سەنبى, 24 قازان 2020
COVID-19 قازاقستاندا. جۇقتىرعاندار — 110086. جازىلعاندار — 105493. قايتىس بولعاندار — 1796
بۇ نە مازاق؟ 8178 24 پىكىر 6 شىلدە, 2020 ساعات 18:12

وتپەن ويناماڭىز، كولگىنوۆ مىرزا!

بۇگىن نۇر-سۇلتاندا ەلوردا كۇنىنە مەرەكەلىك وتشاشۋ وتەدى ەكەن. بۇل اقپاراتتى ەلوردا اكىمدىگى تاراتىپ وتىر. مەرەكەلىك وتشاشۋ بۇگىن ساعات 23:00-دە ونلاين كورسەتىلمەك.

- بۇگىن نۇر-سۇلتاندا ەلوردا كۇنىنە مەرەكەلىك وتشاشۋ وتەدى. تىكەلەي ەفير ساعات 23:00-دە حابار24 تەلەارناسىندا كورسەتىلەدى. وتشاشۋ ەسىل وزەنىنىڭ (ورتالىق ساياباق) جاعالاۋىندا، بوتانيكالىق باق (قابانباي باتىر داڭعىلى جاعىنان) جانە پۋشكين – ابىلايحان كوشەلەرىنىڭ قيىلىسىندا باستالادى.

وتشاشۋعا بيۋدجەتتەن اقشا بولىنبەگەن – شارا دەمەۋشى قاراجاتى ەسەبىنەن ۇيىمداستىرىلادى.

تۇرعىندار سانيتاريا نورمالارىن قاتاڭ ساقتاۋى كەرەك: ماسكا تاعىپ، الەۋمەتتىك قاشىقتىق ساقتاۋى جانە انتيسەپتيك قولدانۋى ءتيىس، - دەپ جازدى اكىمدىك رەسمي سايتىندا.

قازىر قازاقستاندا 48574 ادام كوروناۆيرۋسپەن اۋىرىپ جاتىر. قايتىس بولعاندار سانى 200-دەن اسىپ كەتتى.

كەشە، 5 شىلدەدە ەلىمىزدە 1403 ادامنان كوروناۆيرۋس تابىلدى. بۇل تۋرالى بۇگىن دەنساۋلىق ساقتاۋ مينيسترلىگى حابارلادى. نۇر-سۇلتان قالاسىندا وتكەن تاۋلىكتە كوروناۆيرۋس جۇقتىرعان 95 ادام انىقتالىپ، قالاداعى ىندەت جۇقتىرعاندار سانى 5889-عا جەتتى. 61 ادام كوز جۇمدى.

ەلىمىز اۋماعىندا كوروناۆيرۋستىڭ ءورشىپ تۇرعانى وسىدان-اق بەلگىلى. پنەۆمونيادان قايتىس بولعاندار قانشاما؟ مەملەكەت باسشىسىنىڭ تاپسىرماسىمەن ەل ۇكىمەتى تاعى دا كارانتيندىك شارالار ەنگىزدى. وسىنداي قيىن كەزەڭدە قالا كۇنىن تويلاۋ نە ءۇشىن كەرەك بولدى؟

ونلاين وتەتىن وت شاشۋ جايلى ايتىپ وتىرمىز، ءاۋ باستا قالا اكىمدىگى «استانا كۇنىن» دابىرالى تۇردە وتكىزگىسى كەلگەن. اكىمدىك جوسپالاعان مەرەكەلىك ءىس-شارالاردىڭ ءتىزىمى دە جاريالانعان. تەك قوعامدىق قارسىلىقتان كەيىن عانا بۇل شارالار ونلاين رەجيمگە كوشىرىلگەن ەدى.

ەندى قازاق بيلىگى قوعامنىڭ نارازىلىعىنا قاراماستان، مەرەكەلىك وتشاشۋ اتقالى وتىر ەكەن. «وتشاشۋعا بيۋدجەتتەن اقشا بولىنبەگەن – شارا دەمەۋشى قاراجاتى ەسەبىنەن ۇيىمداستىرىلادى» دەپ اقتالعان بولىپتى. مۇنىسى كوپشىلىك «قارجىنى قالا كۇنىن تويلاۋعا ەمەس، ءدارى-دارمەككە جۇمساۋ كەرەك» دەمەس ءۇشىن الدىن-الا ساقتانعانى ەكەنى انىق.

بىراق قارجى قايدان كەلسە دە، وتشاشۋ استانا تورىندە بولعالى وتىر. ماسەلە تەك قارجىعا تىرەلىپ تۇرعان جوق. بۇل وتشاشۋ دەگەنىڭىز كوپ جاعدايدا كوڭىلدى، مەرەكەلى ساتتەردە اتىلادى. ەندەشە بەيبىت كۇندە بىرنەشە ءجۇز ادام ىندەتتەن كوز جۇمىپ، ەلۋ مىڭعا جۋىق ادام اۋىرۋمەن ارپالىسىپ جاتقاندا وتشاشۋ شاشىپ، توي تويلاۋ ادامشىلىققا جاتا ما؟! جاقىنىنان ايىرىلىپ، قارا جامىلىپ، قايعى جۇتىپ وتىرعان جانعا وتشاشۋ شاشىپ، كوڭىل كوتەرگەن جاراسا ما؟!

قاۋىپتى ۆيرۋس پەن تۇرمىس تارشىلىعى قوس بۇيىردەن قىسقان حالىققا كەرەگى وتشاشۋ ەمەس. وسى قاراپايىم عانا قاعيداعى استانا اكىمدىگى مەن التاي كولگىنوۆ مىرزانىڭ تۇسىنە الماعانى تاڭقالدىرادى...

Abai.kz

24 پىكىر