بەيسەنبى, 28 ناۋرىز 2024
بيلىك 5672 10 پىكىر 20 شىلدە, 2020 ساعات 16:30

اۋىس-ءتۇيىس. ۇكىمەت وتستاۆكاعا كەتە مە؟

قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ قىزمەتىنەن بوساتىلدى. بۇل تۋرالى اقوردانىڭ رەسمي سايتىندا حابارلاندى.

«مەملەكەت باسشىسىنىڭ جارلىعىمەن اسقار قۋانىشۇلى جۇماعاليەۆ قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى قىزمەتىنەن بوساتىلدى»، - دەلىنگەن حابارلامادا.

اسقار جۇماعاليەۆتىڭ مينيستر قىزمەتىنەن كەتۋى ەل كۇتپەگەن توسىن وقيعا ەمەس. وتكەن ايدىڭ سوڭىندا مەملەكەت باسشىسى قاسىم-جومارت توقاەۆ وزدەرىنە جۇكتەلگەن مىندەتتەردى شالا ورىنداعان ءبىراز شەنەۋنىكتەردىڭ جۇمىسىن سىناعان بولاتىن. سوندا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ ەسكەرتۋ العان.

پرەزيدەنت جاۋاپتى شەندىلەر كوروناۆيرۋس ىندەتىنىڭ تارالۋىنا قارسى شارالاردى ءتيىمدى جۇرگىزبەدى دەپ سىنعا العان.

ال وسىدان 10 كۇن بۇرىن پرەزيدەنت ۇكىمەتتىڭ كەڭەيتىلگەن وتىرىسىن وتكىزگەن. سول كەزدە ۇكىمەتكە 2 اپتا ۋاقىت بەرىپ، ەكى اپتادا جاعداي وڭالمايتىن بولسا، ۇكىمەت قۇرامىن اۋىستىرۋى مۇمكىن ەكەنىن ەسكەرتكەن.

«قالىپتاسقان احۋال ەكى اپتادان كەيىن جاقسارادى دەپ ۇمىتتەنەمىن. ولاي بولماعان جاعدايدا، جالپى ۇكىمەتتىڭ وسى قۇرامدا جۇمىس ىستەۋ مۇمكىندىگى تۋرالى ماسەلە تۋىندايدى», - دەگەن ەدى توقاەۆ.

سودان بەرى 10 كۇندەي ۋاقىت ءوتتى. ۇكىمەتتەگىلەردەن العاش بولىپ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى قىزمەتىنەن كەتىپ وتىر. بۇعان دەيىن پرەزيدەنتتىڭ ەكونوميكالىق ماسەلەلەر بويىنشا شتاتتان تىس كەڭەسشىسى ولجاس قۇدايبەرگەنوۆ قىزمەتىنەن بوساتىلعان بولاتىن.

ەل اراسىنداعى ەندىگى سۇراق: مەملەكەت باسشىسى ايتقانداي، ۇكىمەتتىڭ قازىرگى قۇرامىن وزگەرتۋ جۇمىسى باستالىپ كەتتى. ەل اراسىندا اسقان مامين باستاعان قازىرگى ۇكىمەت وتستاۆكاعا كەتۋىن تالاپ ەتۋشىلەر كوپ. كوروناۆيرۋستىڭ كەڭ ەتەك الىپ كەتۋىنە سىلبىر جۇمىسى سەبەپ بولعانى ءسوزسىز.

كارانتين جاريالانىپ، قاشىقتان ونلاين جۇمىس ىستەۋ، ءبىلىم الۋ، الەۋمەتتىك كومەككە ءونىنىش بەرۋ قاجەتتىلىگى تۋىنداعاندا، ەلدەگى تسيفرلاندىرۋ جۇمىسىنىڭ تىم ناتيجەسىز ەكەنى كورىنىپ قالدى. مۇنىڭ ىندەتپەن كۇرەسكە ايتارلىقتاي كەدەرگى كەلتىرگەنى ءسوزسىز. سول ءۇشىن دە العاش بولىپ، اتالعان مينيسترلىكتىڭ باسشىسى قىزمەتىنەن كەتىپ وتىر.

ەگەر جاعداي جاقسارماسا، جىلى كرەسلوسىمەن قوشتاساتىن مينيستر جالعىز جۇماعاليەۆ بولمايتىن شىعار. مينيسترلەر عانا ەمەس، مەملەكەت باسشىسى اتىن اتاپ سىناعان بىرنەشە اكىمنىڭ دە جۇمىسى سىن كوتەرمەيدى. ءتىپتى ۇكىمەت تولىقتاي وتستاۆكاعا كەتۋى دە مۇمكىن.

Abai.kz

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3532