بەيسەنبى, 6 تامىز 2020
COVID-19 قازاقستاندا. جۇقتىرعاندار — 95942. جازىلعاندار — 68871. قايتىس بولعاندار — 1058
46 - ءسوز 6909 4 پىكىر 25 مامىر, 2020 ساعات 13:13

كەشە عانا سايلانعان پرەمەر سوتتالايىن دەپ جاتىر...

يزرايلدە پرەمەر-مينيستر نەتانياحۋدىڭ ۇستىنەن قىلمىستىق ءىس قوزعالىپ، ول سوتقا تارتىلىپ جاتىر. ەسكەرەتىن ءبىر ءجايت: وتستاۆكاعا كەتكەن ۇكىمەت باسشىسى ەمەس، ءدال بۇگىن ەلدى باسقارىپ وتىرعان، ءالى دە تاعىنان تايماعان، بىرنەشە دۇركىن سايلاۋدا جەڭىپ، تاعى دا پرەمەر بوپ سايلانعان ادام سوتتالايىن دەپ جاتىر!

بىزدە بولسا، قىزمەتتە جۇرگەندە جوعارى شەندىلەرگە ءىس قوزعاۋدى بىلاي قويعاندا، ولار تۋرالى ءسوز قوزعاۋدىڭ ءوزى ەكىتالاي! بىزدە باسشىلار تەك لاۋازىمىنان كەتكەننەن كەيىن عانا ءىستى بولىپ جاتادى.

يزرايلدەگى جاعداي اتقارۋشى بيلىك پەن سوت بيلىگىنىڭ ءبىر-بىرىنە تاۋەلسىز بولۋىنان ورىن الىپ وتىر. بىزدەگى احۋال بەسەنەدەن بەلگىلى.

ءيا، ءيزرايلدىڭ ساياسي ءومىرىنىڭ ءوز زاڭدىلىقتارى بار. ءيا، بۇل ءبىر-ءبىرىنىڭ ارتىن شۇقىلاپ وتىراتىن ەكى جاق بار ساياسي باسەكەنىڭ ءبىر كورىنىسى. ءيا، بۇل قارسىلاستارىنىڭ لاس ارەكەتى بولۋى ابدەن ىقتيمال. ءيا، بالكىم، ەرتەڭ وعان تاعىلعان ايىپ وتىرىك بولىپ شىعۋى مۇمكىن.

ءبارى مۇمكىن.

بىراق، قالىپتاسقان جۇيەنىڭ زاڭدىلىعى سول: ەل باسقارىپ وتىرساڭ دا، سەنى سوتتاۋى مۇمكىن.

جانە دە ەگەر ەش كىناسى جوق بولسا، پرەمەر ءوزىن اقتاپ الادى. وعان دا بار مۇمكىندىك جاسالعان.

مەنىڭشە، كوررۋپتسيا مەن جەمقورلىق قارسى كۇرەستىڭ ەڭ باستى ءبىر شارتى وسى: بيلىكتىڭ ءۇش تارماعى - زاڭ شىعارۋشى، اتقارۋشى جانە سوت - ءبىر-بىرىنە باعىنباي، ءدال وسىلاي قىزمەت اتقارۋ كەرەك!

سوندا ءاربىر شەندى ەرتەڭ سوتقا تارتىلاتىنىن ءبىلىپ، تارتىنىپ جۇرەر ەدى!

ەرتە مە، كەش پە - ءبىز دە سونداي جۇيەگە جەتەتىنىمىزگە مەن كامىل سەنەمىن!

PS. وسىندايدا پرەزيدەنت، پرەمەر، مينيستر، اكىمدەردىڭ قىزمەتتەرىنە جابىسىپ، ايرىلمايتىنىنىڭ سەبەبىن تۇسىنە بەرىڭىز: قولىنداعى بيۋروكراتيالىق، اكىمشىلىك مۇمكىندىكتەرىنەن جۇرداي بولاتىنىن ءبىلىپ، ولار جىلى ورنىمەن قوشتاسقىسى كەلمەيدى. قىزمەتسىز ولار سوت الدىنا بارۋدان ولەردەي قورقادى. سوندىقتان دا وزدەرىنە "كرىشا" بولعان قۇباجىق جۇيە ىشىندە انا قىزمەتتەن مىنا قىزمەتكە اۋىسىپ، شەندىلىك "يممۋنيتەتتەن" قول ۇزگىسى كەلمەيدى. دەپۋتاتتاردىڭ يممۋنيتەتى ءوز الدىنا بولەك اڭگىمە. سودان بولار، كەشەگى اكىمقارالاردىڭ ءبارى دەپۋتات بولۋعا ۇمتىلادى!

ءامىرجان قوساننىڭ جەلىدەگى جازباسى

Abai.kz

4 پىكىر