ازەكە سەن ميلليونەرسىڭ عوي. ءبىر ميلليون (دوللارمەن) بەر، ءبىر وبلىستى اپەرەيىك»، دەيدى. «پەيىلىڭە راحمەت، مەن اكىم بولعىم كەلمەيدى. ورىنتاق ءۇشىن جۇمسايتىن ول ميلليوندى مەن پارتيا قۇرۋعا، ودان ارى حالىقپەن جۇمىس ىستەۋگە ارناعانىم ءتيىمدى. مەن سول جولدى تاڭداعان اداممىن»، دەپ جاۋاپ بەردىم.

ەگەردە مەن بيلىكتە بولعىم كەلسە، وعان باياعىدا قول جەتكىزەر ەدىم. بىراق مەن تاڭداعان جول باسقا. حالىقپەن بىرگە بولۋ. ۇلتتىڭ قامىن جەۋ. مەملەكەتتىڭ بولاشاعىن ويلاۋ. تاۋەلسىزدىكتى باياندى ەتۋ. مىنە وسى. مەن العا قويعان وسى ماقساتتارعا جەتۋ ءۇشىن، پارتيا قۇرىپ، سول ارقىلى قول جەتكىزۋدى ءجون كوردىم.

ازاماتحان ءامىرتايدىڭ جازباسى

Abai.kz

20 پىكىر