"اسىل ارماندا" شامامەن 20 مىڭ ادام تۇرادى. كەشەندە 21 كوپ قاباتتى ءۇي، ولاردا 5 مىڭنان استام پاتەر بار. 28 ناۋرىزدا كارانتين تۇرعىن ۇيلەردىڭ ءبىرىنىڭ ءبىر پودەزدىندە عانا جاريالانعان. سول كۇنى وسى ۇيدە تۇراتىن ءبىر قىزدىڭ COVID-19 جۇقتىرىپ العانى انىقتالعان.

"قاۋىپسىزدىك جانە كوروناۆيرۋستىڭ تارالۋىنا جول بەرمەۋ ءۇشىن "اسىل ارمان" كەشەنىن كارانتينگە جابۋ تۋرالى شەشىم قابىلداندى. تىنىشتىق ساقتاڭىزدار - بۇنىڭ بارلىعى تۇرعىندار ءۇشىن جاسالىپ وتىر. جۇمىس بەرۋشىگە كارانتيندە ەكەنىڭىزدى ەسكەرتىڭىز" دەلىنگەن كەشەن تۇرعىندارىنا تاراتىلعان حابارلامادا.

جەرگىلىكتى بيلىك كەشەننىڭ قوعامدىق ورىندارى دەزينفەكتسيالاناتىنىن، دارىگەر امبۋلاتورياسى اشىلاتىنىن ايتتى. امبۋلاتوريا وسى اۋداننىڭ تۇرعىندارىن عانا قابىلدايدى.

"ازىق-تۇلىك ارزان باعامەن ساتىلادى. تۇرعىندارعا ءتۇسىندىرىپ جاتىرمىز. كەشەندى پوليتسيا قورشاۋعا الدى. كۇزەت قويىلدى", - دەدى الماتى اكىمدىگىنىڭ ءباسپاسوز قىزمەتى.

الماتىدا، نۇر-سۇلتاندا، قاراعاندىدا جانە باسقا دا قالالاردا بىرنەشە ءۇي كارانتينگە جابىلدى. بىراق تۇتاس ءبىر تۇرعىن ءۇي كەشەنىن العاش رەت وقشاۋلاپ وتىر.

قازاقستاندا 435 ادام كوروناۆيرۋس جۇقتىرعان، ءۇش ادام قايتىس بولعان، 27 ادام جازىلعان.

Abai.kz