2020 جىلعى 20 مامىردا نيۋ-يوركتىڭ وڭتۇستىك وكرۋگى بويىنشا اقش وكرۋگكتىك سوتى يلياس پەن ۆيكتور حراپۋنوۆتارعا قارسى شەشىم شىعاردى،- دەپ حابارلايدى قر ادىلەت مينيسترلىگى.

مۇددەسىن ادىلەت منيسترلىگى بىلدىرەتىن الماتى قالاسىنىڭ اكىمدىگى، جانە بتا بانك تالاپكەرلەردىڭ تالاپ-ارىزدارىن راستايتىن اقپاراتتى جاۋاپكەرلەردىڭ اشكەرەلەۋىن تالاپ ەتكەن ەدى. تاراپتاردىڭ ۇستانىمدارىن زەردەلەپ بولىپ، سوت يلياس پەن ۆيكتور حراپۋنوۆتاردى سوتپەن «مىسىق-تىشقان ويىنىن» ادەيى ۇيىمداستىردى جانە ولاردىڭ بۇل ءىس-ارەكەتى جازالانۋعا ءتيىس دەگەن شەشىمگە كەلدى. سوت يلياستىڭ جوعالعان ەلەكتروندىق حاتتار تۋرالى سىلتاۋلارىن اقىلعا قونبايدى دەپ تانىدى.

بۇعان دەيىن، سوت مۇحتار ابليازوۆتىڭ وسىعان ۇقساس ءىس-ارەكەتىن جازالاعان ەدى. ول كەزدە ابليازوۆ دالەلدەمەلەردى اشكەرەلەۋ پروتسەدۋراسى بارىسىندا قۇجاتتاردى ۇسىنا الماعان بولاتىن.

سوت الماتى قالاسىنىڭ اكىمدىگى مەن بتا بانكتىڭ تالاپ-ارىزدارىنا تىكەلەي قاتىسى بار بەلگىلى اقپاراتتىڭ حراپۋنوۆتاردىڭ ەستەرىندە جوق ەكەندىگى تۋرالى مالىمدەمەلەرىن جالعان دەپ تانىدى. سوت يلياستى ءتيىستى ايعاقتاردى جويعان دەپ تۇجىرىمدادى.

سۋديا يلياس پەن ۆيكتور حراپۋنوۆتارعا الماتى قالاسى اكىمدىگى مەن بتا بانك زاڭگەرلەرىنە كەتكەن شىعىندارىن تولەۋدى بۇيىردى.

سونىمەن قاتار، سوت حراپۋنوۆتاردىڭ بۇدان بىلاي بەلگىلى دالەلدەمەلەردى ۇسىنۋ قۇقىعى بولمايدى جانە القا بيلەرگە يلياستىڭ دالەلدەمەلەردى ادەيى جويعاندىعى جانە جويىلعان دالەلدەمەلەر مالىمدەلگەن تالاپ-ارىزداردى قولدايتىن ەدى دەگەن نۇسقاۋ بەرىلەدى دەپ قاۋلى ەتتى. بۇعان دەيىن، سوت مۇحتار ابليازوۆقا دا قاتىستى القا بيلەرگە ءدال وسىنداي نۇسقاۋ بەرىلەتىندىگى تۋرالى قاۋلى ەتكەن ەدى.

ودان بولەك، الماتى قالاسى اكىمدىگى مەن بتا بانكىنىڭ فەليكس ساتەرگە قارسى قاتار ءجۇرىپ جاتقان سوت پروتسەسىندە دە سوت تالاپكەرلەردىڭ پايداسىنا شەشىم قابىلدادى. جاۋاپ الۋ بارىسىندا ساتەر حراپۋنوۆتار مەن ابليازوۆتىڭ الماتى قالاسىندا تىڭشىلارى بار ەكەندىگى جانە ونىڭ قاۋىپسىزدىگىنە قاۋىپ-قاتەر ءتونۋى مۇمكىندىگى تۋرالى مالىمدەدى. سوت ءوزىنىڭ شەشىمىندە ابليازوۆتىڭ 2018 جىلى قازاقستاندا بتا بانكتىڭ بۇرىڭعى باسشىسىن ولتىرگەنى جانە كوپتەگەن باسقا دا قىلمىستار ءۇشىن سوتتالعاندىعىن ەسكەرە وتىرىپ، ساتەردىڭ قورقىنىشى سەنۋگە تۇرارلىق ەكەندىگىن اتاپ ءوتتى.

Abai.kz