دۇيسەنبى, 1 ماۋسىم 2020
COVID-19 قازاقستاندا. جۇقتىرعاندار — 11308. جازىلعاندار — 5458. قايتىس بولعاندار — 41
بارەكەلدى! 1462 19 پىكىر 7 ءساۋىر, 2020 ساعات 10:25

ءومارالى ادىلبەكۇلى: پرەزيدەنتتىڭ ۇندەۋىنە ءۇن قوسىپ جاتىرمىز

كوروناۆيرۋس كۇشەيىپ، قالالاردىڭ كارانتينگە جابىلعانى ەشكىمگە دە وڭاي تيگەن جوق. توتەنشە جاعداي كەزىندە بيلىك يەلەرى دە، قاراپايىم حالىق تا قاتتى ابدىراپ قالعانى راس. اسىرەسە، تاپقان تابىسى تاماعىنان اسپايتىن اعايىنعا قيىن بولدى.

مەملەكەت تابىسىنان ايىرىلعان تۇرعىندارعا 42 500 تەڭگەدەن كومەك بەرەمىز دەپ ۋادە ەتتى. اۋەلدە بۇل كومەكتى 1,5 ميلليون ادام الادى دەپ جوسپارلانعان ەدى. كەيىن مەملەكەت باسشىنىڭ شەشىمىمەن، اتالعان كومەك 3 ميلليون ادامعا بەرىلەتىن بولدى. كۇنى بۇگىندە 42 مىڭ تەڭگەلىك الەۋمەتتىك كومەكتى الۋعا 1 ميلليوننان اسا ادام ءوتىنىش بىلدىرگەنى، بۇگىن بەلگىلى بولدى.

بيلىكتىڭ بەرەرى حالىقتىڭ قولىنا جەتەر. وسى رەتتە مەملەكەت تاراپىنان قولعا الىنعان وسىناۋ يگى شاراعا ەلدەگى اتىمتاي جومارت ازاماتتار دا ءۇن قوسىپ جاتقانىن ايتا كەتۋ كەرەك. ارقايسىسى قولىنان كەلگەنشە كوپشىلىككە كومەك بەرۋدە. جومارت جانداردىڭ الدى ىندەتپەن كۇرەسكە ءجۇز ميلليونداپ كومەك اتاسا، قالعانى قينالعاننىڭ قارنىن تويدىرۋعا كىرىسكەن. اسىرەسە ءتۇرلى قوعامدىق بىرلەستىكتەر مەن قايىرىمدىلىق قورلارى قولدان كەلگەنىنشە قىزمەت اتقارۋدا.

بۇعان دەيىن «جەبەۋ» رەسپۋبليكالىق قوعامدىق بىرلەستىگىنىڭ الماتىداعى دەنساۋلىق ساقتاۋ ۇيىمدارىنا كومەك كورسەتكەنى تۋرالى  باق-تا حابارلانعان ەدى. 20 ناۋرىزدا اتالعان قوعامدىق بىرلەستىك الماتى قالالىق № 12 ەمحانا مەن قالالىق دەنساۋلىق ساقتاۋ باسقارماسىنا قۇنى ميلليون تەڭگەلىك بەتپەردەلەر مەن انتيسەپتيكالىق ءدارى-دارمەك تابىستاعان بولاتىن.

ءومارالى ادىلبەكۇلى باستاعان «جەبەۋلىكتەردىڭ» قايىرىمدىلىق شاراسى مۇنىمەن شەكتەلگەن جوق. كۇنى كەشە عانا Abai.kz اقپاراتتىق پورتالى جازعان، قاپشاعاي قالاسىنداعى ءۇيى ورتەنگەن كوپبالالى وتباسىعا جانە الماتىداعى ماعجان جۇماباەۆ اتىنداعى مەكتەپتە وقيتىن قىرىق بالانىڭ وتباسىنا قارجىلاي كومەكتەسىپ وتىر ەكەن. مەملەكەتتەن ءبىر تيىن المايتىن، تەندەرگە قاتىسپايتىن قوعامدىق بىرلەستىكتىڭ تەك ءوز قالتالارىنان شىققان قارجىمەن حالىققا كومەكتەسىپ جاتقانى وزگەگە ۇلگى بولارلىق ءىس ەكەنى داۋسىز.

ءومارالى ادىلبەكۇلى، «جەبەۋ» رەسپۋبليكالىق قوعامدىق بىرلەستىگىنىڭ توراعاسى

- «جەبەۋ» قوعامدىق بىرلەستىگى قىتايدان كەلگەن كاسىپكەر ازاماتتاردىڭ اتسالىسۋىمەن قۇرىلعان. 2009 جىلدان بەرى جۇمىس ىستەپ كەلەدى. نەگىزگى ماقساتىمىز قازاقستانعا كوشىپ كەلگەن قانداستارىمىزدىڭ ازاماتتىق الىپ، ەلگە بەيىمدەلۋىنە كومەكتەسۋ. ول باعىتتا جاسالىپ جاتقان جۇمىستار از ەمەس... 

ال مىناۋ بۇكىل الەمدى اۋرەگە سالعان ىندەت تۇسىندا دا ەلگە كومەك قولىن سوزۋدان قاشپايمىز. مەملەكەت باسشىسىنىڭ ۇندەۋىنە ءۇن قوسىپ، ۆيرۋستىڭ بەتىن قايتارۋ ءۇشىن ءبىز دە حال-قادىرىمىزشە جۇمىس جاساپ جاتىرمىز. كوروناۆيرۋس كەراناۋلىقتى، سالعىرتتىقتى كەشىرمەيتىن، اسا قاتال ىندەت بولىپ تۇر. مۇندايدا بارلىق ازاماتتار، كاسىپكەرلەر، مەكەمەلەر، قوعامدىق ۇيىمدار جۇدىرىقتاي جۇمىلۋ كەرەك. دەنساۋلىق ساقتاۋ ۇيىمدارىنىڭ، قۇقىق قورعاۋ ورگاندارىنىڭ تالابى مەن ءوتىنىشىن ورىنداۋ ماڭىزدى.

جۇت جەتى اعايىندى دەگەندەي، ىندەت تاراپ، قالالار كارانتينگە جابىلعان تۇستا، قاپشاعاي قالاسىندا بەس بالاسى بار وتباسىنىڭ ءۇيى ورتەنىپ كەتىپتى. ونى وزدەرىڭىزدىڭ پورتالدان وقىپ بىلدىك. باسپاناسىز قالعان ءبىر ءۇيلى جان قوعامنان كومەك سۇراعان ەكەن. سول كىسىلەرگە بىرلەستىگىمىز اتىنان ازىق-تۇلىك السىن دەگەن نيەتپەن 180 مىڭ تەڭگە كومەك بەردىك.

سونىمەن قاتار، الماتى قالاسىنداعى ماعجان جۇماباەۆ اتىنداعى № 137 مەكتەپتە قامقورلىق كەڭەسىنىڭ توراعاسىمىن. بۇرىن دا كەرەك كەزىندە كومەكتەسىپ جۇردىك. وسى جولى «جەبەۋدىڭ» اتىنان 40 وتباسىنا قارجىلاي كومەك بەردىك. بۇل كومەك اتالعان مەكتەپتە وقيىن 40 وقۋشىنىڭ وتباسىنا بەرىلەدى. كومەك قاراجات «نۇر وتاننىڭ»، اۋداندىق ءبىلىم باسقارماسىنىڭ، اۋداندىق اكىمشىلىكتىڭ جاۋاپتى ادامدارىنىڭ قاتىسۋىمەن زاڭدى تۇردە تابىستالدى. 

سونداي-اق، وتكەندە الماتى قالالىق № 12 ەمحانا مەن قالالىق دەنساۋلىق ساقتاۋ باسقارماسىنا قۇنى ميلليون تەڭگەلىك ماسكا مەن ءدارى-دارمەك جەتكىزىپ بەردىك. مۇنىڭ ءبارى «ءبىز بىرگەمىز» اكتسياسىنا ءۇن قوسۋ ماقساتىندا جاسالىپ جاتىر. ەل بولىپ ءبىر جاعادان باس، ءبىر جەڭنەن قول شىعارىپ كوروناۆيرۋستىڭ تامىرىنا بالتا شاپساق دەگەن نيەت، بىزدىكى.

ايتا كەتەيىك، بۇگىندە مەملەكەت باسشىسىنىڭ باستاماسىمەن تاعايىندالعان مەملەكەتتىك جاردەماقىمەن قاڭتار-ءساۋىر ايلارىندا ەلىمىز بويىنشا 384,9 مىڭ كوپبالالى وتباسىلار قامتىلعان. ال، تەك ءساۋىر ايىندا عانا 396,5 مىڭ وتباسى 19 ملرد.تەڭگە كولەمىندە جاردەماقى العان.

ال، جۇمىسىنان ايىرىلۋىنا بايلانىستى جىل باسىنان بەرى مەملەكەتتىك الەۋمەتتىك ساقتاندىرۋ قورىنان الەۋمەتتىك تولەمدى 30,5 مىڭ ادام العان.  بۇل رەتتە وتكەن جىلدىڭ ءساۋىر ايىندا 3,2 مىڭ ازاماتقا جاردەماقى تاعايىندالدى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، بيىل 15 مامىرداعى جاعداي بويىنشا 2,9 ملن-نان استام قازاقستاندىق توتەنشە جاعداي رەجيمى كەزىندە تابىسىنان ايىرىلۋىنا بايلانىستى مەملەكەتتىك الەۋمەتتىك ساقتاندىرۋ قورىنان 42 500 تەڭگە مولشەرىندە ەكىنشى تولەم تاعايىندالعان.

ال، «42 500 تەڭگە» تولەمى ەنگىزىلگەن ساتتەن باستاپ ونى 4,5 ملن ادام الدى.

Abai.kz

19 پىكىر