سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سوعىس جاعدايى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. 

وتىرىستا نەگىزگى باياندامانى قازاقستان رەسپۋبليكاسى قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى مۇرات بەكتانوۆ, ال قوسىمشا باياندامانى سەنات دەپۋتاتى، كوميتەت مۇشەسى نۇرجان نۇرسيپاتوۆ جاسادى.

زاڭ جوباسىنىڭ نەگىزگى ماقساتى – سوعىس جاعدايىندا مەملەكەت فۋنكتسيالارىنىڭ تەتىكتەرىن بولجالدى اسكەري قاۋىپ-قاتەرلەردى جانە جاڭا زامانعى اسكەري قاقتىعىستار فورماسى مەن تاسىلدەرىنىڭ وزگەرۋىن ەسەپكە الا وتىرىپ جەتىلدىرۋ.

سەناتور ن. نۇرسيپاتوۆتىڭ سوزىنشە «زاڭ جوباسىنىڭ باستى جاڭالىعى وڭىرلەردە قورعانىس كەڭەستەرىن قۇرۋ بولىپ سانالادى، بۇل، ءوز كەزەگىندە، جەرگىلىكتى اتقارۋشى ورگانداردىڭ جاۋاپكەرشىلىگىن ارتتىرادى. سونىمەن قاتار، جوعارى وقۋ ورىندارىندا اقىلى نەگىزدە زاپاستاعى سەرجانتتاردى دايارلاۋ كوزدەلگەن، بۇل جۇمىلدىرۋ رەزەرۆىن نىعايتۋ قاجەتتىلىگىنەن تۋىنداپ وتىر».

زاڭ جوباسى ەڭبەك كودەكسىنە، «جۇمىلدىرۋ دايىندىعى مەن جۇمىلدىرۋ تۋرالى»، «مەملەكەتتىك قۇپيا تۋرالى»، «سوعىس جاعدايى تۋرالى»، «قازاقستان رەسپۋبليكاسىنىڭ قورعانىسى جانە قارۋلى كۇشتەرى تۋرالى»، «ءبىلىم تۋرالى» جانە «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭدارعا تۇزەتۋ ەنگىزۋدى  كوزدەيدى.

قۇجات پالاتا قاراۋىنا جولداندى.

سونداي-اق، كەڭەيتىلگەن وتىرىستا سەناتورلار ەل قارۋلى كۇشتەرىنىڭ ودان ءارى دامۋ ماسەلەسىن جان-جاقتى تالقىلادى. ونىڭ بارىسىندا اسكەري ءبىلىم جۇيەسىن جانە اسكەري عىلىمدى، كادر دايارلاۋدى جەتىلدىرۋ، اسكەري ءتارتىپ پەن قۇقىقتىق ءتارتىپ جاعدايى، اسكەري قىزمەتشىلەردى الەۋمەتتىك قامتاماسىز ەتۋ جانە قارۋلى كۇشتەردىڭ بىتىمگەرلىك قىزمەتى تۋرالى ماسەلەلەر كوتەرىلدى. 

قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى

Abai.kz