جۇما, 29 ناۋرىز 2024
قاينايدى قانىڭ... 7524 28 پىكىر 3 ءساۋىر, 2020 ساعات 20:57

42 500 تەڭگەلىك «كارانتين»

42 500 تەڭگە. قازىر ەل-حالىقتىڭ باس قاتىرعان باستى پروبلەماسى - وسى 42 500 تەڭگە بولدى. اۋىلداعى قازاقتىڭ دا، قالاداعى قازاقتىڭ دا كەشەلى-بەرى ساپىرىلىسىپ سابىلىپ جۇرگەنى - وسى 42 مىڭنىڭ «قايعىسى».

پرەزيدەنت پارمەن بەرگەننەن سوڭ، ۇكىمەت ءويتىپ-ءبۇيتىپ 3 ميلليونعا جۋىق ادامعا 42 500 تەڭگەدەن ۇلەستىرەتىن بولدى دەگەن اڭگىمە الەمجەلىنى ءاپ-ساتتە شارلاپ كەتتى. توتەنشە رەجيم ءتورت قابىرعاعا قاماعان تار كەزەڭدە تۇراقتى تابىسىنان ايرىلىپ، اس-اۋقاتقا اقشا تاپپاي جاتقان اعايىنعا از دا بولسا كومەك ەدى، بۇل. شىندىعىندا، الەۋمەتتىك كومەك رەتىندە 42 مىڭنان بەرۋ تۋرالى شەشىم - «اۋزىڭا اكەپ، اق مايدى سالماسا دا، ۇكىمەت وزەگىڭدى تالدىرمايدى» دەگەننىڭ توتەنشە رەاليزاتسيالانۋى سياقتى ەدى.

پرەزيدەنت - تاپسىردى. ۇكىمەت: «ماقۇل»، - دەدى. بيۋدجەتتەن قاراجات قاراستىرىلدى. ەندى كەزەك - اتقارۋشى ورگانداردا.

اۋەلدە، «egov»، دەدى. كەيىن «كىلت» سۇرادى. «2 مىڭ تەڭگە تولەۋ» تۋرالى تالاپ تاعى شىقتى. قىسقاسى، بىلتىرعى جىلعى 21 مىڭنىڭ جىرى قايتالانا باستادى. تەك، بۇ جولى بەرىلەتىن سوماسى سەكىلدى، سوڭىنداعى شۋى دا ەكى ەسە كوپ بولىپ شىقتى. سودان، كەشە مينيستر نۇرىمبەتوۆ ارنايى سايت اشىلاتىنىن ايتىپ، ۇيالى تەلەفونعا حابارلاما جىبەرۋ ارقىلى الۋدىڭ جولىن ۇسىندى. بۇگىن «42500.enbek.kz» دەيتىن سايت اشىلدى. سايت. قالاداعى قازاققا سايت ارقىلى قۇجات راسىمدەگەن ءتيىمدى-اق. ال اۋىلداعى جۇرت شە؟ جاڭاعى جاردەمپۇلعا جاۋتەڭدەپ وتىرعانداردىڭ دەنى اۋىلداعى جۇرت قوي. ال ولار كەشەلى-بەرى پوشتا مەن بانكتەرگە اعىلىپ جاتىر. جالعىز ولار ەمەس. الماتىنىڭ ىرگەسىندەگى ءىرىلى-ۇساقتى قالالاردىڭ دا جاعدايى وڭىپ تۇرعان جوق. سەنبەسەڭىز، الەۋمەتتىك جەلىدە ايدىك بولعان الگى بەينەجازبالاردى، انە قاراڭىز.

;feature=emb_title

جوعارىداعى بەينەجازباداعى وقيعا الماتى وبلىسىنا قاراستى شامالعان ستانساسىندا بولعان. تاعى ءبىرى قاسكەلەڭدەگى جاعداي. ال سول الماتى وبلىسىندا كوروناۆيرۋس جۇقتىرعان 9 ادام بار. حالىق توپتاسىپ جينالعان قاسكەلەڭدە 8 ادام كوروناۆيرۋس جۇقتىرىپ، اۋىرىپ جاتىر.

راس، قاراقان باستىڭ ەمەس، بالا-شاعانىڭ قامى ءۇشىن 42 مىڭنان ۇمىتتەنىپ جۇرگەن جۇرتتى جانە كىنالاي المايسىڭ. قاۋىپتى ۆيرۋستىڭ جىلدام تارالۋى مەن تەڭگەنىڭ تۇراقسىزدىعى «مىرزاقاماقتا»  جاتقان كوپ شاڭىراقتىڭ كۇي-تۇرمىسىنا تەرىس اسەر ەتپەي قويمايتىنى تۇسىنىكتى.

ۇكىمەتتەن كەلەتىن كومەككە كوز تەلمىرتكەن كوپ جۇرت «42 مىڭنىڭ اياعى الگى 21 مىڭنىڭ جىرىنداي بولىپ كەتپەي مە»، دەپ تە كۇدىكتەنەدى. ويتكەنى، شولاقبەلسەندى شابارمانداردىڭ جۇمىرتقا ساناپ، تاۋىق تۇگەندەپ ءجۇرىپ اقىر اياعىندا الگى 21 مىڭدى بەرمەستىڭ جاعىنا جەتكىزگەنى ەل-جۇرتتىڭ ەسىنەن  ۇمىت بولا قويعان جوق-تى.

ەكىنشى جاعىنان ساپىرىلىسىپ، قارانوپىر بولىپ، اكىمدىكتەردى باسىپ كىرىپ جاتقان جۇرت - 42 500 تەڭگە ءۇشىن ءوزىنىڭ، وزىمەن قوسا مىڭداعان ادامنىڭ ومىرىنە توتەلەي قاۋىپ ءتوندىرىپ جاتقانى دا شىندىق.

ال بۇل ءنوپىر قايدان شىقتى؟ قالاي جينالدى؟ ولاردىڭ وسىلاي جينالۋىنا نە سەبەپ بولدى؟ ەندى مىنانى قاراڭىز:

بۇل جاڭا اشىلعان 42500.enbek.kz سايتى:

ال بۇل باياعى ەلەكتروندى ۇكىمەتتىڭ سايتى:

ال بۇل وتىنىشتەرىن وتكىزە الماعان اعايىننىڭ كوپ ساۋالى:

وتكەن جولعى 21 مىڭنىڭ جايىن ايتتىق قوي. بۇل جولى ءبىر ەمەس، بىرنەشە مينيستر الەۋمەتتىك كومەكتى الۋدىڭ جولىن ءتۇسىندىرىپ، ارنايى سايتتىڭ سىزباسىن تاراتىپ جاتتى. نە دەيسىز، اقىرىندا ءتىپتى «تەلەگرامم» جەلىسىندە «بوتتار» ارقىلى ءوتىنىش قابىلدايتىنىن دا ايتتى. تەك، سول ايتىلعاندار ءالى ءىس جۇزىندە جۇزەگە اسىپ جاتقان جوق. «سايت» سىزىلىپ-سوزىلىپ ول تۇر. «ەلەكتروندى ۇكىمەت» «كىلت» تۇگەندەپ ول تۇر. «تەلەگرامم-بوتتاردان» مۇلدە حابار جوق.

ال 42 مىڭ تەڭگەگە الۋ ءۇشىن جۇرت اكىمدىكتەر الدىندا تۇر. كەزەككە تالاسقان حالىق ءجاي تۇرعان جوق. يتەرىسىپ-قاقتىعىسىپ تۇر. ءتىپتى، كەيبىر جەرلەردە توبەلەس شىققان. ونىڭ ءبارى جاڭاعى الەۋمەتتىك جەلىلەردەگى بەينەجازبالاردا تاراپ جاتىر.

قاۋىپتى ۆيرۋس قازاقستاننىڭ بارلىق وبلىسىنا جەتتى. ەلدە ۇزىن-ىرعاسى 460 ادام ىندەت جۇقتىرعان جانە بۇل كورسەتكىش كۇن سايىن، ءتىپتى ساعات سايىن وزگەرىپ وتىر. 10-نان استامى اۋىر حالدە. رەانيماتسيا توسەگىنە تاڭىلعان. 3 ادام قايتىس بولدى. 13 مىڭنان استام ادام جاڭاعى ۆيرۋس جۇقتىرعاندارمەن قارىم-قاتىناستا بولعان ەكەن. ولار دا ورتاق قوعامنان وقشاۋلانىپ جاتىر. ول از دەسەڭىز، تاعى 28 مەديتسينا قىزمەتكەرى كوروناۆيرۋس جۇقتىرعان. مۇنىڭ ءبارى مينيستر ءبىرتانوۆتىڭ اۋزىنداعى اقپار.

راس، 42 مىڭ تەڭگە ءبىر وتباسىنىڭ ءبىر ايلىق اس-اۋقاتىنا جەتەر-جەتپەس اقشا. ال سول ءۇشىن مىڭداعان ادامنىڭ ءومىرىن بايگەگە تىگۋ كىمگە كەرەك؟ نە ءۇشىن كەرەك؟

بۇگىندە اركىمنىڭ جانقالتاسىندا كەز كەلگەن بانكتىڭ تولەم جاساۋعا، اقشا اۋدارۋعا ارنالعان كارتالارىن تابۋعا بولادى. شوتى بار، بانك كارتاسى قالتاسىندا جۇرگەن ادامعا جاڭادان شوت اشقىزۋ - باسى ارتىق بيۋروكراتيزم ەمەس پە؟

ءبىز جوعارىدا قارا حالىقتىڭ نوپىرگە اينالۋىنىڭ ءبىرلى-جارىم سەبەبىن اتاپ كورسەتتىك. ول مينيسترلىك ۇسىنعان مەحانيزمدەردىڭ - تەحنيكالىق جاعىنان قاۋقارسىزدىعى. دالىرەك ايتساق، دايىن ەمەستىگى. ول - باسى ارتىق بيۋروكراتيزم. ول - اس-اۋقاتى تاۋسىلعان جۇرتتىڭ كارانتين ەرەجەلەرىن ەسكەرمەگەندىگى.

سوندىقتان، استانا جاقتاعى اق جاعالىلار، قالا بەردى جەرگىلىكتى اكىمدىكتەگىلەر وسى ءبىر كەمشىلىكتى بۇگىن رەتتەۋى كەرەك. ايتپەسە، ەرتەڭ ىندەت جۇقتىرعاندار سانى ەكى، ءتىپتى ءۇش ەسەلەنىپ كەتۋى مۇمكىن-اق. قاۋىپ ەتكەننەن ايتامىز...

Abai.kz

28 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1570
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3564