كۇنى كەشە عانا پرەزيدەنت قاسىم-جومارت توقاەۆ ءوزىنىڭ جەلىدەگى پاراقشاسىندا ۇكىمەت پەن ۆەدومستۆوارىلىق كوميسسيا 14 كۇندىك كارانتين رەجيمىن ۇسىعانىن حابارلاعان ەدى.

وسىدان كەيىن ەل ىشىندە ءتۇرلى اڭگىمەلەر ايتىلا باستادى. جۇرت كوڭىلىن الاڭ ەتكەن كوپ سۇراقتىڭ ءبىرى – قايتادان بلوك-بەكەتتەر قويىلا ما؟

ءيا، سۇراق كوپ. گۋ-گۋ اڭگىمە، كۇبىر-كۇبىر سىبىس تا سونشالىق... قالالاردا قوعامدىق كولىكتەر توقتاي ما؟ جۇمىس ورىندارى، سونىڭ ىشىندە بازارلار، كەڭسەلەر، باسقا دا تۇرمىستىق قاجەتتىلىك نىساندارى تولىقتاي جابىلا ما؟ كارانتيننىڭ قانداي ءتۇرى ەنگىزىلەدى؟ الەۋمەتتىك جاردەماقى قايتادان تولەنە مە؟ قالا ماڭىنداعى تۇرعىنداردىڭ قالاعا كىرىپ-شىعۋى شەكتەلە مە؟..

بۇگىن پرەمەر-ءمينيستردىڭ رەسمي سايتىندا پرەزيدەنت ايتقان شەكتەۋ شارالارى تۋرالى رەسمي اقپارات جاريالاندى. ۆەدومستۆوارالىق كوميسسيانىڭ وتىرىسىندا ۇكىمەت قابىلداعان شەكتەۋ شارالارى تۋرالى قر دەنساۋلىق ساقتاۋ ءمينيسترى الەكسەي تسوي بايانداپتى. سونىمەن، قانداي شارا قابىلداندى؟ مىنە قاراڭىز...

شەشىم

قازاقستاندا ەپيدەميولوگيالىق احۋالدىڭ ءورشۋىن جانە كوروناۆيرۋس ينفەكتسياسىمەن سىرقاتتانۋشىلىقتىڭ ءوسۋىن ەسكەرە وتىرىپ، مەملەكەتتىك كوميسسيا بيىلعى 5 شىلدەدەن باستاپ 14 كۇنگە كەلەسى شەكتەۋ شارالارىن ەنگىزۋ تۋرالى شەشىم قابىلدادى:

كولىك قاتىناسى بويىنشا:

1. ەلدەر ءتىزىمىن كوبەيتپەي، حالىقارالىق اۋە قاتىناسىن ساقتاۋ;

2. وڭىرلەر اراسىنداعى اۋە قاتىناسىن، تەمىر جول قاتىناسىن ساقتاۋ (شەكتەۋلەرمەن);

3. وڭىرلەر اراسىنداعى جولاۋشىلار اۆتوبۋسى قاتىناسىن ۋاقىتشا توقتاتۋ;

4. قوعامدىق كولىكتىڭ جۇمىسىن ۋاقىت بويىنشا شەكتەۋ.

ازاماتتاردىڭ ءجۇرىپ-تۇرۋى بويىنشا:

1. ويىن-ساۋىق، سپورت جانە باسقا دا بۇقارالىق ءىس-شارالاردى، سونداي-اق وتباسىلىق، ەسكە الۋ شارالارىن وتكىزۋگە تىيىم سالۋ;

2. اشىق اسپان استىندا (اۋادا) جاتتىعۋلار جاساۋعا رۇقسات ەتۋ;

3. تۇرعىنداردىڭ كوشەلەردە، ساياباقتاردا، سكۆەرلەردە 3 ادامنان ارتىق سەرۋەندەۋىن شەكتەۋ;

4. 65 جاستان اسقان ادامداردىڭ سىرتقا شىعۋىن شەكتەۋ.

مىنا نىسانداردىڭ قىزمەتىنە تىيىم سالۋ كەرەك:

1. سۇلۋلىق سالوندارى، شاشتاراز، سپورت زالدارى، فيتنەس ورتالىقتار، باسسەيندەر، ازىق-تۇلىك جانە ازىق-تۇلىكتىك ەمەس جابىق بازارلار، جاعاجايلار، اكۆاپاركتەر، مادەنيەت نىساندارى، مۋزەيلەر، كورمەلەر، فورۋمدار، كونفەرەنتسيالار جانە وزگە دە ۇيىمداستىرىلعان بۇقارالىق ءىس-شارالار، ويىن-ساۋىق ورتالىقتارى، مەكتەپكە دەيىنگى بالالار مەكەمەلەرى (كەزەكشى توپتاردان باسقا), ءدىني نىساندار جانە ت. ب. (سوسو-داعى ويىن-ساۋىق ورتالىقتارى، ويىن-ساۋىق نىساندارى (كاراوكە، بيليارد، كومپيۋتەر كلۋبتارى، بوۋلينگ ورتالىقتارى), كينوتەاترلار، بالالاردى ساۋىقتىرۋ لاگەرلەرى، فۋدكورتتار، بانكەت زالدارى).

2. مەملەكەتتىك ورگانداردىڭ (ۇيىمداردىڭ), كەڭسەلەردىڭ، ۇلتتىق كومپانيالاردىڭ جانە وزگە دە ۇيىمداردىڭ قىزمەتكەرلەرىنىڭ كەمىندە 80%-نىڭ قاشىقتان جۇمىس ىستەۋ رەجيمىن ساقتاۋ;

3. الدىن الا جازىلۋ بويىنشا مەديتسينا ورتالىقتارىنىڭ قىزمەتىن ساقتاۋ;

4. ءدارىحانالاردىڭ، ازىق-تۇلىك دۇكەندەرىنىڭ، اشىق بازارلاردىڭ قىزمەتىن ساقتاۋ;

5. كۇشەيتىلگەن سانيتارلىق-دەزينفەكتسيالىق رەجيمدى ساقتاي وتىرىپ، كەلەسى نىسانداردىڭ قىزمەتىن ساقتاۋ: اشىق اسپان استىنداعى قوعامدىق تاماقتانۋ نىساندارى; ۇزدىكسىز وندىرىستىك اينالىمى بار قۇرىلىس، ونەركاسىپ كاسىپورىندارى; اۋلاداعى قۇرىلىس جۇمىستارى; اۋىل شارۋاشىلىعى، بالىق شارۋاشىلىعى جانە مال شارۋاشىلىعى جۇمىستارى; حالىققا قىزمەت كورسەتۋ سالالارى، ونىڭ ىشىندە اۆتو جۋ، اۆتوموبيلدەردى جانە تۇرمىستىق تەحنيكانى جوندەۋ، حقكو-لار، ەكىنشى دەڭگەيلى بانكتەر (ۋاقىت بويىنشا شەكتەۋ ەنگىزۋمەن).

ەسكەرتۋ! بۇل كارانتيندىك شارالار 2 اپتاعا (14 كۇنگە) قابىلدانعان. ەلدەگى ەپيدەميولوگيالىق احۋالعا بايلانىستى كارانتين ۇزارتىلۋى مۇمكىن.

Abai.kz