قازىر قوعامدا «بىزگە قوس پالاتالى پارلامەنت كەرەك پە، الدە جوق پا؟» دەگەن اڭگىمە ءجيى قوزعالادى. ەسكە سالا كەتەتىن ءبىر جايت، ەلىمىزدە قوس پالاتالى پارلامەنت 1995 جىلعى كونستيتۋتتسياعا سايكەس دۇنيەگە كەلگەن. سەنات دەپۋتاتتارى 47 ادامنان تۇرادى. ونىڭ 32-ءىن ءماسليحات سايلاسا. 15-ءىن پرەزيدەنت تاعايىنداماق. ياعني سەناتورلاردىڭ ۇشتەن ءبىرى مەملەكەت باسشىسىنىڭ سەنىمدى وكىلدەرى.

مۇنى مەن نەگە قوزعاپ وتىرمىن. ويتكەنى الداعى سارسەنبىدە ەلدە سەنات سايلاۋى وتەدى. مەرزىمى تاۋسىلعان 17 سەناتوردىڭ ورنىنا سونشاما جاڭا ازاماتتار كەلمەك. حوش دەلىك. جالپى سەناتتىڭ قىزمەتى نە؟ ونىڭ بار ميسسياسى: تومەنگى پالاتا ماجىلىستەن كەلگەن زاڭداردى سۇزگىدەن وتكىزۋ، جارامسىزىن كەرى قايتارۋ، مەملەكەت باسشىسىنىڭ وڭ جامباسىنا كەلەتىن زاڭداردى ماقۇلداپ، قول قويۋعا ازىرلەۋ ت.ب سەكىلدى تىرلىك. بار جوعى وسى.

ەكىنشى جاعىنان، سەنات - بيلىكتەن شەتتەتىلگەندەر ات باسىن تىرەپ، كۇن كورىسىن جالعايتىن «جۇماق مەكەن». ياعني سەنات دەپۋتاتىنا جوعارعى لاۋازىمدى قىزمەتىنەن بوساعان شەنەۋنىكتەر تاعايىندالىپ كەلەدى. ولاردان ەلگە نە پايدا؟ نە قايىر؟ ايتەۋىر ۋاقىتتارىن وتكىزۋ ءۇشىن، قالعىپ-مۇلگىپ وتىرعاندارى.

ەگەردە ول ورىندارعا مەملەكەت ءۇشىن، حالىق ءۇشىن بارىن بەرەتىن ادال ازاماتتار كەلىپ جاتسا اڭگىمە باسقا.

اقيقاتىن ايتار بولساق، مەنىڭشە سەنات باسى ارتىق قۇرىلىم. ونىڭ بيلىككە قاجەتتىلىگى بار شىعار، بىراق حالىق ءۇشىن، ءتىپتى بيۋدجەت ءۇشىن قاجەتتىلگى شامالى. ولاردى ۇستاپ تۇرۋ ءۇشىن جىلىنا قانشاما ميللياردتار كەتىپ جاتىر.

ءبىز قوس پالاتالى پارلامەنت ۇستايتىنداي فەدەرالدى مەملەكەت ەمەسپىز. ءبىر پالاتالى پارلامەنتتە جەتەدى.

ازاماتحان ءامىرتايدىڭ جازباسى

Abai.kz