جەكسەنبى, 20 قىركۇيەك 2020
COVID-19 قازاقستاندا. جۇقتىرعاندار — 107199. جازىلعاندار — 101822. قايتىس بولعاندار — 1671
دەپ جاتىر 3836 17 پىكىر 26 مامىر, 2020 ساعات 14:21

ەڭ «كۇشتى» اكىم كىم؟ 

بۇگىندە كوروناۆيرۋس پاندەمياسى ەل ەكونوميكاسى مەن الەۋەتىنە ايتارلىقتاي كەرى اسەرىن تيگىزىپ وتىر. بۇل تۇرعىدا مەملەكەت تاراپىنان قابىلدانعان شارالار قانشالىقتى ناتيجەلى بولادى، بۇل اۋەلى ايماق باسشىلارىنىڭ اتقارعان جۇمىسىنا قاراي بەلگىلى بولماق. 

ال جۋىردا مەديا تەحنولوگيالار ورتالىعىنىڭ اناليتيكالىق قىزمەتى اكىمدەردىڭ توتەنشە جاعداي كەزىندە اتقارعان جۇمىستارىنا باعا بەرىپ، ولاردىڭ ءساۋىر ايىنداعى رەيتينگىن جاساپتى.

اتالعان رەيتينگتى وقىرمان نازارىنا ۇسىنىپ وتىرمىز. ءسويتىپ، ساۋىردەگى «سۋپەر اكىم» جامبىل وبلىسىنىڭ 67 جاستاعى اكىمى بەردىبەك ماشبەكۇلى بولىپتى. ال توپ باستاعان ۇشتىككە 67-دەگى الماتى وبلىسى اكىمى اماندىق باتالوۆ پەن 45-تەگى قاراعاندى وبلىسىنىڭ اكىمى جەڭىس قاسىمبەك كىرىپتى.

1. بەردىبەك ساپارباەۆ - جامبىل وبلىسىنىڭ اكىمى

67 جاستا.

ساۋىردەگى اكىميدەر رەيتينگىنىڭ كوشباسىندا بەردىبەك ساپارباەۆ تۇر. ول جامبىل وبلىسىنا بيىل اقپان ايىنداعى قازاق-دۇنگەن قاقتىعىسىنان كەيىن تاعايىندالعان بولاتىن.

ءسويتىپ، ۇلتارالىق قاقتىعىستى شەشكەننەن كەيىن ول وڭىردەگى وزەكتى ماسەلەنىڭ ءبىرى ءبىلىم سالاسىنا نازار اۋداردى. ساپارباەۆتىڭ ايماقتاعى مەكتەپتەرگە جاساعان رەيد ناتيجەسىندە كوپتەگەن اۋدان مەكتەپتەرىندە كومپيۋتەر جەتىسپەيتىندىگى، ال 125 اۋىلدىق ەلدىمەكەندە ينتەرنەت دەگەن مۇلدەم جوق ەكەنى انىقتالدى. ناتيجەسىندە جامبىل وبلىسى قاشىقتان وقىتۋعا دايىن بولماي شىقتى.

سونىمەن قاتار، ساپارباەۆ قوعامدىق كولىكتىڭ ناشار جۇمىس ىستەۋى، ايالدامالاردىڭ، جولداردىڭ ساپاسىزدىعى، قوقىستاردىڭ كوپتىگى، اشىق ليۋكتەر، اعاشتاردىڭ زاڭسىز كەسىلۋى جانە تاعى باسقا كەلىپ تۇسكەن شاعىمدار بويىنشا قالا باسشىلارى مەن قالا اكىمدىگىنىڭ قىزمەتكەرلەرىن ايىپتادى.

ودان بولەك، ساپارباەۆ ايماقتاعى قىتايلىق مەردىگەرلەردەن جىل سايىن جۇمىسشىلاردىڭ جالاقىسىن كەم دەگەندە 10 پايىزعا ارتتىرۋدى تالاپ ەتتى. ساپارباەۆتىڭ بۇل مالىمدەمەسى جەرگىلىكتى تۇرعىنداردىڭ كوڭىلىنەن شىقتى.

الداعى ۋاقىتتا بەردىبەك ماشبەكۇلى ايماقتاعى سۋارمالى جەرلەرگە قىرعىزستاننان كەلەتىن سۋدىڭ جەتىسپەۋشىلىگى مەن اۋىلشارۋاشىلىق تەحنيكالارىنىڭ جەتىسپەۋشىلىگى ماسەلەسىن شەشۋى ءتيىس.

2. اماندىق باتالوۆ - الماتى وبلىسىنىڭ اكىمى

67 جاستا. 2014 جىلدىڭ تامىزىنان بەرى الماتى وبلىسىنىڭ اكىمى.

اماندىق باتالوۆ - بۇل رەيتينگتەگى باستى فاۆوريتتەردىڭ ءبىرى. ءساۋىر ايىندا ونىڭ يميدجىنە بىرنەشە وقيعالار اسەر ەتكەن ەكەن. سونىڭ ىشىندە، وسىمدىك مايلارىن شىعارۋ ءۇشىن مايلى داقىلداردى وڭدەۋمەن اينالىساتىن «جەتىسۋ ماجيكو» اگروونەركاسىپ كەشەنىنىڭ اشىلعانى تۋرالى ايتۋ كەرەك. زاۋىتتا 50 ادام جۇمىس ىستەيدى. جالپى باتالوۆتىڭ ايتۋىنشا، بيىل وبلىستا 65 مىڭ جاڭا جۇمىس ورنى اشىلادى.

سونىمەن قاتار، ول مەديتسينا قىزمەتكەرلەرىنە سىيلىقاقى تولەۋ ءۇشىن وبلىستىق بيۋدجەتتەن 137 ميلليون تەڭگە ءبولدى. بۇل دا ونىڭ رەيتينگىنە وڭ اسەر ەتىپتى.

ءوڭىر باسشىسىنىڭ پاندەميا مەن كارانتين جاعدايىندا ايماقتى گازداندىرۋ جۇمىسىن توقتاتپاۋ تۋرالى شەشىمى ەل ىشىندە وڭ باعالانعان ەكەن.

3. جەڭىس قاسىمبەك - قاراعاندى وبلىسىنىڭ اكىمى

45 جاستا. 2019 جىلدىڭ قىركۇيەگىنەن بەرى قاراعاندى وبلىسىنىڭ اكىمى.

جەڭىس قاسىمبەك ساۋىردەگى اكىمدەردىڭ رەيتينگىندە «ۇزدىك ۇشتىككە» ەندى. ونىڭ فاۆوريتتەر قاتارىنان تابىلۋى كەزدەيسوق ەمەس. رەيتينگ تۇزگەن سايتتىڭ جازۋىنشا، قاسىمبەك باستاعان ايماق ءوزىنىڭ ەكونوميكالىق جاعدايىن ەداۋىر جاقسارتقان. اسىرەسە ونەركاسىپتىك ءوندىرىس، فارماتسەۆتيكا، جەڭىل ونەركاسىپ، ماشينا جاساۋ جانە مەتاللۋرگيا سالالارىندا ءوسىم بايقالعان.

سونداي-اق، قاراعاندى ​​وبلىسىندا بىلتىرعى جىلمەن سالىستىرعاندا ەگىس كولەمى وسكەن. تۇقىممەن تولىق قامتاماسىز ەتىلىپ، سۋبسيديا رەتىندە قوماقتى قاراجات ءبولىندى.

جانە تۇرعىن ءۇي قۇرىلىسىنىڭ ءوسىمى 7% قۇرادى. ءوندىرىس پەن ينجينيرينگ سالاسىندا جاڭا وندىرىستەر ىسكە قوسىلعان (Yutong اۆتوبۋس زاۋىتىنىڭ قۇرىلىسى).

كوروناۆيرۋسقا بايلانىستى ساۋىردە قاراعاندىدا ۆيرۋسولوگيا زەرتحاناسى مەن جاڭا ەمحانا اشىلىپتى. وندا 20 مىڭ ادامعا دەيىن تىركەۋگە بولادى دەلىنگەن، رەسمي اقپاراتتا. .

قاسىمبەكتىڭ رەيتينگىنە وڭ اسەر ەتكەن شەشىمى - كارانتين كەزىندە مەملەكەتتىك قىزمەتتەرگە تاريفتەردى 5% تومەندەتۋ بولعان-مىس.

4. ارحيمەد مۇحامبەتوۆ - قوستاناي وبلىسىنىڭ اكىمى

47 جاستا. 2015 جىلدىڭ قىركۇيەگىنەن بەرى قوستاناي وبلىسىنىڭ اكىمى.

ارحيمەد مۇحامبەتوۆتىڭ قوستاناي وبلىسىنىڭ اكىمى رەتىندەگى باستى جەتىستىگى - وبلىستىڭ تۇراقتى ەكونوميكالىق دامۋى دەيدى. ايماقتاعى ونەركاسىپ ءوندىرىسى، اتاپ ايتقاندا ماشينا جاساۋ جانە مەتاللۋرگيا سالالارىندا ءوسىم بايقالادى. سونىمەن قاتار، اۋىل شارۋاشىلىعىنداعى ءونىم كولەمى ءوسىپ، بىرنەشە قۇرىلىس نىسانى اياقتالعان. جانە تۇرعىن ءۇيدى پايدالانۋعا بەرۋ كولەمى دە ارتىپتى.

كوروناۆيرۋس پاندەمياسىنا بايلانىستى وتكەن ايدا وڭىردە COVID-19 دياگنوستيكالىق زەرتحاناسى اشىلعان.

5. دانيال احمەتوۆ - شىعىس قازاقستان وبلىسىنىڭ اكىمى

65 جاستا. 2014 جىلدىڭ قاراشاسىنان بەرى شقو اكىمى.

ۇزدىك بەستىكتى احمەتوۆ تۇيىندەيدى. ونىڭ بەدەلىنە اسەر ەتكەن باستى وقيعا - وسكەمەندەگى 56 جىل بويى جاڭارتىلماعان ترامۆاي رەلستەرىن قايتا جوندەۋ جۇمىستارىنىڭ قولعا الىنعانى جانە سەمەيدە جاياۋ جۇرگىنشىلەرگە ارنالعان كوشە قۇرىلىسىنىڭ باستالۋى بولدى.

وبلىستا كوروناۆيرۋس كەزىندە ينفەكتسيا وشاعى دەر كەزىندە وقشاۋلاندى.

الايدا، جەكە كاسىپكەرلەر بەرگەن رۇقساتنامالار باسقا ماقساتتارعا پايدالانىلدى جانە تالونداردىڭ ءبىر بولىگى اقىلى تۇردە بەرىلگەن.

6. ەرمەك مارجىقپاەۆ - اقمولا وبلىسىنىڭ اكىمى

50 جاستا. 2019 جىلدىڭ ناۋرىزىنان بەرى اقمولا وبلىسىنىڭ اكىمى.

ونىڭ رەيتينگىنە اسەر ەتكەن جاعىمدى فاكتور - ايماقتاعى سۋ تاسقىنى جاعدايىنىڭ تۇراقتى بولۋى. سەبەبى، بيىل قاردىڭ قالىڭ ءتۇسۋى كوكتەمدەگى سۋ تاسقىنىنىڭ قاۋپىن ارتتىردى. الايدا، جەدەل ارەكەت پەن الدىن الۋ شارالارىنىڭ ناتيجەسىندە تۇرعىن ۇيلەردى سۋ باسقان جوق.

بىراق، مارجىقپاەۆتىڭ بەدەلىنە اياق استى كوتەرىلگەن داۋىل كەرى اسەر ەتتى. كوكشەتاۋدا بولعان داۋىل سالدارىنان 162 ۇيگە زاقىم كەلىپ، وبلىس ورتالىعى مەن وبلىستىڭ بىرقاتار اۋداندارىندا ەلەكتر قۋاتى ءۇزىلدى. تۇرعىن ۇيلەردىڭ، الەۋمەتتىك نىسانداردىڭ شاتىرى، كوشە جارىعىنىڭ بارلىق دەرلىك شامدارى مەن كابەلدىك جەلىلەرى زاقىمدالعان. داۋىلدىڭ اسەرىنەن ايالدامالار بۇزىلدى. سالدارىنان ادامدار زارداپ شەكتى. 30 ادام ءارتۇرلى دارەجەدەگى جاراقاتتار الىپ، ەكى ادام رەانيماتسيادا قايتىس بولدى.

بيۋروكراتيالىق ماسەلەلەرگە بايلانىستى كوپتەگەن ۇيلەر ءۇش اپتادان استام ۋاقىت بويى شاتىرسىز تۇردى.

كوروناۆيرۋسقا بايلانىستى اكىمدىك ءوز بيۋدجەتى ەسەبىنەن كوشەلەر مەن اۋلالاردى زالالسىزداندىرۋعا ارنالعان شاعىن كولەمدى ماشينالار ساتىپ الدى. سونىمەن قاتار، كوروناۆيرۋس ينفەكتسياسىن تەكسەرەتىن ەلدەگى العاشقى زەرتحانالاردىڭ ءبىرى اشىلدى.

7. باقىتجان ساعىنتاەۆ - الماتى قالاسىنىڭ اكىمى

56 جاستا. 2019 جىلدىڭ ماۋسىمىندا الماتى اكىمى بولىپ تاعايىندالدى.

ساعىنتاەۆ كارانتين كەزىندە 280 ادامعا ارنالعان اۋرۋحانا قۇرىلىسىن باستادى. قۇرىلىستىڭ مودۋلدىك تەحنولوگياسى 18 كۇندە كارانتيندىك ورتالىق قۇرۋعا مۇمكىندىك بەردى.

تاعى ءبىر جاعىمدى جاڭالىق رەتىندە مەديتسينا قىزمەتكەرلەرىنە جالاقى  تاعايىنداۋ مەن كوروناۆيرۋستىڭ الدىن الۋعا باعىتتالعان ناسيحات جۇمىستارىن اتاپ وتۋگە بولادى.

سونداي-اق، ول بيزنەس ءۇشىن بەرەشەك پەن قارجىلىق اۋىرتپالىقتى ازايتۋ ءۇشىن جۇيەلى شارالار قابىلدادى.

الايدا، ەلدەگى كوروناۆيرۋس بويىنشا ەڭ ناشار كورسەتكىش الماتىدا بولىپ وتىر.

سونداي-اق، ءساۋىردىڭ باسىندا باق الماتىداعى ءۇيسىز ادامداردىڭ قالادان شىعارىلعان ۆيدەوسىن جاريالادى. الايدا، الماتى اكىمى مۇنى جوققا شىعارىپ، ۇيسىزدەر ءۇشىن 300 ورىندىق شاتىرلى لاگەر قۇرعانىن ايتتى.

8. وڭداسىن ورازالين - اقتوبە وبلىسىنىڭ اكىمى

56 جاستا. 2019 جىلدىڭ اقپانىنان بەرى اقتوبە وبلىسىنىڭ اكىمى.

ءورازاليننىڭ رەيتينگىنە اسەر ەتكەن فاكتورلاردىڭ ءبىرى - تج كەزىندە كوممۋنالدىق قىزمەت تاريفتەرى قالادا 20%-عا، اۋدانداردا 50%-عا دەيىن تومەندەتىلدى. ۆيرۋس جۇقتىرعان ادامداردى ەمدەۋ جانە تەكسەرۋمەن اينالىساتىن دارىگەرلەر ناۋرىز ايىندا جالاقىلارىن ەكى ەسەگە ارتتىردى.

سونىمەن قاتار، و.ورازالين كارانتين كەزىندە اقتوبە قالاسىنىڭ تۇرعىندارىنا قىزمەت كورسەتەتىن مەكەمەلەردى جانە قالىپتى جۇمىس ىستەيتىن تاماق وندىرەتىن كاسىپورىنداردىڭ جۇمىسىن تەكسەردى. ايتپاقشى، وبلىستىڭ ازىق-تۇلىك قاۋىپسىزدىگىن قامتاماسىز ەتۋگە ءوڭىر بيۋدجەتىنەن 800 ميلليون تەڭگە بولىنگەن.

ايتا كەتەيىك، ءساۋىر ايىندا اقتوبەگە قىتايدان گۋمانيتارلىق كومەك كەلدى.

9. عالي ەسقاليەۆ - باتىس قازاقستان وبلىسىنىڭ اكىمى

50 جاستا. 2019 جىلدىڭ ماۋسىمىنان بەرى بقو اكىمى.

وڭىردەگى جۇمىس ورىندارىنىڭ ساقتالۋى جانە ينۆەستيتسيالىق جوبالاردىڭ ارقاسىندا جاڭا جۇمىس ورىندارىنىڭ اشىلۋى ەسقاليەۆتىڭ بەدەلىنە وڭ اسەر ەتتى.

بىراق ايماقتاعى سىبايلاس جەمقورلىق دەڭگەيى عالي ەسقاليەۆتىڭ رەيتينگىنە ايتارلىقتاي كەرى اسەرىن تيگىزدى.

10. گۇلشارا ابدىحالىقوۆا - قىزىلوردا وبلىسىنىڭ اكىمى

55 جاستا. 2020 جىلدىڭ ناۋرىزىندا قىزىلوردا وبلىسى اكىمى بولىپ تاعايىندالدى. تاۋەلسىز قازاقستان تاريحىندا وبلىس اكىمى بولعان العاشقى ايەل.

ابدىقالىقوۆا اكىم بولعان ساتتەن وبلىس اۋداندارىن ارالاپ، مەديتسينالىق مەكەمەلەردىڭ، اۆتوۆوكزالداردىڭ جانە باسقا دا الەۋمەتتىك نىسانداردىڭ جاعدايىمەن تانىستى.

ەندى ونىڭ الدىندا اپاتتىق جاعدايدا تۇرعان قىزىلوردا سۋ ەلەكتر ستانساسىن قايتا قۇرۋ، ەكونوميكانى ءارتاراپتاندىرۋ، «كوشەرباەۆ» ءداۋىرىنىڭ ەكونوميكالىق كورسەتكىشتەرىن، اتاپ ايتقاندا ينۆەستيتسيالار كولەمىن ساقتاۋ مىندەتى تۇر.

11. قۇمار اقساقالوۆ - سولتۇستىك قازاقستان وبلىسىنىڭ اكىمى

54 جاستا. 2017 جىلدىڭ ناۋرىزىنان بەرى سقو اكىمى.

وتكەن ايدا اقساقالوۆتىڭ بەدەلىنە بىرنەشە فاكتورلار كەرى اسەرىن تيگىزدى. ونىڭ نەگىزگىلەرى - كوكتەم كەلسە دە قالا كوشەلەرىنىڭ قوقىستان تازالانباۋى، وڭىردەگى ەت تاپشىلىعى مەن مال شارۋاشىلىعى سالاسىنىڭ توقىراۋى ت.ب.

الايدا، ايماقتاعى سەگىز اۋماقتىق دەپارتامەنتتەردىڭ بىرىگۋى جانە باسقا اگەنتتىكتىڭ تاراتىلۋى جەرگىلىكتى بيلىك قابىلداعان وڭ شەشىمدەردىڭ ءبىرى بولدى. بولاشاقتا مۇنداي قىسقارتۋ بيۋدجەت قاراجاتىن ۇنەمدەۋگە، باسشىلىق پەن شەشىم قابىلداۋ ۋاقىتىن قىسقارتۋعا اسەر ەتەدى.

بىراق، سولتۇستىك قازاقستان بيلىگىنىڭ يميدجىنە سىبايلاس جەمقورلىقتىڭ كوبەيۋى كەرى اسەرىن تيگىزدى.

12. ماحامبەت دوسمۇحامبەتوۆ - اتىراۋ وبلىسىنىڭ اكىمى

59 جاستا. 2019 جىلدان بەرى اتىراۋ وبلىسىنىڭ اكىمى.

ماحامبەت دوسمۇحامبەتوۆ بۇقارالىق اقپارات قۇرالدارىندا ەڭ از ايتىلعان اكىم.

13. مۇرات ايتەنوۆ - شىمكەنت قالاسىنىڭ اكىمى

38 جاستا. 2020 جىلدىڭ قاڭتارىنان بەرى شىمكەنت قالاسىنىڭ اكىمى.

ايتەنوۆتىڭ دە اكىم بولعانىنا كوپ ۋاقىت وتە قويعان جوق. دەگەنمەن، وڭتۇستىك مەگاپوليس - كوروناۆيرۋسقا شالدىققان ادامدارعا ارنالعان ءمودۋلدى اۋرۋحانا سالىنۋعا ءتيىس قالالاردىڭ ءبىرى ەدى. الايدا كوپ ۇزاماي قۇرىلىس جۇمىسى توقتاتىلدى. اكىمدىك نىساننىڭ العاشقى جوباسى قابىلدانباعانىن، قازىر جاڭا جوبا قاراستىرىلىپ جاتقانىن ايتتى.

جەرگىلىكتى تج ءبولىمى تولىققاندى جۇمىسىن توقتاتقاننان كەيىن ايتەنوۆتىڭ رەيتينگى تومەندەدى.

سونىمەن قاتار، ساۋىردە قالاداعى كەيبىر جول توسقاۋىلدارىندا تاماق تاپشىلىعى سەزىلدى.

رەيتينگ اۋتسايدەرلەرى

14. سەرىكباي تۇرۇموۆ - ماڭعىستاۋ وبلىسىنىڭ اكىمى

55 جاستا. 2019 جىلدىڭ ماۋسىمىنان بەرى ماڭعىستاۋ وبلىسىنىڭ اكىمى.

ءساۋىر ايىندا تۇرۇموۆ ءوز پوزيتسياسىن كۇشەيتەتىن ەشتەڭەمەن ەرەكشەلەنبەدى. وتكەن ايدا ول ءىرى نىساندار قۇرىلىسىنىڭ ساپاسىن تەكسەرىپ، مەملەكەت باسشىسى قاسىم-جومارت توقاەۆپەن تەلەفون ارقىلى سويلەستى. ونىڭ جەدەل جاردەم قىزمەتكەرلەرىنە ەكى جالاقى مولشەرىندە سىياقى ءۇشىن 78 ميلليون تەڭگە ءبولۋ تۋرالى شەشىمى بەدەلىنە وڭ اسەر ەتتى.

جالپى، ايماقتا كوروناۆيرۋس ينفەكتسياسى بويىنشا جاعداي تۇراقتى.

اكىمنىڭ بەلسەندىلىگىنىڭ تومەن بولۋى ونىڭ بەدەلىنە نۇقسان كەلتىرۋدە.

15. ومىرزاق شوكەەۆ - تۇركىستان وبلىسىنىڭ اكىمى

56 جاستا. 2019 جىلدىڭ اقپانىنان بەرى تۇركىستان وبلىسىنىڭ اكىمى.

وتكەن ايدا ومىرزاق شوكەەۆتىڭ رەيتينگى كەنەت تومەندەدى. بۇل تۇركىستان وبلىسىنداعى قىرىققاباتتىڭ دۇرىس يگەرىلمەۋىنە بايلانىستى بولدى. اكىمنىڭ ايتۋىنشا، باسقا ايماقتار قىرىققابات ساتىپ الۋدان باس تارتادى، سوندىقتان رەسەيگە كوكونىستەردى ەكسپورتتاۋدا ۇلكەن قيىندىقتار بار. ال،  بلوگەرلەر مەن بۇقارالىق اقپارات قۇرالدارى شوكەەۆتىڭ قىرىققابات ماسەلەسىن شەشە الماعانىن سىنعا الىپ، ونى: «ورتالىقتان كومەك سۇراي المايتىن مەنەدجەر»، دەپ تانىدى.

سونىمەن قاتار، ماقتاارال اۋدانىنداعى سۋ تاسقىنى جانە وبلىس اكىمدىگىنىڭ بلوگەر ايگۇل ورىنبەكتى قۋدالاۋى دا ونىڭ كەلەسى ايداعى يميدجىنە اسەر ەتپەك.

ارينە، تۇركىستانداعى بارلىق قۇرىلىس جۇمىستارى بەلگىلەنگەن مەرزىمدە ءجۇرىپ جاتقانىن جانە ۋاقىتىندا اياقتالاتىندىعىن، سونداي-اق وبلىس ورتالىعىنداعى اباتتاندىرۋ مەن كوگالداندىرۋ جۇمىستارىن ەسكەرگەن ءجون.

الايدا، تۇركىستان وبلىسى ەرلەر، ايەلدەر جانە كامەلەتكە تولماعان بالالار اراسىنداعى سۋيتسيد بويىنشا رەسپۋبليكادا العاشقى ساپتا. تاعى ءبىر الاڭداتارلىق ماسەلە - كامەلەتكە تولماعاندارعا قاتىستى جاسالعان قىلمىستار سانى بويىنشا تۇركىستان وبلىسى ءبىرىنشى ورىندا تۇر.

16. ابىلقايىر ىسقاقوۆ - پاۆلودار وبلىسىنىڭ اكىمى 

45 جاستا. 2020 جىلدىڭ قاڭتارىنان بەرى پاۆلودار وبلىسىنىڭ اكىمى.

پاۆلودار وبلىسىندا ۆيرۋس جۇقتىرعاندار سانى تەز وسۋدە. مۇنىڭ باستى سەبەپتەرى - كارانتيننىڭ بۇزىلۋى جانە شەنەۋنىكتەر مەن دارىگەرلەر تاراپىنان ءتيىستى باقىلاۋدىڭ بولماۋى. ماسەلەن، ەكىباستۇز تۇرعىندارىنا  كارانتين كەزىندە پيكنيكتەرگە شىعۋعا رۇقسات بەرىلدى. ايماقتا ۆيرۋس جۇقتىرعانداردىڭ 65 پايىزى ەكىباستۇز قالاسىندا. ىسقاقوۆ بۇعان بايلانىستى قالا اكىمىنە سوگىس جاريالادى.

ودان بولەك، پاۆلودار وبلىسىنىڭ بيلىگى زيانكەستەرمەن كۇرەسكە 600 ميلليوننان استام تەڭگە جۇمساۋ تۋرالى شەشىم قابىلدادى. بۇل باسقا وڭىرلەردەگى شىعىننان 10 ەسە ارتىق. الايدا، اكىمدىك بۇعان ءالى تۇسىنىك بەرگەن جوق.

17. التاي كولگىنوۆ - نۇر-سۇلتان قالاسىنىڭ اكىمى

42 جاستا. 2019 جىلدىڭ ماۋسىمىنان بەرى نۇر-سۇلتان قالاسىنىڭ اكىمى.

ءساۋىر ايىنىڭ قورىتىندىسى بويىنشا استانانىڭ اكىمى التاي كولگىنوۆ ەڭ تومەنگى ورىندا قالدى. وعان سەبەپ - استانا ىرگەسىندەگى سۋ تاسقىنى، العاشقى نوسەر جانە باسقا دا ماسەلەلەر بولدى.

وتكەن ايدا استانالىقتار اۋلالارداعى تازارتىلماعان قوقىستارعا شاعىمداندى.

سونداي-اق، 125 ملن.تەڭگە تەندەرگە بايلانىستى داۋ استانا اكىمىنىڭ ساۋىردەگى بەدەلىنە ايتارلىقتاي كەرى اسەر ەتتى.

ءتۇيىن. سونىمەن، مەديا ورتالىق جاساعان اكىمدەردىڭ ساۋىردەگى رەيتينگى وسىنداي بولىپتى. بۇل - اتالعان ورتالىق ۇسىنعان پىكىردى جالپاق جۇرتقا تاڭۋ ەمەس، تۇزىلگەن رەيتينگتى وقىرمان تالقىسىنا ۇسىنۋ. ەلدەگى اكىمدەردىڭ اتقارعان نەمەسە اتقارماعان جۇمىسى تۋرالى ءار ادام وزىنشە پىكىر بىلدىرۋگە قۇقىلى. ەندەشە، ەل باسقارعان شەندىلەردىڭ جۇمىسىنا ءسىز قانداي باعا بەرەسىز؟ سىزشە ەلدەگى ەڭ «كۇشتى» اكىم كىم؟

دايىنداعان نۇربيكە بەكسۇلتانقىزى

Abai.kz

17 پىكىر