بەيسەنبى, 28 ناۋرىز 2024
ساڭلاق 8418 1 پىكىر 4 ءساۋىر, 2020 ساعات 16:05

بەكزات بيىل 40 جاسقا تولار ەدى...

«جيىرما جىل كۇتكەن التىندى جيىرما جاستاعى جىگىت الىپ بەردى». بۇل ءسوز 2000 جىلى سيدنەي وليمپياداسىندا توپ جارعان بەكزات ساتتارحانوۆقا ارنالعان. كوممەنتاتوردىڭ وسى ءسوزى كوپ جانكۇيەردىڭ كوڭىلىلىندە جاتتالىپ قالعانىنا سەنىمدىمىن...

التىن مەدال العان جىگىتتىڭ 20 جاستا ەكەنى دە راس، سول التىن مەدالدى قازاقتىڭ 20 جىل كۇتكەنى دە راس ەدى. 1980 جىلى تۋعان بەكزات 1980 جىلى سەرىك قوناقباەۆ ماسكەۋ توتىندە اتوي سالعاندا بەسىكتە جاتقان ەكەن. ارادا 20 جىل ءوتىپ، 20-عا تولعاندا بەكزات وليمپيادا چەمپيونى اتاندى. وكىنىشتىسى، سول ساڭلاعىمىزدىڭ باقيلىق بولعانىنا دا 20 جىل بولدى...

ول كەز بۇگىنگىدەي سپورت پەن ساياساتتىڭ، سپورت پەن ءدىننىڭ ارالاسپاعان، تازا كەزى. بەكزاتتىڭ جەڭىسىنە بارشا اعايىن شىن قۋانعان. ال قازىر قازاق بيلىگى سپورتتاعى جەتىستىك – ەل دامۋىنىڭ ەرەكشە بەلگىسى دەگەن قاعيدانى ويلاپ تاپتى. بۇل بولەك اڭگىمە.

20 جاسىندا جالپى جۇرتتى قۋانىشقا بولەگەن بەكزات ساتتارحانوۆ كوزى ءتىرى بولسا بۇگىن 40 جاسقا تولار ەدى. بۇگىن ونىڭ تۋعان كۇنى!

باتىر بەكزات 1980 جىلى 4 ساۋىردە تۇركىستان قالاسىندا دۇنيەگە كەلگەن. ءۇيدىڭ كەنجەسى. 1986-1996 جىلدار ارالىعىندا اباي اتىنداعى مەكتەپ-ينتەرناتتا، كەيىن جۇمابەك ەدىلباەۆ اتىنداعى №18 ورتا مەكتەپتە وقيدى. 1995 جىلى العاش رەت بوكس ۇيىرمەسىنە جازىلىپ، بالالار باپكەرى نۇرلان جۇماباەۆتان ءتالىم العان.

بوكسقا قاتىسقان العاشقى جىلى تۇركىستان قالاسىندا وتكەن ز. سەيىتبەكوۆتى ەسكە الۋ تۋرنيرىندە توپ جاردى. بۇنىڭ ونىڭ سپورتتىق عۇمىرىنداعى العاشقى جۇلدە ەدى. وسى جارىستا العان «تۇركىستان 95» دەگەن جازۋى بار قىش قۇمىرانى سيدنەي وليمپياداسىنىڭ التىنىمەن تەڭ كورگەن ەكەن.

ءدال سول جىلى جاسوپىرىمدەر اراسىنداعى حالىقارالىق جارىستا جەڭىمپاز اتانىپ، باپكەرلەر كوزىنە تۇسە باستايدى.

1996 جىلى قوستاناي قالاسىندا وتكەن بوكستان جاستار اراسىنداعى قازاقستان رەسپۋبليكاسىنىڭ ىشكى بىرىنشىلىگىندە چەمپيون اتانادى. ءدال سول جىلى شىمكەنتتىك اناتولي ۆيزيرياكين اتتى باپكەردىڭ قاراماعىنا ءوتىپ، وبلىس ورتالىعىنداعى مەكتەپ-ينتەرناتتا جاتتىعا باستايدى.

1997 جىلى قاراعاندى جانە گەرمانيانىڭ كەلن قالالارىندا وتكەن حالىقارالىق تۋرنيرلەردە توپ جارادى. سونىمەن قاتار وليمپياداعا دايارلاۋ وبلىستىق ورتالىعىنا قابىلدانادى.

1998 جىل بەكزات ءۇشىن تابىستى بولدى. سول جىلى ارگەنتينادا وتكەن جاسوسپىرىمدەر اراسىنداعى الەم چەمپيوناتىندا كۇمىس جۇلدەگەر اتاندى. قوستاناي قالاسىندا وتكەن جارىستا 54 كەلىدە سىنعا تۇسكەن ول مارات مازىمباەۆتان ۇتىلىپ قالعانىمەن، باپكەرلەر سەنىمىنەن شىعىپ، ۇلتتىق قۇراماعا قابىلدانادى. تۇركىستان قالاسىندا ءابدىسالان نۇرماحانوۆتىڭ قۇرمەتىنە وتكەن حالىقارالىق تۋرنيردە جەڭىمپاز اتانىپ قويماي، جارىستىڭ ەڭ ۇزدىك بوكسشىسىنا بەرىلەتىن سىيلىققا يە بولادى. ساعادات نۇرماعامبەتوۆ اتىنداعى حالىقارالىق ءتۋرنيردىڭ جەڭىمپازى اتانادى. تايلاندتا وتكەن بۇكىل ازيا بىرىنشىلىگىندە جۇلدەگەر قاتارىنا ىلىگەدى.

1999 جىلى ۆەنگريا جانە بولگاريادا وتكەن حالىقارالىق تۋرنيرلەردە وزا شاۋىپ، تاشكەنتتە وتكەن بۇكىل ازيا بىرىنشىلىگىندە كۇمىس جۇلدەگە قول جەتكىزەدى. ءدال وسى كۇمىس جۇلدەسىمەن بىرگە سيدنەي وليمپياداسىنىڭ جولداماسىنا دا يە بولادى.

2000 جىلى 57 كەلىدە وليمپيادا ويىندارىنىڭ جەڭىمپازى بولدى.

بەكزات ساتتارحانوۆ. جەتىستىكتەرى:⠀⠀

- سيدنەي وليمپياداسىنىڭ چەمپيونى (57 سالماق);⠀⠀
⠀⠀
- ورتالىق ازيا ەلدەرى بىرىنشىلىگىنىڭ چەمپيونى(1999);⠀⠀
⠀⠀
- گران-پري كۋبوگىنىڭ جەڭىمپازى (2000);⠀⠀

- ازيا چەمپيوناتىنىڭ كۇمىس جۇلدەگەرى (1999);

- جاستار اراسىنداعى الەم چەمپيوناتىنىڭ كۇمىس جۇلدەگەرى (1998);

- جاستار اراسىنداعى ازيا چەمپيوناتىنىڭ كۇمىس جۇلدەگەرى (1998).

قۋانىش قاپپاس

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3510