دۇيسەنبى, 21 ماۋسىم 2021
كۇبىرتكە 5810 16 پىكىر 30 شىلدە, 2020 ساعات 11:24

كوروناۆيرۋسپەن كۇرەس. اكادەميكتىڭ ءۇش ۇسىنىسى

1. ءبىز، 18 ميلليون حالقى بار قازاقستان رەسپۋبليكاسى، سovid-19 دەرتىنە شالدىققان ناۋقاستار سانى جاعىنان 1,4 ميلليارد حالقى بار قىتايدان وزىپ كەتتىك. بۇگىنگى تاڭدا، ەلىمىزدەگى بۇل قاۋىپتى دەرتكە شالدىققاندار سانى – 87 مىڭ ادامنان اسسا، قىتايدا بۇل كورسەتكىش – 83 مىڭدى قۇرادى. قازاق ەلى  covid-19 دەرتىنە شالدىققان ەلدەردىڭ الەمدىك رەيتينگىندە 213 ەلدىڭ ىشىندە 26 ورىنعا تۇراقتالدى. وسىعان قوسا، تمد ەلدەرى ىشىندە رەسەيدەن سوڭ 2-ءشى ورىنعا جوعارلادى. اتالعان اقپاراتتى سارالاي كەلىپ، ءبىزدىڭ قانشالىقتى ناشار دەڭگەيدە دەرتپەن كۇرەسكەنىمىزدى كورۋگە بولادى.

2. ەكى الىپ دەرجاۆا – اقش پەن رەسەي بۇل دەرتكە ۆاكتسينا جاساۋدان جارىسۋدا. الايدا، باسقا مەملەكەتتەر دە بۇل ىندەتكە ۆاكتسينا تابۋ ماقساتىندا ايانباي تەر توگۋدە.

رەسەي الەمدە 1-ءشى بولىپ 1957ج. كوسموسكا جەردىڭ جاساندى سەرىگىن (سپۋتنيك) ۇشىرسا، يۋري گاگارين كوسموستى باعىندىرعان الەمدەگى تۇڭعىش كوسموناۆت بولدى. ال ەندى رەسەي عالىمدارى مەديتسينا سالاسىندا جەر جۇزىندە 1-ءشى بولىپ سovid-19-عا قارسى ۆاكتسينا شىعارىپ جاتىر! ادامدارعا جاسالعان زەرتتەۋ جۇمىستارى وڭ ناتيجەسىن كورسەتىپ كەلەدى. اتالعان ۆاكتسينا تولىقتاي زەرتەۋ جۇمىستارىن ءوتىپ، وندىرىسكە ەنگەننەن كەيىن، الەم بويىنشا جوعارى سۇرانىسقا يە بولادى. ءبىز ادەتتەگىدەي كوشتىڭ سوڭىندا قالىپ قويماۋ ءۇشىن بۇگىننەن باستاپ ۆاكتسينانى ساتىپ الۋعا فورۆاردتى (الدىن الا شارت) كەلىسىم جاساۋ ارقىلى رەسەيمەن شارتقا وتىرۋىمىز كەرەك. سوندا ۆاكتسينانى بىرنەشە ەسە ارزانعا الىپ، العاشقىلاردىڭ ءبىرى بولىپ حالقىمىزدى ەمدەۋگە كىرىسەمىز.

3. كۇندىزگى ۋاقىتتا حالىق سانى كوشەلەردە اسا قاتتى بايقالمايدى. الايدا، كەشكى ۋاقىتتا حالىقتىڭ بۇل ىندەتتى جۇقتىرۋعا كوپتەگەن سەبەپتەرى بولادى، مىسالى: ادامدار جۇمىستان كەلگەندە سەرۋەندەۋگە شىعادى; قوس-قوس توپ بولىپ كوڭىل كوتەرەدى; تۇنگى كلۋبتار جانە باسقا دا كوڭىل كوتەرەتىن ورىندار جاسىرىن جۇمىس جاسايدى جانە ت.ب. سول سەبەپتى، تەز ارادا، كەشكى ساعات 21-00-دەن باستاپ دالادا بارلىق ءجۇرىستى توقتاتىپ، كومەندانتتىق ساعات ورناتۋ قاجەت.

جالپى اتالعان بارلىق ۇسىنىستار الەمدىك تاجىريبەگە سايكەس سارالانىپ، ءاربىر ۇسىنىس ءبىزدىڭ ۇلتتىق مەنتاليتەتكە ساي پريزماسىنان زەرتتەلدى.

قۇرمەتپەن،

ورازالى سابدەن,

اكادەميك.

Abai.kz

16 پىكىر