قازاقستاننىڭ ورال قالاسىندا "جۇلدىز" شاعىن اۋدانىنىڭ 20-دان استام تۇرعىنى ايماققا كوروناۆيرۋسپەن اۋىرىپ، جازىلعاندار ءۇشىن رەابيليتاتسيالىق ورتالىق اشۋعا قارسى بولدى.

ولار قۇرىلىس الاڭىنا جينالىپ، ورتالىق قۇرىلىسى تۇرعىندار اراسىندا كوروناۆيرۋس "جۇقتىرىپ الۋ تاۋەكەلىن كۇشەيتەدى" دەدى.

"اۋرۋحانا بۇل جەرگە سالىنباۋى كەرەك. مۇندا ناۋقاستار جۇرسە، ءبىز جانە بالالارىمىز اۋىرىپ قالماي ما؟ ءبىزدىڭ ءۇي مەن قۇرىلىس اراسىنداعى قاشىقتىق 100 مەتر. اۋرۋحانا سالۋعا باسقا دا جەرلەر جەتكىلىكتى عوي. ءبىز قۇرىلىسقا قارسىمىز!",- دەدى ەسباتىر سيسەنوۆ اتتى تۇرعىن.

جينالعاندار سيسەنوۆتىڭ ايتقانىن قولداپ، "ودان قايتا مەكتەپ سالىڭدار!", "جولدى جوندەڭدەر!", "بالالار الاڭىن سالىڭدار!" دەپ ايقايلادى. ولارمەن جولىققان قالا باسشىسى ابات شىنىبەكوۆ پەن وبلىستىق دەنساۋلىق ساقتاۋ باسقارماسىنىڭ باسشىسى بولاتبەك كايۋپوۆ اۋرۋحانا قۇرىلىسى تۇرعىندار ومىرىنە قاۋىپ تۋعىزبايتىنىن جەتكىزدى.

- بارلىق ءىرى اۋرۋحانالار قالا ورتالىعىندا ورنالاسقان. ولاردىڭ اينالاسىندا كوپ قاباتتى ۇيلەر بار. ۆيرۋس اۋا ارقىلى وتە جاقىن ارالىقتا عانا جۇعادى. سىزدەر ءۇشىن ەشقانداي قورقىنىش جوق", - دەدى كايۋپوۆ.

قالا باسشىسى رەابيليتاتسيالىق ورتالىق قۇرۋ — دەنساۋلىق ساقتاۋ مينيسترلىگىنىڭ شەشىمى ەكەنىن، اكىمشىلىك لايىقتى جەر تاۋىپ بەرگەنىن ءبىلدىردى.

"بۇل رەابيليتاتسيالىق ورتالىقتىڭ قۇرىلىسى ءۇشىن وتە ىڭعايلى جەر. بارلىق قاجەتتى كوممۋنيكاتسيالار بار. ەپيدەميا اياقتالعاننان كەيىن بۇل جەر كلينيكا بولىپ، تۇرعىنداردى قابىلدايدى", - دەدى شىنىبەكوۆ.

شاعىن اۋدان تۇرعىندارى بيلىك وكىلدەرىنىڭ سوزدەرىنە سەنبەدى. ولار باتىس قازاقستان وبلىسىنىڭ باسشىسى عالي يسكاليەۆپەن جولىعۋعا ارەكەت ەتەتىنىن جەتكىزدى.

وسىعان دەيىن قازاقستاننىڭ باسقا دا بىرنەشە ايماعىندا جەرگىلىكتى تۇرعىندار كوروناۆيرۋسپەن اۋىرعان ناۋقاستارعا ارنالعان نىسانداردى اشۋعا، سالۋعا قارسىلىق بىلدىرگەن.

Abai.kz