بەيسەنبى, 6 تامىز 2020
COVID-19 قازاقستاندا. جۇقتىرعاندار — 95942. جازىلعاندار — 68871. قايتىس بولعاندار — 1058
46 - ءسوز 1381 2 پىكىر 14 مامىر, 2020 ساعات 14:26

اياقاستى قىلۋعا بولمايتىن دۇنيەلەر بار...

وندا تۇرعان نە بار ەكەن؟ ءاپ-ادەمى!

..دەپ وتە شىعۋعا دا بولار. بىراق، ويلاپ كورىپ ەدىم، مىناداي قورىتىندىلار ءتۇيدىم:

تۇسكيىزگە نەبىر ورنەكتەر، سۋرەتتەر سالاتىن قازاق ونى جورگە توسەيتىن كىلەمگە سالماعان ەكەن. اياقاستى قىلۋعا بولمايتىن دۇنيەلەر بار. ايتپەسە، ديزايننىڭ ءتۇبىن تۇسىرگەن قازاق ەمەس پە ەدى، ەجەلدەن-اق؟ دومبىرانى توسەۋىشكە ورنەكتەي المادى دەپ پە ەدىڭىزدەر؟ ىرىمعا، جونگە قاتتى ماە بەرگەندىكتەن وندايدى اياقاستى قىلماسا كەرەك!

"ناعىز - قازاق دومبىرا" دەمەۋشى مە ەدىك؟ قازاقتىڭ بەينەسىن جەرگە سالىپ، ۇستىنەن حالىقتى جۇرگىزۋدەن نە ايىرماشىلىعى قالدى؟ ۇلى تۇلعالار بەينەلەنگەن كىلەمشەلەر شىعارۋ سالتى بار عوي. "اباي-150", "جامبىل-150" دەگەن. سولاردى بىرەۋلەر بايقاماي جەرگە توسەگەندە شۋلاعان ەدىك. دومبىرانىڭ سيمۆوليكاسى - ۇلى تۇلعالاردان كەم ەمەس بولسا كەرەك، قازاق ءۇشىن.

ءبىز ۇلتتىڭىمىزدان اجىراساق - "ودا تۇرعان نە بار؟" دەگەن ۇعىمنىڭ كەسىرىنەن اجىرايتىن شىعارمىز، وسى. بۇرىن ولاي ەمەس ەدى. قازىر قىزى كۇيەۋىنەن قايتسا دا "ەشتەڭە ەتپەيدى، ودا تۇرعان نە بار" دەيتىن بولدىق. بالانىڭ ءتىلى ورىسشا شىقسا دا كۇلە قاراپ "ودا تۇرعان نە بار" دەيتىن بولدىق. ەرتەڭ سول دومبىرا بەينەلەگەن جەرگە توسەلەتىن كىلەمشەلەر شىققاندا دا ۇندەمەي قويا سالارمىز. ورىستىڭ ءبىر فيلمىندە ەپيزود بوپ ەدى. التىن وردا حانىنىڭ ۇيىنە جالىنىپ كەپ، دەگەنىنە جەتە الماعان ورىس شىعىپ بارا جاتىپ بوساعانى ابدەن تاپتاپ، تاپتاپ كەتەدى. "بوساعانى باسپاۋ" دەگەن قۇندىلىقتىڭ بار ەكەنىن ءبىلىپ، ادەيى جاساعان قىساستىعى. ءيا، ودا تۇرعان تۇك تە جوق دەرمىز، قازىر. بىراق، ءبارى سول قۇندىلىقتاردى اياقاستى ەتىپ ۇيرەتۋدەن باستالادى...

ءتۇرلى پىكىرلەر ايتىلىپ تا جاتىر ەكەن. ءوز پىكىرىم وسى. سالىنىپ قويعان نارسە بولسا، مۇنىڭ ءبارى قۇر ايعاي بوپ تا كورىنەر. دەگەنمەن، قۇمىرسقا قۇرلى بولساق دەگەن نيەت. ىبىراي پايعامباردى وتقا تاستاۋ ءۇشىن عالامات وت دايىنداپ جاتقاندا ءبىر قۇمىرسقا تۇمسىعىنا سۋ تولتىرىپ، وتقا قاراي جۇگىرىپ بارادى ەكەن. سونداعىسى "تىم بولماسا نيەتىمىدى بىلدىرەيىن" دەگەنى ەكەن..

الماس الماتوۆ اعامىزدىڭ ايتقانى بار ەدى: " ءبىز ءتول ونەرىمىزدى ءوزىمىز قۇنسىزداندىرىپ الدىق. تويىمىزعا ءانشى شاقىرامىز دا، دومبىراسىن ارقالاتىپ، ونى بوساعادا دايىندالعان داستارحانعا وتىرعىزىپ قويامىز. ال، اتام قازاق ونەرلى ادام كەلگەندە بىردەن توردەن ورىن بەرۋشى ەدى..." دەپ. بوساعا بىلاي تۇرسىن، اياقاستى قىلعانداي بوپ تۇرمىز-اۋ، دەگەنمەن...

P.S. ەسكيزدى جاساعان كىسىلەردىڭ ونەرى مەن ەڭبەگىنە سىن ايتۋ ويدا جوق. جامان نيەتپەن ىستەمەگەنى بەلگىلى عوي. ورتاق تويعا شىن ىقىلاسپەن جاسالعان دۇنيە. تەك سول ەسكەرىلمەي قالعانى - قۇندىلىقتىڭ اياقاستى بولۋى بوپ تۇر، اتتەڭ...

ەدىگە قۇنىپياۇلى

Abai.kz

2 پىكىر