جۇما, 29 ناۋرىز 2024
ءبىزدىڭ شەنەۋنىك 10096 17 پىكىر 29 شىلدە, 2020 ساعات 17:31

بوجكو كىمگە بۇلقان-تالقان بولىپ ءجۇر؟

بۇعان دەيىن الەۋمەتتىك جەلىدە «دەپۋتاتتار چارتەرلىك ساپارمەن تۇركيا مەن بىرىككەن اراب امىرلىكتەرىنە ۇشىپ كەتتى» دەگەن سىبىس تاراعان. وسىعان وراي، بەلگىلى زاڭگەر باقىتجان تورەعوجينا دەمالىستا جۇرگەن دەپۋتاتتاردىڭ كارانتيندە نە ىستەپ جۇرگەندەرىن سۇراپتى.

قۇقىق قورعاۋشى الەۋمەتتىك جەلى پاراقشاسىندا قازاقستان حالقى اسسامبلەياسىنىڭ اتىنان سايلانعان 9 دەپۋتاتقا حابارلاسقانىن جازدى. ولاردىڭ كەيبىرى جاۋاپ بەرمەگەن، كەيبىرى ۇيدە وتىرعاندارىن ايتقان.

ال، 71 جاستاعى زەينەتكەر دەپۋتات ۆلاديمير بوجكو تورەعوجينا حانىمعا «مەنى سايلاعان سەندەر ەمەس. ماعان داۋىس بەرگەن جوقسىز، سايكەسىنشە سايلاۋشىم ەمەسسىز. جۇمىس بەرۋشىم دە ءسىز ەمەس»، - دەپ بۇلقان-تالقان بولىپتى. جەلىدەگى جۇرتتىڭ اشۋىن تۋدىرعان دا زەينەتكەر دەپۋتاتتىڭ وسى سوزدەرى بولدى. بوجكونىڭ بۇل دەگەندەرىن ءبىز عانا ەمەس، باتىلى جەتكەننىڭ ءبارى جازدى.

No description available.

(بۇل پىكىردى دەپۋتات بوجكونىڭ دا، باقىتجان تورەعوجينانىڭ دا پاراقشالارىنان ىزدەپ تابا المادىق. سوعان قاراعاندا دەپۋتاتتىڭ بۇل پىكىرى جەلىلەردەن وشىرىلگەن بولۋى دا كەرەك. )

OINET.KZ اقپاراتى:

ەۋرازيا ارناسىنىڭ اقپاراتى:

سونىمەن، بۇل قاي بوجكو؟ ءوزىن سايلاماعاندارمەن سويلەسپەيتىن ول «ەسەپ بەرۋگە مىندەتتى ەمەسپىن» دەپ كەرگيتىندەي وسىعان دەيىن نە تىندىرىپ ەدى؟ بۇرىنعى مينيستر، قازىرگى دەپۋتات ۆلاديمير كارپۇلىنىڭ بۇعان دەيىنگى ايتقان، ايتىپ قويماي اقپاراتتى شۋلاتقان ەرسىلى-قارسىلى ەكى-ءۇش ءسوزىن ەسكە ءتۇسىرىپ كوردىك.

قىزىلاعاش وقيعاسى

ول 2007-2014 جىلدارى قازاقستاننىڭ توتەنشە جاعدايلار ءمينيسترى بولدى. ال، 2010 جىلى، ناۋرىزدىڭ 11-ىنەن 12-سىنە قاراعان ءتۇنى الماتى وبلىسىنداعى قىزىلاعاش سۋ قويماسىندا بوگەت جارىلىپ، قىزىلاعاش اۋىلىن سۋ باستى. قايعىلى وقيعادان 150 ادام ءىزىم-قايىم جوعالعان. الايدا، رەسمي مالىمەت 37 ادامنىڭ قازا بولعانىن ايتتى. تۇرعىندار الدىن الۋعا بولاتىن اپاتتان ءبىزدى ەشكىم حاباردار ەتپەدى دەپ شاعىمداندى. بىراق، بوجكو «تابيعاتتىڭ تىلسىم كۇشىنە ەشكىم دە قارسى تۇرا المايدى»،- دەگەنىنەن تانبادى.

ال، اقوردادا وتكەن جيىندا قىزىلاعاش وقيعاسى قىلمىس دەپ تانىلدى. ناتيجەسىندە، ايماق دەڭگەيىندەگى بىرنەشە باسشىلار جازالانعانىمەن، سول كەزدەگى توتەنشە جاعدايعا تىكەلەي جاۋاپتى ۆلاديمير بوجكو ەشقانداي جاۋاپكەرشىلىك ارقالامادى.

كوكپەكتىدە بولعان اپات

قىزىلاعاش وقيعاسىنان كەيىن ءتورت جىل وتكەندە 2014 جىلدىڭ 31 ناۋرىزىندا تاعى دا سۋ قويماسىنىڭ بوگەتى بۇزىلدى. قاراعاندى وبلىسىنىڭ كوكپەكتى اۋىلىنداعى 300-دەي باسپانا تاسقىن سۋدىڭ استىندا قالدى. 5 ادام قازا تاۋىپ، 12 ادام اۋرۋحاناعا تۇسكەن.

اقىرى توتەنشە جاعدايدى قارىق قىلماعان بوجكو قىزمەتىنەن الىنىپ، اقىرىن بارىپ ءماجىلىس كرەسلوسىنا جايعاسقان. الايدا باكەڭ مۇندا دا جارىتىپ ءىس تىندىرا قويمادى. ونىڭ ورا-شولاق ايتقان كەي سوزدەرى قوعامنىڭ قارسىلىعىن تۋدىردى. جانە ءبىر ەمەس، بىرنەشە مارتە.

اۋىلدان قالاعا اعىلعان جۇرت كوشىن توقتاتۋ كەرەك, - دەدى. 

«توز-توزى شىققان اۋىلدان قالاعا قاشىپ كەلىپ، مۇندا لايىقتى دەڭگەيدە جاعداي جاساي الماعان، نارازى جاستار – قازاقستاننىڭ تىنىشتىعىنا قاۋىپ كەلتىرەدى» - دەدى بوجكو. ءسويتتى دە استاناداعى «ابۋ-دابي پلازادا» بولعان قازاق-ءۇندى جۇمىسشىلارىنىڭ اراسىنداعى قاقتىعىسقا قازاق جاستارىن كىنالاپ سويلەدى.

حالىق تىزەرلەپ تۇرىپ، مەملەكەتكە العىس ايتۋى كەرەك, - دەدى.

وتكەن جىلدىڭ قىركۇيەك ايىندا قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىندا ءسوز العان ول «حالىق مەملەكەتكە تىزەرلەپ تۇرىپ العىس ايتۋى كەرەك» ەكەنىن ايتتى.

«ءسىز بيلىكتىڭ نە ىستەپ جاتقانىن ءتۇسىنىپ، كوزبەن كورۋلەرىڭىز كەرەك. دالەل كەرەك پە، ءبىر عانا كورسەتكىش بويىنشا – حالىقتىڭ الەۋمەتتىك قولداۋى ءۇش جىلدا 17 ەسەگە ءوستى. كەشىرىڭىز، بىراق سول ءۇشىن تىزە بۇگىپ، مەملەكەتكە العىس ايتۋ كەرەك. ەگەردە ادام ەشتەڭە بىتىرمەسە، وزىنە ءبارىن بەرۋىن تالاپ ەتسە، مۇنداي ادامدى توقتاتاتىن، قوراعا تىعاتىن قوعامدىق پىكىر بولۋى كەرەك»،- دەدى ول.

ۋكراينالىق ساياساتكەر يرينا فاريون - «جەزوكشە», - دەدى

ودان بولەك، دەپۋتات بوجكو ۋكراينالىق ساياساتكەر يرينا فاريوننىڭ ورىس تىلىنە قاتىستى كوزقاراسى ءۇشىن بەيادەپ سوزدەر ايتىپ، قوعام قايراتكەرىن «جەزوكشە» دەپ اتادى. بوجكونىڭ بۇل سوزىنە قاتىستى ۋكراينانىڭ قازاقستانداعى ەلشىلىگىنىڭ وكىلى يرينا ۆلاديميروۆنا Abai.kz تىلشىلەرىنە سۇحبات بەرىپ، «بوجكو مۇنداي ايىپتاۋلار ارقىلى – «ورىس الەمىن» جاقتاۋشىلاردىڭ ءبىرى ەكەنىن كورسەتتى»، - دەگەن ەدى.

بوجكونىڭ وسىنداي ويسىز سوزدەرىنەن سوڭ قوعام بەلسەندىلەرى ونى الەۋمەتتىك ارازدىقتى قوزدىردى دەپ ايىپتاپ، دەپۋتاتتىق وكىلەتىن توقتاتۋدى تالاپ ەتتى.

الايدا، بوجكو قانشا ايىپتاۋلارعا قاراماستان ءالى دە ءماجىلىس توراعاسىنىڭ ورىنباسارى بولىپ وتىر. ءتىپتى بىرنەشە وردەن-مەدالداردىڭ يەگەرى. ماسەلەن، ول وتان الدىنداعى ەرەكشە ەڭبەگى ءۇشىن ءى دارەجەلى «بارىس» وردەنىمەن، ءىى دارەجەلى «ايبىن» وردەندەرىمەن ماراپاتتالىپتى. ودان بولەك قازاقستان رەسپۋبليكاسى مەن شەت ەلدەردىڭ جانە كسرو-نىڭ 43 مەدالىن العان كورىنەدى.

ءتىپتى، زاڭ عىلىمدارىنىڭ كانديداتى، دوتسەنت، بىرنەشە مونوگرافيانىڭ، 14 وقۋ-ادىستەمەلىك جانە پراكتيكالىق قۇرالدارىنىڭ، 33 ماقالانىڭ اۆتورى ەكەنى ايتىلادى.

ءتۇيىن: اۋزىنان اق يت كىرىپ، كوك يت شىعىپ جۇرگەن بوجكو قازاقستاننىڭ توتەنشە جاعدايلار مينيسترلىگىن باسقارىپ تۇرعان تۇستا، مەملەكەتتىك ءتىلدى مەنسىنبەيتىنىن، قازاق تىلىنە قىرىن قارايتىنىن اشىق ايتقان ەدى. ەندى قىزا كەلە مەملەكەتتىك ءتىلدى عانا ەمەس، مەملەكەت حالقىن دا مەنسىنبەيتىنىن اشىق ايتىپ وتىر. ەندەشە نە حالىقتى، نە حالىقتىڭ ءتىلىن سىيلامايتىن بوجكونى مەملەكەتتىك قىزمەتتەن قۋاتىن كەز كەلگەن سەكىلدى.

نۇربيكە بەكسۇلتانقىزى

Abai.kz

17 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3553