96,5 ميلليون تەڭگەگە «تۋالەت» سالامىز. ءيا، ءيا، «تۋالەت!» الماتى دەيتىن ايدىك قالاداعى ەليتالىق اۋدان سانالاتىن مەدەۋ اۋدانىنداعى 10 كوشەگە 10 اجەتحانا ورناتىلاتىن بوپتى. ارقايسىسىنىڭ قۇنى – 9,65 ميلليون تەڭگە! «Tengrinews.kz» جازدى، سولاي دەپ.

مەدەۋ اۋدانىنىڭ اكىمدىگى «مەملەكەتتىك ساتىپ الۋلار» سايتىندا الگىندەي اجەتحانالارعا تاپسىرىپ بەرىپ قويىپتى.

اۋەلدە اكىمدىك 10 اجەتحاناعا دەپ، بيۋدجەتتىڭ 137,9 ميلليون تەڭگەسىن «ارناعان» ەكەن. 10 كوشەگە ورناتىلاتىن قوعامدىق اجەتحانالارعا سونشالىق سوما بولمەك بولعان. سودان، «التاي قازينجينيرينگ» جشس شىعىپ، «ەڭ جاقسى» باعا ۇسىنىپتى. 96,5 ميلليون تەڭگە! ءبىر اجەتحاناعا 9,65 ميلليون تەڭگەدەن...

«بۇل اجەتحانالار جاقسى، ءمودۋلدى، بۇزىلمايتىن، تولىعىمەن مەتالل بولادى. كارىز جۇيەسى بار جەرلەردە سوعان جالعايمىز. باسقا جەرلەردە بيوتۋالەتتەر بولادى. ءبىز «Alma Mater» جشس-عا ەكى اجەتحاناعا تاپسىرىس بەردىك. ءبىر ايدان كەيىن رەسپۋبليكا سارايى مەن «مەدەۋ» ماڭىنا قويىلادى. سوسىن اكىمگە كورسەتەمىز. ەگەر ماقۇلداسا، قالعاندارىن جەتكىزەمىز»، - دەپتى كومپانيا باسشىسى ەرلان يساەۆ.

ءسويتىپ، الگى اجەتحانالاردىڭ نوبايى-نۇسقاسىن سۋرەتتەن كورسەتىپتى. مىنە، قاراڭىز:

(سۋرەتتەر tengrinews.kz سايتىنان الىندى)

بيۋدجەتتىڭ قىرۋار قارجىسىنا الىنىپ جاتقان الگى اجەتحانالاردى ورناتاتىن ورىندار دا بەلگىلەنىپ قويىلعان-مىس. «مەدەۋگە»، «بۋتاكوۆكاعا»، «تەرەڭكول» دەمالىس ورنىنا، «ەسەنتاي» وزەنىنىڭ بويىنا، اباي پاركىنە، ورتالىق مەشىتكە ت.ب.

(سۋرەت tengrinews.kz سايتىنان الىندى)

تاپسىرىس بويىنشا بۇل اجەتحانالار 3 ايدىڭ ىشىندە ورناتىلىپ ءبىتۋى كەرەك. تاپسىرىستى ورىنداۋشى – ەڭ كەمىندە 12 جۇمىس ورنىن تاۋىپ بەرۋگە، ءسويتىپ ول ورىندارعا الماتى قالاسىنىڭ جۇمىسپەن قامتۋ ورتالىعىندا تىركەۋدە تۇرعان جۇمىسسىزداردى قابىلداۋعا مىندەتتى ەكەن.

ەستەرىڭىزگە سالا كەتەيىك، 2019 جىلدىڭ قاراشاسىندا مەملەكەت باسشىسى قاسىم-جومارت توقاەۆ جول بويىنداعى دارەتحانالاردىڭ سۇمدىق جاعدايى تۋرالى ايتقان ەدى.

كەيىن قازاقستاندا جول بويىنا 260 اجەتحانا ورناتىلاتىنى بەلگىلى بولدى. ونىڭ 22-ءسى 2020 جىلعا جوسپارلانعان. ونداعى ءبىر اجەتحانانىڭ باعاسى 23 ميلليون تەڭگە دەپ كورسەتىلگەن.

ءوز كەزەگىندە، بۇل اقپارات قوعامدا قىزۋ تالقى تۋدىرعان. ەندى مىنە. الماتىداعى مەدەۋ اۋدانىنىڭ اكىمدىگى بيۋدجەتتىڭ 96,6 ميلليون تەڭگەسىنە «تۋالەت» ساتىپ الۋدى جوسپارلاپ، كەلىسىپتى...

Abai.kz