دەنساۋلىق ساقتاۋ ءمينيسترى الەكسەي تسوي قازاقستانداعى كوروناۆيرۋستىق ينفەكتسيانىڭ جاڭا تولقىنىنا قاتىستى پىكىر ءبىلدىردى.

تسوي قازاقستاندا كوروناۆيرۋسقا قاتىستى جاعداي قازىر تۇراقتى ەكەنىن، الايدا، كوپتەگەن تمد ەلدەرىندە جانە ەۋروپادا ۆيرۋستىڭ ءوسۋى بايقالاتىنىن اتاپ ءوتتى.

«جاعدايدىڭ تۇراقتىلىعىنا قاراماستان ءبىز توسەك-ورىن قورىن كەڭەيتىپ، ءدارى-دارمەكتەر ساتىپ الامىز. جانە جەكە قورعانىس قۇرالدارىمەن، ماسكالارمەن قامتاماسىز ەتەمىز. قازىر ەكىنشى تولقىنعا دايىندالىپ جاتىرمىز. ارينە، ءبىز ءۇشىن ونداي تولقىننىڭ بولماۋى وتە ماڭىزدى.

ەڭ ماڭىزدى فاكت - بۇل الەۋمەتتىك ديستانتسيا جانە ماسكالار. ءبىز اۋرۋدىڭ 30 پايىزى ماسكا كيۋگە، 40 پايىزى الەۋمەتتىك اراقاشىقتىقتى ساقتاۋعا بايلانىستى ەكەنىن بىرنەشە رەت ايتقانبىز. وكىنىشكە قاراي، ءبىزدىڭ ازاماتتار كوپشىلىك شوعىرلانعان جەرلەردە ارقاشان ماسكا كيە بەرمەيتىنىن بايقايمىز. سوندىقتان ءبىز سىزدەردى وسى ەرەجەنى ساقتاۋعا شاقىرامىز»، - دەدى تسوي.

سونىمەن قاتار ول ءار ادام بۇل جاعدايعا ىقپال ەتە الاتىنىن ايتتى.

«ەكىنشى تولقىنعا دايىندىق پەن پروفيلاكتيكالىق جانە اعارتۋ جۇمىستارىنا دايىندىق دەنساۋلىق ساقتاۋ جۇيەسىنە بايلانىستى. ال، قالعانىنىڭ ءبارى ءبىزدىڭ جاۋاپكەرشىلىگىمىزگە قاراي»، - دەدى مينيستر.

ايتا كەتەيىك بۇعان دەيىن 20 قىركۇيەكتەن باستاپ قازاقستاندا قاتاڭ كارانتين ەرەجەسى ەنگىزىلەتىنى تۋرالى اڭگىمە الەۋمەتتىك جەلىدە تاراعان. وعان قاتىستى قازاقستاننىڭ باس مەملەكەتتىك سانيتارلىق دارىگەرى ايجان ەسماعامبەتوۆا تۇسىنىكتەمە بەرىپتى.

«كارانتيندىك شارالار قازىر دە كۇشىندە. قازىر كارانتين شارالارىن قاتاڭداتۋ تۋرالى الدىن-الا بولجام جوق. ءبارى دە بولاشاقتاعى ەپيدەميولوگيالىق جاعدايعا بايلانىستى. ءبىز جاعدايدى تەك ءىرى قالالاردا عانا ەمەس، ءار وبلىستا جانە اۋىلدا كۇندەلىكتى باقىلاپ وتىرامىز»، - دەدى ەسماعامبەتوۆا.

ايتا كەتەيىك، سوڭعى مالىمەت بويىنشا قازاقستاندا كوروناۆيرۋس جۇقتىرعاندار سانى 106 855-كە جەتتى. ال، دۇنيەجۇزىلىك دەنساۋلىق ساقتاۋ ۇيىمى (ددسۇ) پاندەميا باستالعاننان بەرى الەمدە كوروناۆيرۋستىق ينفەكتسيالاردىڭ رەكوردتىق ءوسۋىن تىركەگەن. ددۇ-نىڭ 13 قىركۇيەكتەگى مالىمەت بويىنشا، سوڭعى تاۋلىكتە الەمدە 307 930 ينفەكتسيا جاعدايى انىقتالدى.