2016 جىلى حالىقارالىق وليمپيادا كوميتەتىنىڭ تارتىپتىك كوميسسياسى (حوك) مەن سپورتتىق اربيتراجدى سوت (CAS) قازاقستاندىق جەتى اۋىر اتلەت پەن ەكى بالۋاننىڭ XXIX جانە XXX وليمپيادا ويىندارىندا جەڭىپ العان (بەيجىڭ-2008, لوندون-2012) مەدالدارىن جوققا شىعارىپ، ولاردىڭ دوپينگكە قارسى ەرەجەنى بۇزعاندارىن جاريا ەتتى. شەشىمگە سايكەس اتلەتتەر جارىستان شەتتەتىلىپ، ناتيجەلەرى جوققا شىعارىلدى جانە مەدالداردى قايتارۋعا مىندەتتەلدى.

دوپينگپەن ۇستالعان قازاقستاندىق وليمپيادا جۇلدەگەرلەرى: اۋىر اتلەتتەر يليا يلين (التىن مەدال، 2008, 2012), ءزۇلفيا چينشانلو، مايا مانەزا، سۆەتلانا پودوبەدوۆا ء(بارى التىن، 2012), يرينا نەكراسوۆا (كۇمىس، 2008), ماريا گرابوۆەتسكايا (قولا، 2008). ەركىن كۇرەس شەبەرى تايمۋراز تيگيەۆ (كۇمىس، 2008) جانە گرەك-ريم كۇرەسىنىڭ شەبەرى اسەت مامبەتوۆ (قولا، 2008).

دوپينگ داۋىنا ۇشىراپ سپورتتان شەتتەتىلگەن اتاقتى سپورتشىلاردىڭ قاتارىندا جاسۇلان قىدىرباەۆ، ۆلاديمير سەدوۆ سىندى الەم چەمپيوندارى دا بار. بۇل تىزىمگە ۋنيۆەرسيادا ويىندارىنىڭ (2015) جەڭىمپازى، جەڭىل اتلەت يۋليا راحمانوۆا، 2014 جىلعى سوچي وليمپياداسىندا قازاقستان قۇراماسىنىڭ تۋ ۇستاۋشىسى ەردوس احمەديەۆ، تانىمال بوكسشى نازىم يششانوۆا, «قازاقستان بارىسى» ءتۋرنيرىنىڭ 2017 جىلعى جەڭىمپازى ەلامان ەرعاليەۆ, اتاقتى شاڭعىشى الەكسەي ءپولتورانيندى قوسۋعا بولادى.

ءبىزدىڭ ەلدە جەكە سپورتشىنىڭ الەمدىك ارەنادا قول جەتكىزگەن جاقسى ناتيجەسىن بۇكىل ەلدىڭ جەتىستىگى دەپ تانۋ ادەتكە اينالعان. بيلىك حالىقتى وسىعان ۇيرەتىپ تاستاعالى قاشان؟ بىراق، سپورتتاعى جەتىستىكتى مەملەكەتتىڭ دامۋىمەن تىكەلەي بايلانىستىراتىن بيلىك سول سپورتشىنىڭ جەڭىلىسىن ەلدىڭ كەمشىلىگى دەپ سانامايتىنى تاعى بار.

ماسەلەن، 2012 جىلى لوندوندا قازاقستان سپورتشىلارى 7 التىن مەدال جەڭىپ العاندا، بۇل ءبىزدىڭ ەلدىڭ الەمدەگى الپاۋىت مەملەكەتتەر قاتارىنا قوسىلعانىنىڭ بەلگىسى دەپ ۇگىتتەدى. الايدا، ارادا ءبىراز جىلدار وتكەندە سول «التىنداردىڭ» تورتەۋىن دوپينگ داۋىنا بايلانىستى تارتىپ الدى. ال بۇل جاعدايعا بيلىك وكىنىش بىلدىرگەن جوق.

سپورت پەن ساياساتتى ارالاستىرىپ، سپورتشىنىڭ تەك ناتيجەسىنە عانا نازار اۋداراتىن جاۋاپتى شەندىلەردىڭ قاتەلىگىنەن بولار، ەلىمىزدە دوپينگ داۋى ءالى ءورشىپ تۇر. ءتىپتى سوڭعى بەس جىلدا 263 سپورتشى رۇقسات ەتىلمەگەن دارۋمەن پايدالانعان كورىنەدى. بۇل تۋرالى قر مادەنيەت جانە سپورت ۆيتسە-ءمينيسترى ەلدوس رامازانوۆ مالىمدەگەن بولاتىن.