جەكسەنبى, 5 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
اپات 1558 1 پىكىر 28 مامىر, 2020 ساعات 16:14

بلوك-بەكەتتەگى جول اپاتى. كىم وتىرىك ايتتى؟

الماتى قالاسى مەن الماتى وبلىسى اراسىنداعى بلوك-بەكەتتە بولعان قايعىلى وقيعا جايلى اقپارات ءارتۇرلى بولىپ تۇر. الدىمەن پاترۋل كولىگىن سوققان جەڭىل اۆتوموبيل جۇرگىزۋشىسى بۇرىن پوليتسيادا جۇمىس ىستەگەنى تۋرالى اقپارات تارادى. بىراق الماتى قالالىق پد ءباسپاسوز حاتشىسى سالتانات ازىربەك بۇل اقپاراتتى جوققا شىعاردى. ارتىنشا، الماتى پوليتسيا دەپارتامەنتىنىڭ باستىعى قانات تايمەردەنوۆ كۇدىكتىنىڭ پوليتسيادا قىزمەت ىستەگەنىن راستادى.

«ول پوليتسيادا التى جىل قىزمەت ەتتى، قىزمەتتىك مىندەتتەرىن تيىسىنشە ورىنداماعانى ءۇشىن ءتورت تارتىپتىك جازا الدى. بۇل ونىڭ ىشكى ىستەر ورگاندارىنان كەتۋىنە سەبەپ بولدى. بىراق ول ودان كەيىن دە ءوزى ءۇشىن دۇرىس قورىتىندى جاساي المادى. زاڭدى بۇزىپ، رولگە ماس كۇيىندە وتىرىپ، قىلمىس جاسادى»، - دەگەن ەدى قانات تايمەردەنوۆ.

الايدا بۇل اقپاراتتىڭ دا ءتۇبى شيكى سەكىلدى. ويتكەنى كولىك تىزگىنىندە بولعان ازات ازاماتوۆتىڭ اكەسى 31 ارناعا بەرگەن سۇحباتىندا اپات بولعان كۇنى ۇلىنىڭ كەزەكشىلىكتە بولعانىن ايتادى.

ءوزى دە ىشكى ىستەر ورگاندارىندا 28 جىل جۇمىس ىستەگەن تالعات مۇقاشەۆتىڭ ايتۋىنشا، ازات ازاماتوۆتى بۇرىنعى پوليتسيا دەگەن اقپارات جالعان. ول ءتىپتى وسى ايدىڭ باسىندا عانا لەيتەنانت شەنىن العان. كوروناۆيرۋس كەزىندە دەمالىسسىز جۇمىسقا شىعىپ، شارشاپ جۇرگەن.

«كوروناۆيرۋس ءۇشىن مۇلدە دەمالعان جوق. 18-19 كۇن جۇمىس ىستەدى. جول اپاتى تاڭعى 5-تە بولعان، سول ۋاقىتتا ۇيىقتاپ قالعان بولۋى مۇمكىن دەپ ويلايمىن. ادام دەمالماي جۇمىس ىستەسە، رولدە وتىرىپ ۇيىقتاپ قالۋى مۇمكىن. ءيا، ول زاڭ بويىنشا جول اپاتى ءۇشىن جاۋاپ بەرۋى كەرەك. بىراق مەن ونىڭ ارىپتەستەرىن قاساقانا قاعىپ ءولتىردى دەگەنگە سەنبەيمىن»، - دەدى ازاتتىڭ اكەسى.

ىشكى ىستەر ورگاندارىندا ۇزاق ۋاقىت قىزمەت ەتىپ زەينەتكە شىققان مۇقاشەۆ وقيعانىڭ انىق-قانىعى كامەراعا ءتۇسۋى كەرەك ەكەنىن ايتىپ وتىر. ول قۇرىلعىنىڭ ىستەن شىققانىنا كۇمان كەلتىردى.

«قايتىس بولعان جىگىت بالاسىنىڭ شىلدەحاناسىنا شاقىرعان ەكەن. ەكەۋى ارالاسقان. سويتە تۇرا، قالاي قىلمىسقا باردى دەپ ويلايسىزدار. قاسىنداعى جولداسىنا قاسقىر دا قاستىق قىلمايدى. بۇل وقىس وقيعا عوي. قايتىس بولعان ازاماتتاردىڭ اتا-اناسىنا، تۋىستارىنا قايعىرىپ كوڭىل ايتامىن»، - دەدى مۇقاشەۆ.

ەستەرىڭىزگە سالا كەتەيىك، 25 مامىر كۇنى الماتى وبلىسى، قاراساي اۋدانى، كوكساي ىقشاماۋدانىنداعى بلوك-بەكەتتە بولعان قايعىلى وقيعادان ەكى پوليتسيا قىزمەتكەرى كوز جۇمدى. بىرەۋى اۋىر جاراقات الىپ، اۋرۋحاناعا جەتكىزىلگەن.

1992 جىلعى ازامات مىنگەن كولىك الدىمەن باقىلاۋ-وتكىزۋ بەكەتىنە، سوسىن پوليتسيا كولىگىنە سوعىلعان.

قايعىلى وقيعادان كەيىن ءىىم تەكسەرىس جۇرگىزىپ، الدىن الۋ جۇمىستارىن جۇرگىزۋدە ولقىلىقتار ورىن الدى دەگەن شەشىمگە توقتاعان. ءتارتىپ بۇزعان قىزمەتكەرلەرگە دەر كەزىندە ءتيىستى شارالار قولدانىلماعان ەكەن. سونىمەن قاتار، باق-قا اقپاراتتى بۇرمالاپ ۇسىنۋ فاكتىسىنە دە باعا بەرىلگەن. ءسويتىپ، مينيستر ەرلان تۇرعىمباەۆتىڭ بۇيرىعى بويىنشا 9 پوليتسەيگە تارتىپتىك جازا بەرىلگەن3 پوليتسەي قىزمەتىنەن بوساتىلعان.

Abai.kz

1 پىكىر