وتكەن اپتادان بەرى الەۋمەتتىك جەلىنىڭ قىزدى-قىزدى اڭگىمەسى – قازاق جۋرناليستيكاسىنىڭ، قازاقستان جۋرناليستيكاسىنىڭ بۇگىنگى احۋالى توڭىرەگىندە ءوربىپ جاتىر.

ون جىلداي پرەزيدەنتتىك پۋلدا حابار تاراتىپ، كەيىن بىرەنەشە جىل ارنايى ءتىلشى بولعان ەربول ماندىبەك ەسىمدى ءجۋرناليستىڭ مەملەكەت يەلىگىندەگى ارنادان قىزمەتتەن كەتۋى قازاق ينتەرنەت كەڭىستىگىندە اجەپتاۋىر تالقى بولدى. ەلدى «شۋلاتقان» مالىمدەمەلەرىنەن كەيىن اقپاراتتىق سايتتار الاشاپقىن بولىپ، ەرەكەڭمەن سۇحبات قۇرىپ، تەلەارنالار قازاقستانداعى باق سالاسىنىڭ بۇگىنگى جاي-كۇيىن ءسوز ەتە باستادى.

قازاقستان جۋرناليستيكاسىنداعى تسەنزۋرا تاقىرىبى – قازاق ءتىلدى جەلى تالقىسىنىڭ باس تاقىرىبىنا اينالدى. ەربول ماندىبەكتىڭ مالىمدەمەلەرىن جاقتاۋشىلار مەن وعان قارسى كوزقاراستاعىلار بولىپ، جۇرت پىكىرى ەكىگە جارىلدى.

شىنتۋايتىنا كەلگەندە، قازاقستان جۋرناليستيكاسىنا قاتىستى ءسوز ەتەرلىك ماسەلە كوپ. جۋرناليستىك قىزمەت ەتيكاس، ىشكى جانە سىرتقى رەداكتسيالىق شەكتەۋلەر، باق سالاسىنىڭ قارجىلاندىرىلۋى، سالالىق جۋرناليستيكانىڭ كەنجەلەپ قالۋى، كەيبىر ۇجىمداردىڭ توپتىق، تاپتىق، ءدىني جانە ت.ب. مۇددەلەرگە توپتاسۋى، مەملەكەتتىك باق پەن تاۋەلسىز باق-تىڭ ماتەريالدىق ءھام شىعارماشىلىق احۋالى ت.ب.

وسى رەتتە ءبىز «Abai.kz» اقپاراتتىق پورتالى تۇراقتى تۇردە جۇرگىزىپ كەلە جاتقان ينتەرنەت-كونفەرەنتسياسىنىڭ كەلەسى تاقىرىبىن – قازاق جۋرناليستيكاسىنىڭ وزەكتى ماسەلەلەرىنە ارناعاندى ءجون كوردىك.

ينتەرنەت-كونفەرەنتسيا سپيكەرى – بەلگىلى جۋرناليست، وقىتۋشى، «مىنبەر» جۋرناليستەردى قولداۋ ورتالىعىنىڭ جەتەكشىسى، «Minber.kz» اقپاراتتىق اگەنتتىگىنىڭ باسشىسى ەسەنگۇل كاپقىزى.

سپيكەر ەسەنگۇل كاپقىزىنىڭ اشىق سۇحباتى مەن سىزدەر قويعان ساۋالدىڭ جاۋابى «Abai.kz» اقپاراتتىق پورتالىندا جاريالاناتىن بولادى!

ساۋالدارىڭىزدى جولداي بەرىڭىزدەر، مارحابات، مارتەبەلى وقىرمان!

Abai.kz