سەنبى, 15 تامىز 2020
COVID-19 قازاقستاندا. جۇقتىرعاندار — 102287. جازىلعاندار — 80716. قايتىس بولعاندار — 1269
كوروناۆيرۋس 1259 9 پىكىر 10 شىلدە, 2020 ساعات 14:39

كوروناۆيرۋسپەن كۇرەسكە قانشا قاراجات ءبولىندى؟

كوروناۆيرۋسپەن كۇرەسكە تاعى 150 ميلليارد تەڭگە بولىنەدى. بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ مالىمدەدى. 

«ۇكىمەت پەن وڭىرلەر پاندەميامەن كۇرەستە شۇعىل ماسەلەلەردى شەشۋ ءۇشىن 150 ميلليارد تەڭگە بولەدى. نەگىزگى مىندەت - كوروناۆيرۋستىڭ تارالۋىن توقتاتۋ جانە ناۋقاستاردى ەمدەۋدە ايتارلىقتاي ناتيجەگە قول جەتكىزۋ», - دەدى پرەزيدەنت.

ءبارىمىز بىلەتىندەي، بۇل - كوروناۆيرۋسپەن كۇرەسكە بولىنگەن العاشقى قارجى ەمەس. بىراق ەلدە ىندەتتىڭ بەتى قايتقان جوق. قايتا كۇن سايىن ءورشىپ بارا جاتقانداي. تاۋلىگىنە مىڭنان اسا ادام ۆيرۋس جۇقتىرىپ جاتىر.

ەڭ وكىنىشتىسى وسىنداي قيىن-قىستاۋ كۇندە دە سىبايلاس جەمقورلىق تولاستاماي تۇر. كوروناۆيرۋسپەن كۇرەسكە بولىنگەن قارجىنى جىمقىرعان جەمقورلار مەن دارىگەرلەرگە تولەنەتىن قوسىمشا وتەماقىنى قالتاعا باسقان باسشىلار جايلى اقپارات جەتەرلىك. ۆيرۋسپەن كۇرەسكە بيۋدجەتتەن مول قارجى بولىنسە دە، ىندەتتىڭ جويىلماۋىنا وسى جەمقورلىق تا قاتتى اسەر ەتىپ تۇرعان سەكىلدى.

ەندى كوكتەمنەن بەرى كوروناۆيرۋسپەن كۇرەسكە قانشا قارجى بولىنگەنىن ەسەپتەپ كورەيىك. مامىر ايىندا كوروناۆيرۋسقا قارسى كۇرەسكە قازاقستان 6 ترلن تەڭگەگە جۋىق قاراجات جۇمسادى دەگەن اقپارات تارادى. بۇل شامامەن 13 ميلليارد دوللار نەمەسە ۇلتتىق ءجىو-ءنىڭ 8 پايىزى. بىراق مۇنشا مول قارجىنىڭ ەسەبىن ەشكىم بەرگەن جوق. قاشان ءبولىندى، قايدا جۇمسالدى، ناتيجەسى قانداي؟ بۇل سۇراقتار سول بەتى جاۋاپسىز قالدى...

دەنساۋلىق ساقتاۋ ءمينيسترى الەكسەي تسوي 7 شىلدەدە كوروناۆيرۋسپەن كۇرەسكە ۇكىمەت رەزەرۆى مەن رەسپۋبليكالىق بدجەتتەن قانشا قاراجات بولىنگەنىن جانە ول قاراجاتتىڭ قايدا جۇمسالعانىن ايتىپ، ەسەپ بەرگەن بولدى.

ونىڭ ايتۋىنشا، پاندەميا كەزىندە كوروناۆيرۋس ينفەكتسياسىمەن كۇرەس ءۇشىن، ونىڭ پايدا بولۋى مەن ىندەتتىڭ بەتىن قايتارۋ ءۇشىن 114 ميلليارد 826 ميلليون تەڭگە بولىنگەن. مۇنىڭ 40 ميلليارد 58 ميلليون تەڭگەسى ۇكىمەت رەزەرۆىنەن، ال 74 ميللياردى رەسپبليكالىق بيۋدجەتتەن بولىنگەن.

دەنساۋلىق ساقتاۋ ءمينيسترى تسوي 114 ميللياردتىڭ ەسەبىن تۇگەندەپ بەرگەنىمەن، ءسوزى قارجى مينيسترلىگىنىڭ ەسەبىمەن بىردەي شىقپاي قالدى. قارجى ءمينيسترىنىڭ ءبىرىنشى ورىنباسارى بەرىك شولپانقۇلوۆتىڭ ايتۋىنشا، ەلىمىزدە كوروناۆيرۋسپەن كۇرەسكە 191 ملرد تەڭگەدەن استام قارجى بولىنگەن.

«بۇگىنگى كۇنگە كوروناۆيرۋسپەن كۇرەسكە رەسپۋبليكالىق بيۋدجەتتەن 191,9 ملرد تەڭگە ءبولىنىپ وتىر. ونىڭ 125 ملرد تەڭگەسى بيۋدجەتتى ناقتىلاۋ اياسىندا، 66,9 ملرد تەڭگەسى ۇكىمەت رەزەرۆىنەن بولىنگەن. قاراجات ماقساتتى باعىتتارعا جۇمسالادى.  بۇدان باسقا، قر دەنساۋلىق ساقتاۋ مينيسترلىگى تاراپىنان مەديتسينالىق قىزمەتتەر ساپاسىن باقىلاۋ كوميتەتى ارقىلى دا كورسەتىلەتىن مەديتسينالىق قىزمەتتەرگە باقىلاۋ جۇرگىزىلىپ، قاداعالانادى», – دەيدى شولپانقۇلوۆ.

قارجى مينيسترلىگىنىڭ ەسەبى اقپارات قۇرالدارىندا 8 شىلدە كۇنى جاريالاندى. الەكسەي تسويدان ءبىر كۇن كەيىن. ەندەشە ەكى مينيسترلىك ەكى كۇننىڭ ىشىندە ەكى ءتۇرلى ەسەپ سوعىپ وتىرعانى قالاي؟ كىم وتىرىك ايتىپ وتىر؟ الدە ءبىز دۇرىس تۇسىنبەدىك پە؟

Abai.kz

9 پىكىر