جاڭا مينيستر الەكسەي تسويدان جارناما ءۇشىن دارىگەرلەردى ولىمگە جىبەرمەۋىن سۇرايمىز نەمەسە «سالاماتتى قازاقستان» ۇلت دەنساۋلىعىنىڭ كەپىلى بولا الا ما؟

مەملەكەتتىڭ نەگىزگى بايلىعى حالىق دەيتىن بولساق، سول حالىقتىڭ دەنساۋلىعى قاشاندا ءبىرىنشى ورىندا تۇرارى انىق. سول سەبەپتى بولار، جىل سايىن شالعاي ەلدىمەكەندەردى ارالاپ، حالىقتىڭ دەنساۋلىعىن تۇزەتۋگە سەبەپشى بولاتىن «سالاماتتى قازاقستان» مەديتسينالىق پويىزى ءجۇرىپ تۇرادى. دۇرىس. قولدايمىز. راس، اتالمىش پويىزدىڭ پايداسى شاش ەتەكتەن. ويتكەنى قازىرگىدەي قيىن كەزەڭدە تەگىن مەديتسينالىق كومەك الۋ اسا قاجەت. دارىگەرلەردىڭ قۇرامى دا سان الۋان، ناقتىلايتىن بولساق، تەراپەۆت، وفتالمولوگ، لور، نەۆروپوتولوگ، حيرۋرگ، ستوموتولوگ، ۋرولوگ سىندى قوعامعا قاجەتتى مامان يەلەرى بار. ءبارى دۇرىس، ءبارى جاقسى.

الايدا بيىل ياعني قازىر كوروناۆيرۋس ىندەتى ەتەكتەن الىپ، ءورشىپ تۇرعان كەزدە مۇنداي پويىزدىڭ ەلدى ارالاپ شىعۋى قانشالىقتى ءتيىمدى ەكەنىن بىلمەي وتىرمىن. قولداعى بار دەرەكتەرگە قاراساق، الداعى شىلدەدەن جەلتوقسان ايىنا دەيىن جۇرەتىن «سالاماتتى قازاقستان» پويىزى تاعى شىقپاق ەكەن. بۇل مەملەكەتتىك تاپسىرىستى س. ج. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى الىپ وتىر. بۇيرىققا سايكەس 5 مەديتسينالىق بريگادا جاساقتالماق كورىنەدى. ءار بريگادادا 30 دارىگەر جانە 50- گە تارتا تەمىرجول قىزمەتكەرلەرى بولماق. پويىز ەكى باعىتتا جۇرمەك. ءبىرى نۇر-سۇلتان قالاسىنان شىقسا، ەكىنشىسى الماتىدان جۇرەدى. ءار پويىزعا 250 ميلليون تەڭگەدەن ءبولىنىپ وتىر. ءبىر قاراساڭ ءبارى جاقسى. ۇلت دەنساۋلىعىن تۇزەتۋگە جاسالعان قادام. بىراق ءدال قازىر وسى كەرەك پە؟ ويتكەنى وسى پويىزبەن بارا جاتقان دارىگەرلەردىڭ ءوزى قانشىلىقتى ىندەتتەن ادا. ارالارىندا پاندەميانى جۇقتىرعاندار بولسا شە؟ وندا شالعايداعى ەدىمەكەن ادامدارىنا جۇقتىرىپ، ەلدەگى جاعدايدى ودان ارى ۋشىقتىرىپ المايمىز با دەگەن كوڭىلدە كۇدىك تۋادى.

ءىرى قالالاردا پاندەميانى اۋىزدىقتاي الماي وتىرعاندا الىس اۋىلداردا ءوز قولىمىزبەن تاراتىپ الساق، قايتپەكپىز؟ مۇنى ويلاعان ادام بار ما؟ دەنساۋلىق مينيسترىلىگى نە دەيدى؟ الدە بۇل وسى مينيسترلىكتىڭ اتىن شىعارۋ ءۇشىن جاسالىپ وتىرعان جارناما ما؟ الدە مەملەكەتتەن بولىنگەن قوماقتى اقشانى يگەرۋدىڭ توتە جولى ما؟ ويلاناتىن ماسەلە.

قازىرگىدەي ىندەت ءورشىپ تۇرعان كەزە دارىگەرلەردە ايلاپ جول ساپارعا شىعۋعا قۇلىقتى ەمەس ەكەنى انىق. دەمەك مۇنى دا دەنساۋلىق مينيسترلىگى ەسكەرگەن ءجون. اقيقاتىن ايتساق، قازىر «حالىقتىڭ دەنساۋلىعىن كوزدەن تاسا ەتپەي وتىرمىز» دەيتىن ارزان جارناما جاسايتىن كەز ەمەس.

ازاماتحان ءامىرتايدىڭ جازباسى

Abai.kz