جۇما, 7 تامىز 2020
COVID-19 قازاقستاندا. جۇقتىرعاندار — 95942. جازىلعاندار — 68871. قايتىس بولعاندار — 1058
1398 5 پىكىر 5 شىلدە, 2020 ساعات 18:56

بريتاندىق جازۋشى قر تاۋەلسىزدىگىنىڭ 30 جىلدىعى مەن ەلباسىنىڭ مەرەيتويىمەن قۇتتىقتادى

86 جاستاعى جازۋشى دجون مەسسي ستيۋارت بارشا قازاقستاندىقتارعا دەنساۋلىق پەن اماندىق تىلەيدى. بارلىق ساقتىق شارالارىن ۇستانىپ، وقشاۋلانۋ رەجيمىن ساقتاۋدى سۇرادى دەپ حابارلايدى abai.kz ءتىلشىسى. ايتا كەتۋ كەرەك، قازىر ۇلىبريتانيا دا پاندەميامەن كۇرەسۋدە. سوڭعى مالىمەتتەرگە سۇيەنەر بولساق، بۇل ەل COVID-19 قايتىس بولۋ كورسەتكىشى بويىنشا ەۋروپادا ءبىرىنشى ورىندا تۇر.

بيىل  ەلباسىنىڭ «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋ اياسىندا، وبلىس اكىمى اماندىق باتالوۆتىڭ قولداۋىمەن بريتاندىق جازۋشى دجون مەسسي ستيۋارتتىڭ كىتابى قازاق تىلىنە اۋدارىلادى. كىتاپتىڭ باستى كەيىپكەرلەرى بريتاندىق ساياحاتشىلار توماس جانە ليۋسي اتكينسوندار قازاق تىلىندە سويلەيتىن بولادى. اعىلشىن تىلىندەگى نۇسقانىڭ اۆتورى 86 جاستاعى دجون ماسسي ستيۋارت بىلتىر الماتى وبلىسى اكىمدىگىنىڭ شاقىرتۋىمەن جەتىسۋعا كەلگەن ەدى. ساپارىندا جەر ءجانناتى جەتىسۋدىڭ كورىكتى جەرلەرىن ارالاپ قايتتى. ەندى سونى تۋىندىعا ارقاۋ ەتپەك.

جاقىندا عانا فوتوگراف، جازۋشى، ەكولوگ دجون مەسسي ستيۋارت وڭىردە «رۋحاني جاڭعىرۋ» باعدارلاماسى جوعارى دەڭگەيدە جۇزەگە اسىرىلىپ جاتقانىن ايتىپ، بەينەۇندەۋ جولداعان بولاتىن. اتكينسوندار ساياحاتىن زەرتتەۋ ءۇشىن اۆتور 20 جىل ۋاقىتىن سارپ ەتكەن.

ول ءوز سوزىندە:  «مەنىڭ كىتابىم قازاق تىلىنە اۋدارىلىپ، قازاقستان تاۋەلسىزدىگىنىڭ 30 جىلدىعى قارساڭىندا جارىق كورەتىنىنە وتە ريزامىن. سونداي-اق، مەن «رۋحاني جاڭعىرۋ»  سياقتى كەرەمەت باعدارلامانى باستاعانىڭىز ءۇشىن 80 جىلدىق مەرەيتويىن تويلاپ جاتقان تۇڭعىش پرەزيدەنتىڭىز نۇرسۇلتان نازارباەۆقا العىس ايتقىم كەلەدى»،- دەدى جازۋشى دجون مەسسي ستيۋارت.

تۋىندىنىڭ نەگىزگى مازمۇنى – ساۋلەتشى جانە ساياحاتشى، ءحىح عاسىردىڭ ورتاسىندا قازاقستانعا العاش رەت ساياحاتتاپ كەلگەن توماس اتكينسون تۋرالى باياندالادى. اقسۋ اۋدانىنداعى تامشىبۇلاق بۇلاعىندا توماس پەن ءليۋسيدىڭ وتباسىندا بالا دۇنيەگە كەلەدى. ولار ەسىمىن الاتاۋ تامشىبۇلاق دەپ قويادى. توماس سول ۋاقىتتا ادەمى پەيزاجداردى سۋرەتكە ءتۇسىرىپ، ەگجەي-تەگجەيلى كۇندەلىك جازىپ، وندا جەرگىلىكتى حالىقتىڭ ءومىرى مەن مادەنيەتىن سۋرەتتەدى.

الماتى وبلىستىق ىشكى ساياسات باسقارماسىنىڭ باسشىسى رۋستام اليدىڭ ايتۋىنشا، تارالىمى 2 مىڭ دانا بولاتىن كىتاپتىڭ شىعۋى كەلەسى جىلعا جوسپارلانعان. ول قوس ەلدىڭ كىتاپ قورجىنىندا قازاقستاندا دا، ۇلىبريتانيادا دا ساقتالماق.

«وتە قىزىقتى، باعا جەتپەس تۋىندىلاردىڭ اۋدارماسى «رۋحاني جاڭعىرۋ» باعدارلاماسىن جۇزەگە ىسكە اسىرۋعا ەرەكشە سەرپىن بەرەدى. حالىقارالىق جانە ىشكى ءتۋريزمدى دامىتۋداعى ۇلكەن قادام بولۋى مۇمكىن.»،- دەيدى رۋستام الي.

ايتا كەتۋ كەرەك، بۇل كىتاپ اتكينسونداردىڭ ساياحاتى جايلى جازىلعان العاشقى تۋىندى ەمەس. وسىدان 5 جىل بۇرىن بريتاندىق جازۋشى نيك فيلدينگ تە «وڭتۇستىككە ۇلى دالاعا. 1847-1852جج. توماس پەن ليۋسي اتكينسونداردىڭ شىعىس قازاقستانعا ساياحاتى» اتتى كىتابىن شىعارعان بولاتىن.

جالپى، الماتى وبلىسىندا «رۋحاني جاڭعىرۋ» باعدارلاماسى اياسىندا سوڭعى ءۇش جىلدا 15 مىڭنان استام جوبا جۇزەگە اسقان.

ايمان اسىل

Abai.kz

5 پىكىر