جۇما, 29 مامىر 2020
COVID-19 قازاقستاندا. جۇقتىرعاندار — 9932. جازىلعاندار — 4900. قايتىس بولعاندار — 37
تۇلعا 8520 59 پىكىر 6 مامىر, 2020 ساعات 11:28

ب.مومىشۇلىنا «حالىق قاھارمانىن» بەرۋگە بولمايدى! نەگە؟

مەن باۋكەڭدى بۇل اتاققا لايىق ەمەس دەپ وتىرعان جوقپىن. كەرىسىنشە، ول اتاق باۋىرجان مومىشۇلىنىڭ اتىنا لايىق ەمەس. باۋكەڭە

«قازاقتىڭ ۇلتتىق باتىرى»

دەگەن ارنايى، ەرەكشە اتاق بەرىلۋى كەرەك! جانە ونى كەيىنگە قالدىرماي، بيىلعى جەڭىستىڭ 75-جىلدىعىندا بەرسەك ءتىپتى دۇرىس بولار ەدى. فرانتسۋزدار جاننا د اركتەن كەيىن شارل دە گوللدى «فرانتسۋزدىڭ ۇلتتىق باتىرى» دەپ رەسمي تانىدى. ءدال سول سەكىلدى باۋىرجان مومىشۇلى – ۇلتتىڭ سيمۆولى! ار-نامىسى! ۇلتتىڭ ۇياتى! ورىسشا ايتساق – «سوۆەست ناتسي!». وسى اتاۋدىڭ بارىنە ءبىر ءوزى لايىق. («ۇلتتىڭ ۇياتى» دەپ ول كىسىدەن باسقا تەك گەرولد بەلگەردى اتاۋعا بولاتىن شىعار...)

نەگىزدەمە كەرەك دەسەڭىزدەر:

1. جۇرەكتىڭ عانا ەمەس، اقىل مەن ءبىلىمنىڭ دە تەڭدەسسىز باتىرى – سوعىس كەزىندە 5 رەت قورشاۋدان باتالونىن امان الىپ شىعىپ قانا قويماي، ونىڭ قۇرامىن كوبەيتىپ الىپ شىعىپ وتىرعان جالعىز كوماندير.

2. ۇلتتىق مۇددەنى ارقاشان تۋ ەتىپ بيىك ۇستاعان، ءوز مۇددەسىنەن جوعارى قويىپ وتىرعان. تىم ۇلتشىل بولماسا تەز-اق كوتەرىلىپ كەتەتىنىن كورىپ وتىرسا دا، ودان تايماعان.

3. ۇلتتىق ماسەلەدە ەشقاشان پەندەشىلىك دەڭگەيگە تۇسپەگەن. تۇسكەندەردى كىم بولسا دا كەشىرمەگەن. 1970 جىلى، 9-مامىردا، جەڭىستىڭ 25-جىلدىعىنىڭ قۇرمەتىنە ءوتىپ جاتقان اسكەري پارادقا شاقىرىلماعان سوڭ ءوزى بارىپ، د.قوناەۆ پەن ب.ءاشىموۆتىڭ اراسىنا تاياعىن تىعىپ، ەكەۋىن ەكى جاققا قاراي يتەرىپ-يتەرىپ جىبەرىپ، ورتاسىنا تۇرىپ الىپ، پارادتى ءوزى قابىلداعان.

4. ادامگەرشىلىك تۇرعىدان ارقاشان بيىكتەن كورىنگەن. اعا سۇلتان ەسەنەي سەكىلدى «قۇدايدىڭ مەنىڭ الدىمدا بولماسا، مەنىڭ قۇداي الدىندا كۇنام جوق» دەپ ايتا الاتىنداي حاقىسى بولعان ادام.

5. جازۋشىلىعى جاعىنان دا تەڭدەسسىز «ۇشقان ۇيانى» قالدىرسا، «اڭىز بەن اقيقاتتىڭ» دا بەيرەسمي سواۆتورى بولعان.

ەندى وزدەرىڭىز ويلاڭىزدارشى، «حالىق قاھارمانى» اتاعىن العان ازاماتتارمەن – بۇرىن كەڭەس وداعىنىڭ باتىرى اتاعىن يەلەنگەن ساعادات نۇرماعانبەتوۆتەي باتىر بولسىن، روزا باعلانوۆاداي ءانشى بولسىن، سوۆحوز ديرەكتورى بولسىن، ءبارى دە لايىق جاندار – قالاي باۋكەڭدى ءبىر دەڭگەيگە قويۋعا بولادى، وبال ەمەس پە؟! قازاقتى الەمگە ءدال باۋكەڭدەي تانىتقان، تانىعان جۇرتتىڭ ءبارىن تاڭعالدىرعان، تامساندىرعان، ءتانتى ەتكەن باسقا كىمىمىز بار؟ قازاقتىڭ كەلبەتى، تولقۇجاتى عوي ول! اللا-تاعالاعا باۋكەڭدى بەرگەنى ءۇشىن سانسىز العىس ايتايىق-تاعى، ءوزىمىز الەمدە ساناۋلى دارا تۇلعانىڭ قادىرىنا جەتە بىلەيىك تە!

(باۋىرجانى بولعاندا، وزبەكتەر بۇنداي ۇسىنىستى سول ساتتە قۋانا-قۋانا  ىسكە اسىرار ەدى دەپ ويلايمىن. سەبەبى، ونسىز دا ولار «قۇداي دارىندى قازاققا بەرگەن، قادىرىن بىزگە بەرگەن...» دەپ، اسكيا ايتادى بىزگە).

ومىرزاق اقجىگىت

P.S. بولاشاقتا ۇرپاعىمىز «ۇلتتىق باتىر» دەگەن اتاققا كىمدى بولسىن ۇسىنعىسى كەلسە، الدىمەن مىڭ ويلانىپ، سان تولعانىپ بارىپ قيمىلدار. باۋكەڭنىڭ ارۋاعى ويلاندىرماي قويماس...

Abai.kz

59 پىكىر