قازاقستان پرەمەر-ءمينيسترى اسقار مامين كوروناۆيرۋس بويىنشا جاعدايى تۇراقتى جانە ىندەت ءورشىپ تۇرعان وڭىرلەردى اتادى.

ۇكىمەت باسشىسىنىڭ ايتۋىنشا، ەلدەگى سانيتاريالىق-ەپيدەميولوگيالىق جاعداي جاقسارىپ كەلە جاتىر.

«كوروناۆيرۋس ينفەكتسياسى تىركەلگەن جاعدايلاردىڭ تاۋلىكتىك ءوسىمى 1,2 پايىزدان اسپايدى. قازىرگى تاڭدا اۋرۋ جۇقتىرعاندىڭ 69,4 پايىزى جازىلدى. قالعان ناۋقاستار قاجەت مەديتسينالىق كومەك الىپ جاتىر. اۋرۋحانالاردىڭ جۇكتەمەسى 36 پايىزعا دەيىن تومەندەدى», - دەدى ول ۇكىمەت وتىرىسىندا.

سونداي-اق، پرەمەر-مينيستر دەنساۋلىق ساقتاۋ مينيسترلىگىنىڭ مالىمەتىنە سۇيەنىپ، اپتانىڭ قورىتىندىسى بويىنشا ينفەكتسيانىڭ رەپرودۋكتيۆ دەڭگەيى بىردەن تومەن وبلىستاردى اتادى.

«بۇل - اتىراۋ، اقتوبە، ماڭعىستاۋ، قىزىلوردا، شىعىس قازاقستان، جامبىل، تۇركىستان، پاۆلودار وبلىستارى جانە نۇر-سۇلتان، الماتى، شىمكەنت قالالارى. سونىمەن قاتار، ينفەكتسيانىڭ رەپرودۋكتيۆ دەڭگەيى بىردەن جوعارى وبلىستار بار. بۇل - قوستاناي، اقمولا وبلىستارى. مۇندا جاعداي كۇردەلى. وسىنداعى اكىمدەر ەپيدەمياعا قارسى شارالاردى كۇشەيتۋگە باسا نازار اۋدارۋ كەرەك»، - دەدى اسقار مامين.

Abai.kz