قازا تاپقان قىزدىڭ اناسى جاننا احمەتوۆا ينستاگرام پاراقشاسىندا داعىستاندىقتى قاماۋعا العانى ءۇشىن قازاقستان پرەزيدەنتى قاسىم-جومارت توقاەۆقا، رەسەي تەرگەۋ كوميتەتىنىڭ جەتەكشىسى الەكساندر باسترىكينگە العىسىن جەتكىزگەن.

ء"بىزدىڭ پرەزيدەنت الەمدە ءبارىن ساتىپ الۋعا بولمايتىنىن، جاۋاپتىلار جازاسىز كەتپەيتىنىن كورسەتتى! ەلدىڭ ءبىرىنشى باسشىسى قاراپايىم ادامداردىڭ وتىنىشىنە قۇلاق اسقانى ۇلكەن قۇرمەتكە لايىق! پرەزيدەنت، سىزگە راقمەت!" – دەپ جازدى.

21 جاستاعى مگيمو ستۋدەنتى 2018 جىلدىڭ كوكتەمىندە وقۋ ورنى عيماراتىنىڭ ءتورتىنشى قاباتىنان قۇلاپ كەتكەن. ول اۋرۋحاناعا ءتۇسىپ، بىراق 3 مامىردا كوز جۇمعان. سول كەزدە "ولىمگە دەيىن جەتكىزدى" دەگەن باپ بويىنشا قىلمىستىق ءىس قوزعالعان. جوعارى وقۋ ورنىنىڭ ءباسپاسوز قىزمەتى مۇنى جازاتايىم وقيعا دەپ مالىمدەگەن. بىراق كۋاگەردىڭ ءبىرى ونى تەرەزەدەن يتەرىپ جىبەرگەنىن ايتقان. ونىڭ ايتۋىنشا، تەرەزەدەن يتەرمەس بۇرىن، قىزدى ۇرعان.

مۋرتۋزالي مەدجيدوۆ مارقۇممەن بىرگە وقىعان. كەيبىر مالىمەتتەر بويىنشا، ەكەۋى كەزدەسىپ جۇرگەن. ونى 29 شىلدەدە ۇستادى. ازىرگە وعان ەشقانداي ايىپ تاعىلماعان.

قازاقستاننىڭ ادام قۇقىقتارى جونىندەگى ۋاكىلى رەسەيلىك ارىپتەسى تاتيانا موسكالكوۆاعا ءىستى جەكە باقىلاۋىنا الۋىن وتىنگەن.

Abai.kz