جەكسەنبى, 22 مامىر 2022
قوعام 16688 64 پىكىر 16 شىلدە, 2020 ساعات 16:11

«حاننىڭ قىزىسىز با، گۇلشارا اپاي؟»

ءبىزدىڭ ەلدە اكىم-قارالار ءىس-ساپارعا شىقسا، ولار وتەتىن جولدى جاۋىپ، حالىقتىڭ ءجۇرىپ-تۇرۋىنا كەدەرگى جاسايتىن كونە ءداستۇر بار. ورتا عاسىرداعى امىرشىلەرگە عانا ءتان مۇنداي ادەتتەن ارىلۋ كەرەك ەكەنى قانشا ايتىلسا دا، قازاق شەندىلەرى قۇلاق اسار ەمەس. اكىم مەن حالىق ءبىر جولدا قاتار جۇرۋگە بولمايدى دەگەن جازىلماعان زاڭنان قاشان قۇتىلارىمىز ءالى بەلگىسىز.

قىزىلودا وبلىسىنىڭ اكىمى گۇلشارا ابدىقالىقوۆا حانىم دا وسىنداي داۋعا قالىپتى. بۇگىن الەۋمەتتىك جەلىدە قىزىلوردا وبلىسى، جاڭاقورعان اۋدانىندا تۇسىرىلگەن بەينەجازبا تارادى. ونى جەلىگە ساندۋعاش تۇرلىبەكوۆا اتتى كىسى جۇكتەگەن ەكەن. بەينەجازباداعى ديالوگتان ۇققانىمىز، وبلىس اكىمى جاڭاقورعان اۋدانىنداعى ەمحانانى تەكسەرۋگە كەلگەن. اكىم كەلەدى دەپ الاشاپقىن بولعان ايماق باسشىلارى ەمحانا ماڭىنداعى جولدى جاۋىپ تاستاعان كورىنەدى.

قوعامدىق كولىكپەن ەمحاناعا كەلە جاتقان جەرگىلىكتى تۇرعىن بۇعان نارازىلىق تانىتىپ ۆيدەوعا تۇسىرە باستاعان. ۆيدەو اۆتورىنىڭ ايتۋىنشا، قوعامدىق كولىكتى ورتا جولدا توقتاتىپ، ەمحانا ماڭىنا جىبەرمەگەن. جولاۋشى كولىكتەن ءتۇسىپ، ەمحاناعا دەيىن جاياۋ جەتكەن. وسىعان اشىنعان ايەل وبلىس اكىمىن كۇتىپ تۇرىپ، وكپەسىن ايتتى.

اكىم مەن تۇرعىن اراسىنداعى ديالوگ:

- سالەمەتسىز بە، اپاي! ءسىز بە قىزىلوردا وبلىسىنىڭ اكىمى؟

- ءيا، ءيا...

- ءسىز كەلە جاتىرمىن دەپ جولدىڭ ءبارىن جاپتىردىڭىز با؟

- جوق...

- ءبىز وسىندا كەلە جاتىر ەدىك، مارشرۋتتى توقاتىپ، ءبىزدى ءتۇسىرىپ تاستادى، بەرى قاراي جاياۋ كەلدىك ەمحاناعا.

- جوق، جولدى جاپقان جوقپىز، جولدى اشىڭدار... (اكىم وسىنى ايتىپ ماشيناسىنا بەتتەدى)

- ءسىز حاننىڭ قىزىسىز با جولدى جاپتىراتىن؟!

- جولدى مەن جاپتىرعان جوقپىن، اشىڭدار!

وسىدان كەيىن اكىم كولىگىنە وتىرىپ كەتىپ قالدى. ال ۆيدەو اۆتورى «حالىقپەن بىرگە ەمەسسىزدەر»، «حالىقتىڭ اراسىندا جۇرمەگەن سوڭ نەسى اكىم» دەپ نارازىلىعىن ءبىلدىرىپ جاتتى...

اكىمنىڭ جاۋابى: بارىنە كىنالى ۋچاسكەلىك پوليتسەي!

وسىدان كەيىن وبلىس اكىمى گۇلشارا ناۋشاقىزىنىڭ ساندۋعاش تۇرلىبەكوۆاعا بەرگەن جاۋابىنىڭ ۆيدەوسى جاريالاندى.

«مەن جاڭاقورعان، شيەلى اۋداندارىندا اۋرۋحانالاردى ارالاپ، بىرىنشىدەن، ءدارى-دارمەكپەن قامتاماسىز ەتۋ ماسەلەلەرى، ەكىنشىدەن، اۋرۋحانالارداعى جاسالىپ جاتقان جاعداي، ۇشىنشىدەن، قازىرگى وتتەگىمەن قامتاماسىز ەتۋ ماسەلەلەرىن قاراپ جاتىرمىن.

وسىنداي ءىس-ساپار كەزىندە جاڭاقورعان اۋدانىنىڭ ينفەكتسيالىق اۋرۋحاناسىنىڭ قاسىندا تۇرعان مەنىڭ ماشيناما تۇرلىبەكوۆ ساندۋعاش دەگەن ايەل كەلىپ، جولدى جابىلعانىن ايتتى. بۇل ىڭعايسىزدىق تۋدىرعانىن ايتىپ وتىر.

مەن ەشقانداي جولدى جابۋ تۋرالى تاپسىرما بەرگەن جوقپىن. اۋدان اكىمى دە ەشقانداي جولدى جابۋ تۋرالى تاپسىرما بەرگەن جوق. سول جەردەگى ىشكى ىستەر ءبولىمىنىڭ باسشىسى دا ايتىپ وتىر، «ونداي تاپسىرما بەرىلگەن جوق» دەپ. سول جەردەگى ۋچاسكەلىك پوليتسيانىڭ شەشىمى بولسا، ونىڭ ءىس-ارەكەتى جونىندە مەن وبلىستىق دەپارتامەنت باسشىسى سۇلتان بەكتورەگە تاپسىرما بەردىم. بۇل ءىس-ارەكەتتىڭ قانشالىقتى دۇرىستىعىن، قانداي، ول جاعىنان كەمشىلىك جىبەرگەنى تۋرالى قىزمەتتىك قاراۋ بولادى»، - دەپتى وبلىس اكىمى.

;feature=youtu.be

ءبىز گۇلشارا ابدىقالىقوۆا حانىمنىڭ ايتقان سوزدەرىن قاز-قالپىندا قاعازعا تۇسىردىك. اكىمنىڭ جاۋابىنان ۇققانىمىز - بارلىعىنا كىنالى ۋچاسكەلىك پوليتسيا-مىس. ءسىز وسىعان سەنەسىز بە؟

Abai.kz

64 پىكىر