بۇگىن پارلامەنتتە قوس پالاتانىڭ بىرلەسكەن وتىرىسى ءوتتى. ءسويتىپ پارلامەنت VI شاقىرىلىمنىڭ بەسىنشى سەسسياسىن اياقتادى. دەپۋتاتتار دەمالىسقا شىقتى.

سەسسيا بارىسىندا قوس پالاتا سەنات پەن ءماجىلىس 3 رەت بىرلەسكەن وتىرىس وتكىزگەن ەكەن. ال پارلامەنتتىڭ بەسىنشى سەسسياداعى اتقارعان قىزمەتى تۋرالى ەگجەي-تەگجەيلى اقپاراتتى ءماجىلىستىڭ رەسمي سايتى جاريالادى. ونداعى اقپارات بويىنشا:

ءماجىلىستىڭ 41 جالپى وتىرىسىندا 296 ماسەلە قارالسا، سەناتتىڭ 25 جالپى وتىرىسىندا 165 ماسەلە قارالىپتى.

قوس پالاتانىڭ قاراۋىندا 161 زاڭ جوباسى بولدى، ونىڭ 98-ءى قابىلدانعان. ونىڭ 86-سىنا مەملەكەت باسشىسى قول قويىپ، زاڭدى كۇشىنە ەنگەن.

وسى سەسسيادا دەپۋتاتتار وزدەرى باستاماشى بولىپ، 35 زاڭ جوباسىن ازىرلەگەن ەكەن. ولاردىڭ 12-ءسى قابىلدانىپ، 23-ءى بويىنشا جۇمىس جۇرگىزىلىپ جاتىر دەيدى سەسسيا قورىتىندىسى تۋرالى رەسمي اقپارات.

وتكەن سەسسيادا پارلامەنت قابىرعاسىندا 13 ۇكىمەتتىك ساعات، 5 پارلامەنتتىك تىڭداۋ، 20 «دوڭگەلەك ۇستەل»، كوميتەتتەردىڭ 27 كوشپەلى وتىرىسى جانە 2 كونفەرەنتسيا وتكەن ەكەن.

پارلامەنتتىك تىڭداۋلار، اتاپ ايتقاندا، اگروونەركاسىپتىك كەشەندى دامىتۋ، قازاقستاننىڭ سۋ قاۋىپسىزدىگى، زاڭ شىعارۋ پروتسەسىن ودان ءارى جەتىلدىرۋ سياقتى ماسەلەلەرگە ارنالعان.  سەسسيا جۇمىسى كەزەڭىندە پارلامەنتتىڭ قوس پالاتاسىنىڭ دەپۋتاتتارى 308 دەپۋتاتتىق ساۋال (ونىڭ 204-ءىن – ءماجىلىس دەپۋتاتتارى، 104-ءىن – سەنات دەپۋتاتتارى) جولداعان. وسى سەسسيا بارىسىندا پارلامەنت دەپۋتاتتارىنا ازاماتتاردان شامامەن 9733 حات كەلىپ تۇسكەن.

«پارلامەنت دەپۋتاتتارى ەلدە تۇراقتىلىقتى قامتاماسىز ەتۋ جونىندەگى كەشەندى شارالاردى جۇزەگە اسىرۋعا اتسالىسا وتىرىپ، ۇلتتىق ەكونوميكا، اۋىل شارۋاشىلىعىنداعى ەگىس جۇمىستارىن ۋاقتىلى جۇرگىزۋ، حالىقتى الەۋمەتتىك قولداۋ، دەنساۋلىق ساقتاۋ سالاسىنداعى جۇيەلى شارالار، ەپيدەميولوگيالىق جاعدايدى تۇراقتاندىرۋ، بارلىق دەڭگەيدەگى ءبىلىم بەرۋ ساپاسى سەكىلدى ماسەلەلەردى ەرەكشە باقىلاۋعا الدى. الداعى، التىنشى سەسسيادا پارلامەنتتىڭ قوس پالاتاسىنىڭ دەپۋتاتتارى ەل پرەزيدەنتى قاسىم-جومارت كەمەلۇلى توقاەۆتىڭقازاقستان حالقىنا جولداۋىنىڭ ەرەجەلەرىن ىسكە اسىرۋدى جالعاستىرادى»، - ءماجىلىستىڭ رەسمي اقپاراتىندا.

قازىرگى ۋاقىتتا پارلامەنت قورجىنىندا 61 زاڭ جوباسى بار كورىنەدى.

ولاردىڭ قاتارىندا: ەكولوگيالىق كودەكس، وزىندىك ەرەكشەلىگى بار تاۋارلاردى باقىلاۋ تۋرالى، وسىمدىك الەمى تۋرالى زاڭدار بار.

سونىمەن قاتار «2021 - 2023 جىلدارعا ارنالعان رەسپۋبليكالىق بيۋدجەت تۋرالى»، اسكەري قىزمەت جانە ارناۋلى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارى ماسەلەلەرى جونىندەگى، بيلىكتىڭ اۋداندىق، قالالىق جانە اۋىلدىق دەڭگەيلەرىنىڭ دەربەستىگى مەن جاۋاپكەرشىلىگىن كەڭەيتۋ ماسەلەلەر جونىندەگى جانە تاعى باسقا دا زاڭدار دا كەلەسى سەسسيادا قارالماق.

Abai.kz