ەلدىڭ دەنساۋلىق ساقتاۋ مينيسترلىگى قازا تاپقاندار سانى ءوسۋى مۇمكىن دەپ مالىمدەدى. ەلدە 5 تامىز قارالى كۇن دەپ جاريالاندى.

جارىلىستان كوپتەگەن عيمارات قيراعان. كوشەدە اۋدارىلعان كولىكتەر، شاعىلعان تەرەزەلەر، كىرپىش، تاستار جاتىر. قالادا اۆتوكولىك قوزعالىسى دا بۇزىلدى. قالا اۋرۋحانالارىنا جارالانعاندار كوپتەپ ءتۇسىپ، سىيماي جاتىر.

CNN تەلەارناسىنىڭ ءتىلشىسىنىڭ حابارلاۋىنشا، جارىلىس ايماعىنان بىرنەشە شاقىرىم جەردەگى ۇيلەردىڭ دە تەرەزەسى سىنعان. تىلشىلەردىڭ سوزىنشە، CNN ارناسىنىڭ بەيرۋتتاعى بيۋروسىندا جارىلىس "جەر سىلكىنىسىندەي" سەزىلگەن.

جارىلىستىڭ سەبەبى بەلگىسىز. ەل ۇكىمەتى تەڭىز پورتىنداعى قويمادا جارىلعىش زات جارىلعانىن ايتادى.

قازاقستان سىرتقى ىستەر مينيسترلىگى جارىلىس تولقىنىنان قازاقستاننىڭ ليۆانداعى ەلشىلىگىنىڭ عيماراتى زاقىمدانعانىن حابارلادى.

"ەلشىلىك قىزمەتكەرلەرى جۇمىس ۋاقىتى اياقتالعان سوڭ ۇيلەرىنە قايتىپ كەتكەن. جۇمىستا قالعان كونسۋل جارىلىس تولقىنىنان ازداپ جاراقاتتاندى. ءسىم جەرگىلىكتى بيلىكپەن بايلانىسىپ وتىر. ليۆاندا جۇرگەن قازاقستان ازاماتتارىنا قاتىستى اقپاراتتاردى تەكسەرىپ جاتىر" دەپ حابارلادى مينيسترلىك.

جارىلىس ليۆان ءۇشىن وتە قيىن شاقتا بولدى. ەلدە ەكونوميكالىق داعدارىس. بۇعان قوسا، جارىلىس بۇۇ-نىڭ تريبۋنالىندا "10 جىل بۇرىن ليۆاننىڭ ەكس-پرەمەرى رافيك ءحاريريدى ءولتىردى" دەپ ايىپتالعان ءتورت ادامنىڭ سوتى قارساڭىندا بولدى. ءتورت ايىپتالۋشى دا "حەزبوللا" توبىنىڭ مۇشەسى. ولار وزدەرىنە تاعىلعان ايىپتى جوققا شىعارادى. سوت شەشىمى جۇما شىعۋى ءتيىس.

بەيرۋت قالاسىندا شامامەن 300 مىڭنان 2 ميلليونعا دەيىن ادام تۇرادى. كەيىنگى 90 جىلدا قالادا حالىق ساناعى وتپەگەن.

Abai.kz