الماتى قالاسىندا 280 ورىنعا ارنالعان پروۆيزورلىق گوسپيتال سالىنادى. بۇل تۋرالى الماتى قالاسى اكىمدىگى حابارلادى. 

كەشە قالا اكىمى باقىتجان ساعىنتاەۆ گوسپيتالدىڭ قۇرىلىسى باستالعان الاڭعا بارىپ، ونداعى جۇمىستارمەن تانىستى.

گوسپيتال سالۋ تۋرالى شەشىمدى كوروناۆيرۋس ينفەكتسياسىنا قارسى كۇرەس ماقساتىندا قۇرىلعان قر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ تۋرالى مەملەكەتتىك كوميسسيا قابىلداعان بولاتىن.

تەز سالىناتىن بلوكتى قۇرىلىس جابدىقتارىمەن بوي كوتەرەتىن نىسان 280 ورىنعا ارنالعان، ونىڭ ىشىندە 28-ءى ينتەنسيۆتى تەراپيا بولىمشەسىنە تيەسىلى.

قۇرىلىستىڭ مۇنداي مودۋلدى تەحنولوگياسى اتالعان گوسپيتالدى وسىناۋ سىن ساعاتتا از ۋاقىت ىشىندە سالىپ بىتىرۋگە مۇمكىندىك بەرەدى.

گوسپيتال كوروناۆيرۋس ينفەكتسياسىن جۇقتىرعان ناۋقاستارمەن بايلانىستا بولعان جانە قاتەرلى ىندەتتى جۇقتىرۋى مۇمكىن دەگەن كۇدىكپەن ەسەپكە الىنعان ادامدارعا ارنالعان.

«مۇنداي گوسپيتالدار بىزگە ىندەت جۇقتىرعان جانداردى دەر شاعىندا انىقتاۋعا، ولاردى دەرەۋ وقشاۋلاۋعا جانە ناۋقاستاردىڭ ۋاقىتىلى ءارى جۇيەلى ەم-دوم قابىلداۋىنا مۇمىندىك بەرەدى. ءسويتىپ ءبىز قاتەرلى ينفەكتسيانىڭ بەلەڭ الۋىنا جول بەرمەي، قالاداعى ەپيدەميولوگيالىق احۋالدى تۇراقتى ۇستاپ تۇراتىن بولامىز», – دەدى ساعىنتاەۆ.

اتالعان نىساننىڭ جوسپارىمەن جانە سىزبالارىمەن تانىسقان ب.ساعىنتاەۆ بۇگىندە ورنىن تەگىستەۋ جۇمىستارى باستالىپ كەتكەن جاڭا گوسپيتالدىڭ قۇرىلىس الاڭىن مۇقيات قاراپ شىقتى.

سونداي-اق، قالالىق قوعامدىق دەنساۋلىق ساقتاۋ باسقارماسىنىڭ باسشىسى ت.ابىلداەۆقا وسى جوبانى قولعا العان كومپانيا وكىلدەرىمەن بىرلەسىپ گوسپيتالعا اسا قاجەتتى قۇرال-جابدىقتار ماسەلەسىن دە پىسىقتاۋدى تاپسىردى.

مەردىگەر كومپانيا وكىلدەرىنە قولعا العان بارلىق جۇمىستى ساپالى ءارى ۋاقىتىندا ءبىتىرۋدى جۇكتەدى.

Abai.kz