ەكىنشى دۇنيەجۇزىلىك سوعىستا جانقيارلىق ەرلىك كورسەتىپ، قاندى مايداندا قان توككەن قازاقتىڭ تالاي ۇل-قىزدارى كەڭەستىك جۇيە كەزىندە ەسكەرۋسىز قالدى. جىل سايىن جەڭىس كۇنىن بارشا حالىق بولىپ تويلاپ كەلەمىز، ال اجال وعىنىڭ استىندا فاشيستىك گەرمانيانىڭ ورداسىندا رايحستاگتىڭ توبەسىنە جەڭىس تۋىن قاداعان راقىمجان قوشقارباەۆقا دا، باسقا دا تالاي ورەندەرىمىزگە كەزىندە كەڭەس وداعىنىڭ باتىرى اتاعى بەرىلمەگەنى سول كەزدەگى ساياسي ادىلەتسىزدىكتىڭ ءبىر عانا مىسالى.

سول كەزدەرى ماسكەۋ باعالاماعان باتىرلارىمىزدىڭ ەرلىگىن جاستارىمىزعا ۇلگى ەتىپ، ەسىمدەرىن ۇلىقتاۋ بۇگىنگى ۇرپاقتىڭ قاسيەتتى بورىشى ەمەس پە؟ قازىر گەوساياسي جاعداي دا، رۋحاني قۇندىلىقتارعا كوزقاراس تا وزگەرىپ، تاريح بەتتەرىنە ۇلتتىق سانا تۇرعىسىنان قارايتىن بولدىق. تاۋەلسىز ەلدىڭ دەربەس ۇستانىمى، ءوز بەت-بەدەرى بولۋى زاڭدىلىق. بۇل كۇندەرى كەلمەسكە كەتكەن وتارشىلدىق جۇيەنىڭ يدەولوگيالىق قازانىنان شىققان كەڭەس وداعىنىڭ باتىرى دەگەن اتاق تاۋەلسىزدىك جىلدارى دۇنيەگە كەلگەن ۇرپاق ءۇشىن تۇسىنىكسىز، ءارى ساياسي-يدەولوگيالىق تۇرعىدان ەكىۇشتى ويعا جەتەلەيتىن بۇلىڭعىر ۇعىم. مايدان دالاسىندا حالقىمىزدىڭ ۇل-قىزدارى جاۋمەن كەڭەس وداعىنىڭ تۋى استىندا شايقاسقانمەن ولار الدىمەن تۋعان جەرى، قازاق حالقى، ءوز وشاعى ءۇشىن وت كەشكەنى دە اقيقات.   

ەندەشە ءوز حالقىمىزدىڭ باتىر ۇلدارىنىڭ ەرلىگىن وزگە ەمەس ءوز مەملەكەتىمىز لايىقتى باعالاۋى كەرەك. سوندىقتان بۇگىنگى تاۋەلسىزدىك جاعدايىندا ماعىناسى جوعالىپ، قۇنى تومەندەگەن  كەڭەس وداعىنىڭ باتىرى اتاعىنىڭ ورىنىنا قازاق ەلىنىڭ باتىرى تاعى تاعايىندالىپ، ول ماراپات كەشەگى سۇراپىل سوعىستا قازاق ەلى ءۇشىن قۇربان بولعان باتىرلارعا، بەيبىت كۇندەرى، ەل قورعاۋدا ەرەن ەرلىك تانىتقان وتان قورعاۋشىلارىنا بەرىلسە جاقسى بولار ەدى.

مارات ەرمۇقانوۆ 

Abai.kz