مۇنداي مالىمەت 4 تامىز كۇنگى ۇكىمەت وتىرىسىندا ايتىلدى. ونلاين وتىرىستا بايانداما جاساعان ءبىلىم جانە عىلىم ءمينيسترى اسحات ايماعامبەتوۆ "قۇرىلعى وتە تاپشى، مۇنى اشىق ايتۋ كەرەك" دەدى.

– قولىندا ەشقانداي قۇرىلعىسى جوق بالالاردى عانا ايتقان كۇننىڭ وزىندە مۇنداي 185 مىڭ بار. قالعان بالالاردى ەسەپتەگەندە ۇلكەن تاپشىلىق بارى انىقتالادى. اسىرەسە، كوپ بالالى، از قامتىلعان، جەتىم بالالاردى قامتۋ ماسەلەسى وتە وزەكتى بولىپ وتىر. سوندىقتان 1 قىركۇيەككە دەيىن كەم دەگەندە 500 مىڭ كومپيۋتەر وسى بالالارعا تاراتىلاتىن بولادى، – دەدى مينيستر.

بريفينگ كەزىندە كورسەتىلگەن سىزباعا سايكەس، ەلدە 24 231 مۇعالىمدە كومپيۋتەر جوق. 27 519 مۇعالىم، 482 900 وقۋشى ينتەرنەتكە قوسىلماعان. ءمينيستردىڭ ايتۋىنشا، مۇعالىمدەرگە مەكتەپتەردىڭ تەحنيكاسى ۋاقىتشا بەرىلمەك.

تسيفرلىق دامۋ، يننوۆاتسيالار مەن اەروعارىش ونەركاسىبى ۆيتسە-ءمينيسترى باعدات ءمۋسيننىڭ ايتۋىنشا، قازاقستاندا "118 قالا، 4273 اۋىل جوعارى جىلدامدىق ينتەرنەتپەن قامتىلعان". جىلدىڭ اياعىنا دەيىن "923 اۋىلدى ينتەرنەتپەن قامتاماسىز ەتۋ جوسپارلانعان".

بريفينگ كەزىندە مۋسين ينتەرنەت جىلدامدىعى تومەن ەلدى مەكەندەر انىقتالعانىن، ينتەرنەت ساپاسىن ارتتىراتىن قوسىمشا جابدىق ورناتۋ ءۇشىن جەر ءبولۋ قاجەتتىگىن ايتىپ، بۇل ماسەلەنى شەشۋ بويىنشا پرەمەر-مينيستردەن كومەك سۇرادى.

بۇعان دەيىن ءبىلىم جانە عىلىم مينيسترلىگى بيىل وقۋشىلار مەن ستۋدەنتتەر قاشىقتان وقي باستايدى، تەك باستاۋىش سىنىپ وقۋشىلارى مەن وندىرىستىك تاجىريبە مەن سىناقتان ءوتۋى ءتيىس ستۋدەنتتەرگە عانا قانداي دا ءبىر ەرەكشەلىكتەر بولادى دەپ حابارلاعان ەدى. 1 قىركۇيەك - ءبىلىم كۇنى ونلاين فورماتتا وتەدى.

بيىل كوكتەمدە كوروناۆيرۋس ىندەتىنە بايلانىستى قازاقستاندىق وقۋشىلار مەن ستۋدەنتتەر وقۋ جىلىنىڭ سوڭعى بولىگىن قاشىقتان وقىپ، اياقتاعان ەدى.

وسى ۋاقىت ارالىعىندا ينتەرنەت جىلدامدىعىنىڭ تومەن بولۋى، مەكتەپتەردىڭ تەحنيكالىق تۇرعىدا جابدىقتالماۋى، مۇعالىمدەر مەن وقۋشىلاردىڭ قاشىقتان وقۋعا دايىن ەمەستىگى سياقتى ءتۇرلى ماسەلەلەر تۋىنداعان. كوپتەگەن اتا-انالار بالالارىنىڭ ونلاين وقۋعا مۇمكىندىگى جوق ەكەنىن ايتىپ شاعىمدانعان ەدى.

Abai.kz