بيۋدجەت - پرەزيدەنت پەن ۇكىمەتتىڭ ەمەس، حالىقتىڭ اقشاسى!
قايىرىمدىلىق دەگەن جاقسى عوي. قۇي، ول وتاندىق قالتالى بولسىن، قۇي، ول شەتەلدىڭ وليگارحى بولسىن.
بىراق، قازاقستان سەكىلدى جەر قويناۋىندا مەندەلەەۆ تابليتساسىنىڭ بارلىق دەرلىك ەلەمەنتى بار مەملەكەتتىڭ باسقالارعا، سونىڭ ىشىندە شەتەل بايشىكەشىنە قاراپ قالعانى ءبىرتۇرلى ىڭعايسىز ەكەن، شىنىمدى ايتسام، نامىسقا تيەدى ەكەن.
وسى ورايدا ءبىز، قوعام، ءبىر نارسەنى ءتۇسىنۋىمىز قاجەت.
مەملەكەت قازىناسى - پرەزيدەنتتىڭ، ۇكىمەتتىڭ، اكىمنىڭ اقشاسى ەمەس. ول - ءسىز بەن ءبىز كۇندەلىكتى ماڭداي تەرىمىزدەن، ءسىز بەن ءبىزدىڭ سالىقتارىمىزدان، باسقا دا تولەمدەرىمىزدەن قۇرالاتىن قارجى.
ياعني، "بيۋدجەتكە اركىمنىڭ دە بار تالاسى"!
وكىمەت ونى تەك جينايدى.
جانە دە ءتيىستى پروتسەدۋرالار مەن وكىلەتتىكتەر ارقىلى قايدا، قالاي جۇمساۋ كەرەكتىگىن پارلامەنتكە ۇسىنادى.
وسى ورايدا ەكى نارسەنى ۇمىتپاعان ابزال.
بىرىنشىدەن، ول قارجىنىڭ جۇمسالۋ باعىتتارىن پرەزيدەنت، ۇكىمەت، اكىمدەر حالىقپەن اقىلداسىپ، ساناسىپ، ونىڭ مۇقتاجىنا قاراسىپ، انىقتاي الاتىن مەحانيزمى بىزدە جۇمىس ىستەمەيدى.
ماسەلەن، وتكەن داعدارىستا 12 ميلليارد دوللارداي قارجىنى بيلىك اتىستاي جومارتتىق تانىتىپ، جەكە بانكتەرگە كومەك رەتىندە بەرە سالدى. ءسىز بەن بىزبەن ەشكىم اقىلداسقان جوق.
ەندى كەلىپ، دەۆالۆاتسيا، كوروناۆيرۋس، تاسقىن سۋ كەزىندە حالىققا كومەك بەرۋ كەرەك كەزىندە شەندىلەر ءارتۇرلى سىلتاۋ ايتىپ، شومىشتەن قىسىپ جاتىر.
ەكىنشىدەن، جىل سايىن بەكىتىلەتىن بيۋدجەتتە ايتىپ كەلمەيتىن داعدارىس، تابيعي نەمەسە قولدان جاسالعان اپاتتار كەزىندە حالىققا جاردەم رەتىندە بەرىلۋگە ءتيىس قوماقتى قارجى الدىن-الا قاراستىرىلىپ قويۋى كەرەك!
سول قارجى قايدا؟
نە ىستەۋ كەرەك؟
وسىندايدا ءاربىر بيۋدجەتتىك تيىننىڭ ءتيىمدى ءارى حالىق مۇددەسىندە جۇمسالۋىن قاداعالاپ وتىراتىن كوپپارتيالى، پرەزيدەنت پەن ۇكىمەتكە ءتيىستى تالاپ قويا الاتىن پارلامەنت كەرەك!
ول مەحانيزم بولماسا، قالعاننىڭ ءبارى - دالباسا!
ءامىرجان قوساننىڭ جەلىدەگى جازباسى
Abai.kz
