مەملەكەتتىك قۇپيانى جاريالادى دەپ ايىپتالىپ، 5 جىلعا سوتتالعان ءپا باسشىسىنىڭ بۇرىنعى ورىنباسارى باعلان مايلىباەۆ بوستاندىققا شىعىپتى. سوت اۋەلدە ۇكىم ەتىپ، بەلگىلەپ بەرگەن مەرزىمىنەن بۇرىن. بۇل تۋرالى «ازاتتىق» سايتى جازدى.

نۇر-سۇلتان قالاسىنىڭ بايقوڭىر اۋداندىق №2 سوتى 14 مامىردا قاۋلى شىعارعان. سوت قاۋلىسى 30 مامىردا زاڭدى كۇشىنە ەنگەن.

نۇر-سۇلتان قالاسىنىڭ قىلمىستىق-اتقارۋ جۇيەسى دەپارتامەنتى وكىلدەرىنىڭ «ازاتتىققا» ايتقان اقپارىنشا، باعلان مايلىباەۆ 30 مامىردا نۇر-سۇلتاننىڭ تەرگەۋ يزولياتورىنان بوساپ شىققان. نەگىزگى جازا مەرزىمىنىڭ اياقتالۋىنا 1 جىل، 4 اي، 21 كۇن قالعان ەكەن.

ەستەرىڭىزدە بولسا، 2017 جىلدىڭ 12 قاڭتارىندا پرەزيدەنت اكىمشىلىگى جەتەكشىسىنىڭ بۇرىنعى ورىنباسارى باعلان مايلىباەۆ قىزمەتىنەن بوساتىلعان. ارادا بىرنەشە كۇننەن كەيىن ۇلتتىق قاۋىپسىزدىك كوميتەتى مايلىباەۆتىڭ «قىزمەت بابىن تەرىس ماقساتتا پايدالانۋ» جانە «مەملەكەتتىك قۇپيالاردى زاڭسىز جيناۋ، تاراتۋ، جاريا ەتۋ» بابى بويىنشا كۇدىككە ىلىنگەنىن حابارلاعان.

ال 2017 جىلدىڭ ماۋسىمىندا استانانىڭ ەسىل اۋداندىق سوتى باعلان مايلىباەۆ پەن نيكولاي گاليحيندى قر قىلمىستىق كودەكسىنىڭ 361 بابى، 1-بولىگى جانە 185 بابىنىڭ 3-بولىگى بويىنشا كىنالى دەپ تاپقان.

سوت مايلىباەۆقا مۇلكىن تاركىلەي وتىرىپ، 5 جىلعا باس بوستاندىعىنان ايىرۋ جازاسىن كەسكەن. سونداي-اق، سوت ۇكىمىندە مايلىباەۆ ءومىر بويى مەملەكەتتىك قىزمەتتە جۇمىس ىستەي المايدى دەپ جازىلعان.

مەملەكەتتىك قۇپيانى جاريالاعانى ءۇشىن سوتتالعان قر پرەزيدەنتى اكىمشىلىگى باسشىسىنىڭ ورىنباسارى باعلان مايلىباەۆ شەت مەملەكەتتىڭ وكىلدەرىمەن تىعىز قارىم-قاتىناستا بولعانى تۋرالى اقپاراتتا جاريا بولعان. دالىرەك ايتساق، ونىڭ رەسەيمەن بايلانىسى بولعان دەلىنگەن.

بىلتىر سوت باعلان مايلىباەۆتى ۋاقىتىنان بۇرىن بوساتۋ، وزىنە كەسىلگەن «ابىقتىدا قاماۋ» جازاسىن «شارتتى جازاعا» وزگەرتۋ تۋرالى ءوتىنىشىن قاناعاتتاندىرماعان. بيىل مامىر ايىندا مايلىباەۆتىڭ بوستاندىققا شىققان تۋرالى اقپارات باق-تا جاريالانبادى.

مايلىباەۆ پرەزيدەنت اكىمشىلىگىندە يدەولوگيا جانە ىشكى ساياساتقا جاۋاپتى بولدى. ونىڭ سوتى جابىق وتكەن.

باعلان مايلىباەۆ قىزمەتىنەن بوساتىلعاندا – ورىس ءتىلدى بۇقارالىق اقپارات قۇرالدارى ءتۇرلى بولجامدار جاساعان. ال Abai.kz اقپاراتتىق پورتالى مايلىباەۆتىڭ ۇستالۋىنا قاتىستى بىرقاتار ساياساتكەرلەردى سوزگە تارتقان. الايدا، كوبىسى مايلىباەۆتىڭ تۇتقىندالۋىنا قاتىستى پىكىر ايتۋدان باس تارتقان.

Abai.kz