ايتپاقشى، الگىندە قىتايدان ءبىر توپ دارىگەر كەلگەن. ون ادام. ولار كوروناۆيرۋس جۇقتىرعان ناۋقاستاردى ەمدەۋگە كومەكتەسەدى ەكەن. نۇر-سۇلتان اۋەجايىنان الگى قىتايلىق دارىگەرلەردى قىتايدىڭ قازاقستانداعى ەلشىسى مەن قر دەنساۋلىق ساقتاۋ ۆيتسە-ءمينيسترى كامالجان نادىروۆ كۇتىپ العان.

ء"بىز قحر-دان كەلگەن ون دارىگەردى كۇتىپ الدىق. بۇل ميسسيا مەملەكەت باسشىلارىنىڭ كەلىسىمىمەن جۇزەگە اسىپ وتىر. قىتايدىڭ قاۋىپتى ىندەتپەن كۇرەسۋدەگى، سونىڭ ىشىندە ناۋقاستاردى ەمدەۋ مەن ەپيدەميلوگيا ماسەلەلەرىندەگى تاجىربيەسىن كورىپ وتىرمىز. سوندىقتان بۇل وتە ماڭىزدى", - دەپتى كىشى مينيستر.

ۆيتسە-ءمينيستردىڭ ايتۋىنشا، قازاقستانعا پۋلمونولوگيا، رەانيماتولوگيا ماماندارى كەلگەن. سونىمەن قاتار، قىتايدان 5,5 توننا گۋمانيتارلىق كومەك كەلگەن. ونىڭ ىشىندە جەكەلەگەن قورعانىش زاتتارى، ءدارى-دارمەكتەر، بەتپەردەلەر، ءبىر رەت قولدانۋعا ارنالعان قولعاپتار، كوزىلدىرىكتەر ت.ب. بار كورىنەدى. الايدا گۋمانيتارلىق كومەك اراسىندا مەديتسينالىق جابدىقتار جوق.

قىتايلىق دارىگەرلەرگە 15 كۇندىك جۇمىس كەستەسى تۇزىلگەن. ولار نۇر-سۇلتان، الماتى جانە قاراعاندى قالالارىندا جۇمىس جاسايدى. 14 كۇندىك كارانتينگە جاتقىزىلمايدى.

Abai.kz