9 قىركۇيەك كۇنى پرەزيدەنت قاسىم-جومارت توقاەۆ توتەنشە جاعدايلار مينيسترلىگىن قايتا قۇرۋ تۋرالى جارلىققا قول قويدى. ءسويتىپ ونىڭ قۇرامىنا توتەنشە جاعدايلار كوميتەتى مەن وزگە مينيسترلىكتەردىڭ قۇرامىنداعى بىرقاتار قۇرىلىمدار بەرىلەتىن بولدى.

اتاپ ايتقاندا: قر يدم يندۋستريالىق دامۋ جانە ونەركاسىپتىك قاۋىپسىزدىك كوميتەتى، قر ۇەم مەملەكەتتىك ماتەريالدىق رەزەرۆتەر كوميتەتى، سونداي-اق، وسىعان دەيىن قر ءىىم-گە بەرىلگەن بىرقاتار فۋنكتسيالار جاڭا مينيترلىكتىڭ قۇرامىنا كىرەدى. پرەزيدەنت جارىعىندا سولاي دەپ جازىلعان.

جاڭا مينيستر – يۋري يلين

ال بۇگىن پرەزيدەنت توقاەۆ يۋري ءيليندى قر ىشكى ىستەر ءمينيسترىنىڭ ورىنباسارى قىزمەتىنەن بوساتىپ، جاڭا جاساقتالعان توتەنشە جاعدايلار مينيسترلىگىنە تاعايىنداۋ تۋرالى جارلىق شىعاردى. ءسويتىپ يۋري يلين مينيستر اتاندى.

يۋري يلين – 1968 جىلدىڭ 9 ساۋىرىندە تۋعان. 1989 جىلى الماتى ي.س.كونەۆ اتىنداعى جوعارعى اسكەري كوماندالىق ۋچەليششەنى تامامداعان.

1998-2015 جىلدارى الماتى قالالىق تج باسقارماسىنىڭ ازاماتتىق قورعاۋ ءبولىمىن باسقاردى. كەيىن الماتى قالاسى جۇمىلدىرۋ دايىندىعى، ازاماتتىق قورعانىس، اۆاريالار مەن دۇلەي اپاتتاردىڭ الدىن الۋدى جانە جويۋدى ۇيىمداستىرۋ باسقارماسىنىڭ باستىعى بولدى. ونان سوڭ، الماتى اكىمىنىڭ ورىنباسارى قىزمەتىنە تاعايىندالعان.

2015 جىلى پرەزيدەنت اكىمشىلىگىنە مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى لاۋازىمىنا تاعايىندالدى. ال 2016 جىلدىڭ ساۋىرىندە قر ىشكى ىستەر ءمينيسترىنىڭ ورىنباسارى بولدى.

اسكەرى شەنى – گەنەرال-مايور.

ماراپاتتارى:

«قۇرمەت» وردەنى (2013 جىل),

جانە 8 مەرەكەلىك مەدال.

مينيسترلىكتى قايتا قۇرۋ ءۇشىن قانشا قاراجات كەرەك؟

سونىمەن اينالاسى ەكى-ءۇش كۇندە بۇرىن تاراتىلعان مينيسترلىك قايتا قۇرىلدى. جاڭا مينيستر تاعايىندالدى. ال سول جاڭا مينيسترلىكتى قايتا جاساقتاۋ ءۇشىن بيۋدجەتتەن قانشا قاراجات قاجەت؟ بۇل تۋرالى كەشەگى ىشكى ىستەر  ۆيتسە-ءمينيسترى، بۇگىنگى توتەنشە جاعدايلار ءمينيسترى يۋري ءيليننىڭ ءوزى ايتىپتى.

«ارينە، ەڭبەكاقىنى كوتەرۋ، لاۋازىمداردىڭ جاڭا ساناتتارىن ەنگىزۋگە قاتىستى ماسەلەلەر بار. بىرقاتار لاۋازىمدى تۇلعانىڭ جالاقىسى وسەدى. سونىمەن قاتار، مەملەكەتتىك ورگاندى قايتا تىركەۋ، بلانك ونىمدەرىن شىعارۋعا قاتىستى ۇيىمداستىرۋ جۇمىسىن جۇرگىزۋ كەرەك. ەڭبەكاقى قورىن شامامەن 233 ميلليون تەڭگەگە ارتتىرۋ كوزدەلىپ وتىر»، - دەپتى يلين.

جوعارىدا اتالمىش مينيسترلىكتىڭ بۇرىن دەربەس مينيسترلىك بولىپ، كەيىن تااتىلعانىن ايتتىق. ول 2014 جىلى بولعان.

2014 جىلى قازاقستاننىڭ توتەنشە جاعدايلار مينيسترلىگى تارالىتىپ، ونىڭ قىزمەتى قر ىشكى ىستەر مينيسترلىگىنىڭ توتەنشە جاعدايلار كوميتەتى دەگەن شاعىن قۇرىلىمعا بەرىلگەن. ال بيىلعى 1 قىركۇەيتەگى پرەزيدەنت جولداۋىندا اتالعان مينيسترلىكتى قايتا قۇرۋ تۋرالى تاپسىرما بەرىلدى.

وسىعان دەيىن اتالعان مينيسترلىكتى كىمدەر باسقاردى؟

قر توتەنشە جاعايلار مينيسترلىگى العاش قۇرىلعان كۇننەن باستاپ ءوز اتاۋىن بىرنەشە مارتە وزگەرتكەن. ال بۇگىن تاعايىندالعان يۋري يلين سانى بويىنشا 9-شى مينيستر ەكەن.

قر توتەنشە جاعدايلار مينيسترلەرى:

1990-1997 جىلدار – ماكيەۆسكي نيكولاي ميحايلوۆيچ. لاۋازىم اتى – قر توتەنشە جاعدايلار جونىندەگى مەمكوميسسيا جانە مەمكوميتەت توراعاسى.

1997-2001 جىلدار – شالباي قۇلماحانوۆ. لاۋازىم اتى – قر توتەنشە جاعدايلار جونىندەگى مەمكوميتەت توراعاسى. قر توتەنشە جاعدايلار جونىندەگى اگەنتتىك توراعاسى.

2001-2004 جىلدار – زامانبەك نۇرقادىلوۆ. لاۋازىم اتى – قر توتەنشە جاعدايلار جونىندەگى اگەنتتىك توراعاسى.

2004 ناۋرىز – 2004 قىركۇيەك ارالىعى – نۇراحمەت بيجانوۆ. لاۋازىم اتى – قر توتەنشە جاعدايلار جونىندەگى اگەنتتىك توراعاسى.

2004-2005 جىلدار – مۇحامبەت كوپەەۆ. لاۋازىم اتى – قر توتەنشە جاعدايلار جونىندەگى مينيستر.

2005-2007 جىلدار – شالباي قۇلماحانوۆ. لاۋازىم اتى – قر توتەنشە جاعدايلار جونىندەگى مينيستر.

2007 قاڭتار-2007 قاراشا ارالىعى – ۆيكتور حراپۋنوۆ. لاۋازىم اتى – قر توتەنشە جاعدايلار جونىندەگى مينيستر.

2007-2014 جىلدار – ۆلاديمير بوجكو. لاۋازىم اتى – قر توتەنشە جاعدايلار جونىندەگى مينيستر.

2020 جىلدىڭ قىركۇيەگىنەن باستاپ – يۋري يلين. لاۋازىم اتى – قر توتەنشە جاعدايلار جونىندەگى مينيستر.

Abai.kz