قازاقستاندا 5 شىلدەدەن باستاپ ەكى اپتالىق كارانتين رەجيمى ەنگىزىلدى. وسىعان وراي، بىرنەشە نىساننىڭ قىزمەتىنە شەكتەۋلەر قويىلعان بولاتىن. 

ولاردىڭ قاتارىندا: سۇلۋلىق سالوندارى، شاشتاراز، سپورت زالدارى، فيتنەس ورتالىقتار، باسسەيندەر، ازىق-تۇلىك جانە ازىق-تۇلىكتىك ەمەس جابىق بازارلار، جاعاجايلار، اكۆاپاركتەر، مادەنيەت نىساندارى، مۋزەيلەر، كورمەلەر، فورۋمدار، كونفەرەنتسيالار جانە وزگە دە ۇيىمداستىرىلعان بۇقارالىق ءىس-شارالار، ويىن-ساۋىق ورتالىقتارى، مەكتەپكە دەيىنگى بالالار مەكەمەلەرى (كەزەكشى توپتاردان باسقا), ءدىني نىساندار جانە ت. ب. (سوسو-داعى ويىن-ساۋىق ورتالىقتارى، ويىن-ساۋىق نىساندارى (كاراوكە، بيليارد، كومپيۋتەر كلۋبتارى، بوۋلينگ ورتالىقتارى), كينوتەاترلار، بالالاردى ساۋىقتىرۋ لاگەرلەرى، فۋدكورتتار، بانكەت زالدارى) بار.

مۇنداي شەكتەۋلەر ازاماتتاردىڭ جۇمىسسىز قالۋىنا سەبەپ بولۋدا. ال، قر پرەمەر-ءمينيسترىنىڭ ورىنباسارى ەرالى توعجانوۆ مۇنداي شەكتەۋ شارالارىنا تۇسىنىستىكپەن قاراۋدى سۇراپ، ودان شىعۋدىڭ ءۇش جولىن اتاپتى.

«بىرىنشىدەن، بىزدە بىرنەشە فورما بار. بارلىعىن بىردەن جابۋ قاجەت ەمەس. قاشىقتان جۇمىس ىستەۋگە ارنالعان سحەما بار. ەشكىم تىيىم سالمايدى. جۇمىس بەرۋشىلەر قىزمەتكەرلەردى قاشىقتان جۇمىس ىستەۋ فورماتىندا كوشىرە الادى.

ەكىنشىدەن, زاڭعا سايكەس جۇمىس بەرۋشىلەر وسى كەزەڭدە قوسىمشا كومەك كورسەتە الادى.

ۇشىنشىدەن, جۇمىسپەن قامتۋ ورتالىقتارى بار. جۇمىسسىز قالعان ادامدار سول جەرلەرگە جۇگىنە الادى. ءبىز بۇل باعىتتا بىرلەسە جۇمىس جاساۋىمىز كەرەك. مەرزىمى - ەكى اپتا. وتىنەمىن، شىداي تۇرىڭىزدار»، - دەپتى ۆيتسە-پرەمەر توعجانوۆ.

ايتا كەتەيىك، بۇعان دەيىن كارانتين مەرزىمىندە جۇمىسسىز قالعان ازاماتتارعا قوسىمشا الەۋمەتتىك تولەم بەرۋ ماسەلەسى دە كوتەرىلگەن بولاتىن. توعجانوۆ ازىرگە الەۋمەتتىك تولەم جاساۋعا زاڭنامالىق نەگىز جوق ەكەنىن ايتقان.

«بۇل - توتەنشە جاعدايمەن تىكەلەي بايلانىستى. ارى قاراي توتەنشە جاعداي توقتاتىلعاننان كەيىن، وعان ەشقانداي زاڭنامالىق نەگىزدەمە جوق. سوندىقتان ازاماتتار مۇمكىندىگىنشە قىزمەت ورىندارىندا جۇمىستارىن جالعاستىرۋى ءتيىس»، - دەگەن ەدى توعجانوۆ.

Abai.kz