دۇيسەنبى, 6 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
462 0 پىكىر 25 مامىر, 2020 ساعات 10:41

الماتىدا قانداي نىساندار جۇمىسىن باستادى؟

الماتىدا 25 مامىردان باستاپ، كەيبىر تاماقتانۋ ورىندارى مەن ساۋدا ورتالىقتارى، قوناقۇيلەر مەن بۋتيكتەر، ءسان سالوندارى جانە مەيرامحانالار جۇمىسىن باستايدى. 

قالا اكىمدىگىنىڭ حابارلاۋىنشا، الاڭى 500 شارشى مەتردەن استام 138 ساۋدا نىساندارىنىڭ جۇمىسىنا قويىلعان شەكتەۋلەر الىنادى. ال، ساۋدا نىساندارى 23:00-گە دەيىن جۇمىس ىستەيتىن بولادى.

سونىمەن قاتار، بۇگىننەن باستاپ قالاداعى كافە، مەيرامحانالار اشىلادى. ولاردىڭ جازعى الاڭدارىن قوسا العاندا، جالپى سانى شامامەن 27 مىڭ ادامدى قۇرايتىن 3100 نىسان جۇمىسىن باستايدى. الايدا بانكەتتەر مەن سالاتاناتتى تويلار وتكىزۋگە تىيىم سالىنادى. ودان بولەك، اتالعان نىسانداردىڭ اۋماعىنداعى كاراوكە، بيليارد جانە كوڭىل كوتەرەتىن ورىندارعا دا رۇقسات ەتىلمەيدى. كاليان جۇمىسىنا كارانتيننىڭ بۇكىل كەزەڭىندە شەكتەۋ قويىلعان.

سونداي-اق، بۇگىننەن باستاپ قالاداعى 393 قوناق ءۇي قايتا اشىلادى. ياعني، ولاردىڭ قوناق بولمەلەرىن بەرۋگە جانە ءوزىنىڭ اۋماعىندا مەيرامحانالار اشۋعا رۇقسات بەرىلەدى. الايدا، قوناق ۇيلەردەگى سپا، باسسەيندەر جانە ترەناجەر زالدارى ازىرگە اشىلمايدى. حوستەلدەر جۇمىس ىستەمەيدى.

ال، قىزمەتىنە رۇقسات بەرىلگەن ۇيىمداردىڭ وبلىستا تۇراتىن قىزمەتكەرلەرىنە قالاعا كىرۋگە جانە شىعۋعا رۇقسات بەرىلەدى.ولاردىڭ دەرەكتەرى infoalmaty.kz بازاسىنا ەنگىزىلۋ قاجەت. بازاعا ەنگىزۋ جۇمىسقا رۇقسات العاننان كەيىن عانا جۇزەگە اسادى.

بۇدان بولەك، 16 حقكو ءوز جۇمىسىن باستادى. ازىرشە 1500 قىزمەتكەر جۇمىسقا شىعادى.

بازارداعى ساۋداگەرلەرگە دە بۇگىننەن باستاپ جۇمىسقا شىعۋعا رۇقسات بەرىلدى. ازىق-تۇلىكتىك ەمەس بازارلار 1 ماۋسىمدا عانا اشىلادى.

وسىلايشا، قالا اكىمدىگى 25 مامىردان باستاپ، قالادا 84,2 مىڭ ادامدى جۇمىسپەن قامتي وتىرىپ، بارلىعى 3631 كاسىپورىندى ىسكە قوسۋدى  جوسپارلاپ وتىر.

Abai.kz
0 پىكىر