سارسەنبى, 23 قىركۇيەك 2020
COVID-19 قازاقستاندا. جۇقتىرعاندار — 107450. جازىلعاندار — 102219. قايتىس بولعاندار — 1699
46 - ءسوز 3457 3 پىكىر 4 تامىز, 2020 ساعات 19:05

اراق پەن ۆيرۋستىڭ ايىرماسىن قويدان سۇراڭىز

وتكەن عاسىردىڭ 90-شى جىلدارى پلاستيك بوتەلكەگە قۇيىلعان قىتاي اراعىنىڭ زامانى تۋعان. سول ساسىق اراق ايىرباس ۆاليۋتاسىنىڭ ءرولىن اتقارىپ كەتە جازدادى. اراققا سۋساعان كوپشىلىك قولدا باردى سول شولمەكتىڭ سانىمەن ولشەدى. ءتىپتى ءبىر قويدى ءبىر شولمەك اراققا ايىرباستادى-اۋ! قۇنى كەتكەن قايران شوپان اتا! ءتورت تۇلىك ءپىرىنىڭ بىرىنەن ايىرىلىپ قالۋعا از قالدىق. بىرنەشە رەت سۇزگىدەن وتپەگەن ءسپيرتتىڭ پلاستيكپەن رەاكتسياعا ءتۇسىپ، ۋلى سۋسىنعا اينالاتىنىنا دا قارامادى عوي، شىركىندەر!

پاندەمياعا ەش قاتىسى جوق بولسا دا قانشا ازامات سول پلاستيك شولمەكتەگى ۋ اراقتىڭ قۇربانى بولدى. ول قۇربانداردى سانىن دا ەشكىم بىلمەيدى. بىراق، از ەمەس. ەندى، مىنە، پاندەميامەن جارىسىپ پلاستيك قۇتىعا، "باكالاجكاعا" قۇيىلعان اراق تاعى پايدا بولىپتى. اناۋ-سىناۋ ەمەس، 5 ليتردەن. بۇل الدىڭعىسىنان دا ارزان با دەرسىڭ؟! 3000 مەن 7000 تەڭگە ارالىعىندا ساتىلادى دەيدى. ەسەپتەيىك: قازىر اۋىلدا ءبىر قويدىڭ باعاسى 40-50 مىڭ تەڭگەنىڭ ماڭايىندا. ورتاشا ەسەپپەن ءبىر قويعا 7 پلاستيك اراق الۋعا بولادى. 5 ليترلىك 1 پلاستيگىڭىز 10 بوتەلكە اراق. 7 پلاستيگىڭىز 70 شولمەك. 70 بوتەلكە! ارزان. دۇكەندەگى 3 بوتەلكەنىڭ ورىنا 10 شولمەك اراق الاسىز. ماسەلە ونىڭ باعاسىندا دا ەمەس، ماسەلە: 70 بوتەلكە اراق ءبىر اۋىلداعى قانشا ادامدى ۋلايتىندىعىندا. 5 ليتر پلاستيك قۇتىداعى اراعىڭىز 5 ليتر ۆيرۋسقا اينالىپ كەتۋى وپ-وڭاي نارسە ەكەن. ءسويتىپ، كوۆيدكە كوك يت قوسىلىپ، پاندەميا - تاندەمياعا اينالىپ كەتپەسە دەڭىز؟!

ولاي دەۋگە سەبەپ تە جوق ەمەس، قازىر ەندى پاندەميا قۇرباندارىنىڭ قاتارىنا پلاستيك ىدىستاعى اراقتان ۋلانىپ ولگەندەردىڭ سانى قوسىلدى. ءتىپتى، بىردەن كوبەيىپ بارادى. بۇنىڭ بارىنە سەبەپ: اراق كوۆيد ۆيرۋسىن ولتىرەدى ەكەن دەگەن جالعان اقپارات. ونسىز دا ازيادا اراق ىشۋدەن الدىنا جان سالماي تۇرعان قازاققا بۇل كادىمگىدەي جاقسى سىلتاۋ، جەلپىلدەگەن جەلەۋ. ونىڭ ۇستىنە كۇندىز-ءتۇنى قولتىعىڭا قىستىرىپ جۇرۋگە ءتيىس انتيسەپتيگىڭىز دە سول - سپيرت.

سوندىقتان دا قازىر قاي جاقتان قانشا سپيرت اكەلەمىن دەسەڭىز جول اشىق ءتارىزدى. مىناداي ۋاقىتتا انتيسەپتيك اكەلگەنگە جانىنان بەزگەن بىرەۋ بولماسا كىم قارسى تۇرادى؟! ءتاج-تاجالدىڭ دياگنوزىن ءدال تابۋدىڭ جولىن تاپپاي جۇرگەندە، انتيسەپتيك پەن ۋلى اراقتى شاتاستىرساق، سۇمدىقتىڭ كوكەسى سول بولاتىن شىعار؟ وندا 5 ليترلىك پلاستيكتەگى اراعىڭىز شىن مانىندە 5 ليتر ۆيرۋسقا اينالاتىنى انىق! ونىڭ ايىرماسىن قازىر كىمنەن سۇرايمىز؟ قويدان باسقا.

سەرىك جانبولاتتىڭ جازباسى

Abai.kz

3 پىكىر