ەلىمىزدە جۇقپالى دەرت تاراعان ۋاقىتتان بەرى بارلىق مەكەمەلەردە قاشىقتان جۇمىس ىستەۋ رەجيمى ەنگىزىلدى. وسى ورايدا «وتانداستار قورى» ەل ءىشى مەن شەتەلدەگى قانداستارىمىزعا ارناپ بىرنەشە جوبانى جۇزەگە اسىردى. اتاپ ايتساق، دۇنيەجۇزى قازاقتارى قاۋىمداستىعى، «وتانداستار قورى» مەن «ءداستۇر» سىيلىعىنىڭ يەگەرى قازيپا قاليقىزىنىڭ «HAZIFA» شەبەرلىك مەكتەبىمەن بىرلەسىپ، كيىم تىگۋدى ۇيرەتەتىن ونلاين شەبەرلىك كۋرسىن ۇيىمداستىردى. كۋرستى اياقتاعان قاتىسۋشىلارعا ارنايى سەرتيفيكات بەرىلدى. 

قازاق گيمناتستيكاسىنىڭ اۆتورى، ەمشى اباي بايماعانبەتوۆتىڭ ونلاين كۋرسى وتكىزىلدى. ايكۋنە – قازاقتىڭ حالىقتىق ەمدەۋ تاسىلىمەن ادامنىڭ جاسىرىن رەسۋرستارىن وياتىپ، ەكى مىڭنان استام جاتتىعۋ ارقىلى دەندەگەن دەرتتەن ايىقتىراتىن وزگەشەلىگىمەن ەرەكشەلەندى. ۇلتتىق تاعامعا دەگەن قىزىعۋشىلىقتى وياتۋ ماقساتىندا «قازاقتىڭ ۇلتتىق تاعامدارى - ۇلى دالا برەندى» ونلاين اس دايارلاۋ كۋرسىن دا قانداستارىمىز ەرەكشە جىلى ىقىلاسپەن قابىلدادى. جوبا ەل ىشىنەن بولەك شەتەلدەگى قانداستار اراسىندا قىزىعۋشىلىق تۋدىرىپ، جوعارى باعالاندى.

«وتانداستار قورى» الەمنىڭ ءار تۇكپىرىندەگى قانداستارىمىزبەن جانە قازاق مادەني ورتالىقتارىمەن تىعىز بايلانىستا جۇمىس ىستەيدى. جۇقپالى دەرت تاراعان قازىرگى ۋاقىتتا فرانتسيانىڭ پاريج قالاسىنداعى «قورقىت»، رەسەيدىڭ ومبى قالاسىنداعى «ومبى قازاقتارى» جانە ورىنبور قالاسىنداعى «بايتەرەك» قوعامدىق ۇيىمى، يسپانيا، كورەيا، اقش، دانياداعى قازاق قوعامدىق ۇيىمى مەن ەۋروپا قازاق دارىگەرلەرىنىڭ اسسوتسياتسياسى، موڭعولياداعى «ەل بىرلىگى» قازاق قوعامدىق ۇيىمى جانە كيپردەگى «More way» قازاق قوعامدىق ۇيىمىنداعى قانداستارىمىزبەن ونلاين كەزدەسۋ وتكىزىلدى.

بابادان قالعان ءداستۇرىمىزدى ۇلىقتاۋ ماقساتىندا ءارى شەتەلدەگى قانداستارىمىزدىڭ قاتىسۋىمەن «ONLINE-NAURYZ» مەرەكەسى ۇيىمداستىرىلدى. ونلاين رەجيمدە وتكەن شاراعا اقش (بوستون، چيكاگو قالالارى), يران، گەرمانيا، شۆەتسيا، دانيا، موڭعوليا، رەسەي، تۇركيا ەلدەرىنەن قانداستارىمىز قاتىستى.

حالىقارالىق مادەنيەت كۇنىنە وراي «وتانداستار قورىنىڭ» ۇيىمداستىرۋىمەن ءداستۇرلى ءان ونەرىندەگى ۇزدىك تالانتتى انشىلەردىڭ ءبىرى، قانداسىمىز ساۋلەجان تاعزياۇلىنىڭ ونلاين كونتسەرتى كورەرمەن كوڭىلىنەن شىقتى. ءداستۇرلى ءانشى، حالىقارالىق، رەسپۋبليكالىق كونكۋرستاردىڭ لاۋرەاتى، «مەن قازاقپىن» حالىقارالىق مەگاجوباسىنىڭ ءفيناليسى، نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ حالىق ءانى بولىمىندە قىزمەت اتقاراتىن ونەرلى باۋىرىمىز اۋەلەتە ءان سالىپ، بولاشاق شىعارماشىلىق جوسپارىمەن ءبولىستى.

«وتانداستار قورى» مەن «زەردەلى» اقىل-ويدى دامىتۋ ورتالىعى بىرلەسكەن قازاق ءتىلىن قاشىقتان وقىتۋ جوباسى قولعا الىندى. ءار ەلدەگى ۋاقىت ايىرماسىنا قاراي قازاق ءتىلى كۋرسى اپتاسىنا ءۇش رەت، ءبىر كۇندە ءتورت مارتە وتكىزىلدى. كۋرستى وتكىزىپ العان تالاپكەرلەر ساباقتى ساقتالعان بەينەجازبادان قايتالاپ كورىپ، وقۋعا مۇمكىندىك بەرىلدى. ءتىل كۋرسىنا 12 مەملەكەتتىڭ 23 قالاسىنان اشىلعان 31 قازاق سىنىبىنىڭ وقۋشىلارى قاتىسدى. 

سونىمەن قاتار، «انا ءتىلىم-ارداعىم»، «اباي الەمى»، «قازاقستان – اتا جۇرتىم، قاسيەتتى – انا ءتىلىم» اتتى وقۋشىلار مەن جاستار اراسىنداعى حالىقارالىق ونلاين بايقاۋلار وتكىزىلدى. جەڭىمپازدار گراموتا جانە باعالى سىيلىقتارمەن ماراپاتتالدى. 

مۇحتار سەرجان

Abai.kz