قر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى توراعاسىنىڭ بۇرىنعى جانە قازىرگى ورىنباسارلارى شامامەن 400 ميلليون تەڭگە جىمقىردى دەگەن كۇدىكپەن ۇستالدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى حابارلادى.

ولار ريددەر قالاسىندا سالىنعان وقۋ كورپۋسىنا قاتىستى اقشا جىمقىرعان دەگەن كۇدىككە ىلىنگەن.

«شىعىس قازاقستان وبلىسىنىڭ سىبايلاس جەمقورلىققا قارسى قىزمەتى سوتقا دەيىنگى تەرگەۋ بارىسىندا اسا ءىرى كولەمدە بيۋدجەت قاراجاتىن جىمقىرۋ فاكتىلەرى بويىنشا قر قىلمىستىق-پروتسەسسۋالدىق ءىس جۇرگىزۋ كودەكسىنىڭ 128-بابىنا سايكەس قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتى توراعاسىنىڭ بۇرىنعى جانە قازىرگى ورىنباسارىن ۇستاپ، وسكەمەن قالاسىنداعى ۋاقىتشا ۇستاۋ يزولياتورىنا قامادى», - دەلىنگەن حابارلامادا.

ۇستالعانداردىڭ بىرەۋىنە قاتىستى سوت 2 اي مەرزىمگە «قاماۋعا الۋ» تۇرىندەگى بۇلتارتپاۋ شاراسىن سانكتسيالادى.

«ولار ريددەر قالاسىنداعى «رەسپۋبليكالىق مامانداندىرىلعان وليمپيادالىق رەزەرۆتىك مەكتەپ-ينتەرناتى» رمم-ءنىڭ 300 ورىنعا ارنالاعان وقۋ كورپۋسى» قۇرىلىس وبەكتىسىن سالۋ كەزىندە ءىس جۇزىندە ورىندالماعان جۇمىس ءۇشىن مەردىگەردىڭ شوتىنا 380,8 ملن تەڭگە سوماسىندا بيۋدجەت قاراجاتىن اۋدارۋ ارقىلى جىمقىردى دەگەن كۇدىككە ءىلىندى», - دەلىنگەن.

قازىرگى ۋاقىتتا اتالعان فاكتىلەر بويىنشا سوتقا دەيىنگى تەرگەۋ جۇرگىزىلۋدە، تەرگەۋ مۇددەلەرى ءۇشىن باسقا اقپارات جاريا ەتىلمەيدى. كۇدىكتىلەرگە قاتىستى تۇپكىلىكتى شەشىمدى ولاردىڭ كىناسىنىڭ دارەجەسىن انىقتاي وتىرىپ، سوت شەشەدى.

Abai.kz